بلوچی زبان ءِ نبشتہ رھبند؟

نبشتہ کار: ھانی بلوچ

مرچیگیں انٹرنیٹ ءِ زمانگ ءَ ھم مئے راج ءِ بازیں وانِندہ ھمے باوست کن اَنت یا گْوش ئے زِدی اَنت کہ بلوچی زبان ءَ شریں رھبند نیست پرچا کہ بازیناں رھبند اڈ داتگ اَنت پمیشکا انی ما ھیران اِیں کہ کئی رھبند ءَ بہ منّ اِیں؟

گِند ئے بلوچی زبان ءِ ھر کتابے وتی ھساب ءَ چہ ردیاں چکار ءُ سرریچ اَت۔ بلوچی زبان ءِ شائراں بلوچی بے رھبندی نبشتگ ءُ بلوچ وانندہ ما رَدیں جیڑھانی تہ ءَ دور دات اَنت۔ بلے مرچیگیں وٹس ایپ، پیسبُک ءُ تامُرانی سوب ءُ درونتانی وانگ ءَ بازیں بلوچ راج ءَ اے زانت ءُ سرپدی بوتگ بلوچی ماں کُجام رھبند ءَ نبیسگ بیت؟

البت انگت ھم بازیں بلوچ وانِندھے ھست کہ آیاں وتی موبائل پہ وتی راجی زبان ءِ وانگ ءُ زانگ ءَ کارمرز نہ کُتگ اَنت ءُ انگت شریں وڑے ءَ وتی راجی زبان ءِ وانگ ءُ راست نبیسی ءِ جُھد نہ کنگ ءَ اَنت بلکیں تچک ءَ جُست کن اَنت پہ بلوچی نبیسگ ءَ ما کئی رھبند ءَ کارمَرز بہ کن ایں؟ کئی وڑ ءَ نبشتہ بہ کن اِیں؟ پرچا کہ مارا بازیں مردمے گْوش اِیت بلوچی ءَ نبشتہ رھبند نیست۔

گِند ئے بلوچ راج ءِ تہ ءَ وتگڑیں اُستاد، دْروگیں زبانزانت ءُ نابودیں نودربر سک باز اَنت پمیشکا ما راج ءَ سرسوج کنگ لوٹ اِیں کہ اشتاپ مہ کن اِت، کسی رھبند ءَ مہ منّ اِت ءُ بے پٹ ءُ پول ءَ کسی رھبند ءَ مہ زُور اِت۔ چہ دُرستاں پیسر بلوچی گالوار ءُ نبشتہ ءِ بابت ءَ چہ اُستاداں جُست بہ کن اِت یا چہ گُوگل ءَ شوھاز بہ کن اِت،  بلوچی دَرونتاں وانان ءَ دْروگ، رَد ءُ راست ءَ بہ زان اِت کہ زاناں راستی ءَ بلوچی ءَ رھبند نیست؟

 ھمے زانگ ءِ جُھد بہ کن اِت کہ کئی رھبند ءَ شریں بلوچی  دَرونت(Lessons) ھست اَنت؟ کجام رھبند ءَ وتی دَرونتانی تہ ءَ کارگال(Verb)،  کُمکّارگال(Auxillary Words)، رنگ گال(Adjectives) ءُ تپورگال(Prespositions) ءِ وڑیں بُنرھبندی(گرائمر) چیز ھوار کُتگ اَنت؟ بزانکہ راج ءَ چہ دُرستاں پیش رَد ءُ راست ءِ زانگ ءَ بلوچی دَرونت وانگ المی اَنت۔ مرچی ھرکَس ءَ بلوچی کُمکارگال، تپورگال ءُ رنگ گال ءِ وڑیں چیزانی وانگ، دلگوش کنگ ءُ زانگ المی انت پرچاکہ دُنیا ءِ ھر زُبانے گوں دَرونتاں دربرگ بیت، ھر زبان ءَ کُمکارگال، تپورگال، رنگ گال ءُ زمانک ءِ وڑیں بُنرھبدی ءِ چیز وَ بنت پمیشکا بلوچی ءَ ھم ھمے بنرھبندی چیز ھست اَنت پرچا کہ بلوچی ھم دُنیا ءِ آ دِگہ زبانانی وڑ ءَ بنی آدمی زبانے ءُ بلوچ راج ءِ زبان دوستاں اے جیڑھانی سر ءَ کار کُتگ ءُ اے وڑیں جیڑہ ءَ شریں وڑے ءَ ھلاس کُتگ اَنت پمیشکا باید اِنت ما اِے وڑیں مردماں دلگوش مہ کن ایں کہ آ گْوش اَنت بلوچی ءَ نبشتہ رھبند نیست۔

راستی وَ ایش اِنت کہ بلوچی ءَ رھبند ھست کہ مرچاں دی بلوچستان پوسٹ ءُ ریڈیو زرمبش ءِ وڑیں ھال ءُ اھوالی تندجاھاں وتی بلوچی سروس جریدگ ءُ برجاہ کُتگ اَنت۔ مارا اے زانت ءُ روژنائی راج ءِ دیم ءَ برگ ءُ سرکنگ لوٹ ایت۔ اے جُنز ءُ جُھد ءَ ما بلوچ زالبولاں گیش کار کنگ لوٹ ایت کہ رَدیں مردم سرپد بہ بنت۔

گِند ئے ھُدا ءَ مارا اگل داتگ اگاں ما چہ دُرستاں پیش بلوچی زُبان ءِ دَرونتاں وانان ءَ بلوچی بُنرھبندی چیزاں بزان ایں گُڑا ما رَد ءُ راست ءِ پجّار ءَ شریں وڑے ءَ کُت کن ایں، چہ درونتانی وانگ ءَ پد ما وت تچک ءَ زان ایں کہ کَے رَد ءُ کَے راست وانینگ ءَ اِنت؟ کَے بلوچی زُبان ءِ دوزواہ ءُ کَے بلوچی زبان ءِ بدواہ اِنت پرچا کہ سرپدی چہ وانگ ءَ رس ایت۔ وھدیکہ ما بلوچی درونت ءُ نبشتہ بُنرھبند ءَ زان ایں گُڑا ھمے وتگڑیں اُستاد، دْروگیں زبانزانت ءُ نابودیں بدواھانی راستی ءُ بستار ءَ وت زان ایں کہ اے بدواہ چونیں وتگڑ اَنت۔ چوناھا راج ءِ تہ ءَ بدواھانی پجّارگ ءُ زانگ المی اِنت۔

گِند ئے مرچیگیں پَیسبُک ءُ وٹس ایپ ءِ آسراتی ءَ مارا ھر ھال ءَ دو سے روچ ءِ وھد کَشگ ءُ بلوچی دَرونت وانگی اَنت کہ ما بلوچی زبان ءِ بدوھاں بزان ایں۔ مارا وت ءَ راجی زبان ءِ دوزواہ ءُ زبان دوست جوڑ کنگی انت۔ ما چہ بلوچی وانگ ءُ راست نبیسگ ءِ بلد بوگ ءَ پد بلوچی وانینگ ءِ جُھد ھم بکن ایں پرچا کہ بلوچی گوں وانینگ ءِ دیمروئی کنت۔

شالا دائم  وش، وشھال ءُ سلامت بات اِت ءُ شالا راجی زبان ءِ جُھد کار ءُ ھزمتکار جوڑ بہ بات اِت۔ بلوچ راج شالا یکجاہ، یکمُشت ءُ تپاک بہ بات۔ شالا انچوش بات۔