نبشتہ کار: جھانزیب بلوچ
پاکستان ءِ دور ءُ دْراجیں کُنڈاں بلوچ راج دیر اِنت کہ وتی ھک، پجار ءُ شرپ ءِ ھاتر ءَ جھد کنگ ءَ اِنت۔ ایشاں پہ اِنساپ، وانگ ءُ زانگ، جانسلامتی ءُ اِیمنیں زند ءَ وتی توار پہ اِیمنی چست کتگ۔ ایشانی تہ ءَ ھما دلیریں ارواہ ھم ھوار اَنت کہ آیاں بلوچ جھدکار گْوش اَنت۔ اے ورنا ءُ جنین اَنت کہ نااِنساپی ءِ ھلاپ ءَ گپ جن اَنت، بیگواھیں مردمانی آجو کنگ ءِ لوٹ کن اَنت، لوٹ اَنت کہ آیانی زمین، وسیلگ ءُ مردماں گوں اِنساپ ءِ ھساب ءَ ھبر کنگ بہ بیت۔ بلے مرچی اے تواراں چہ بازیں توار زندان ءِ پُشت ءَ اَنت، پہ راست گْوشگ ءَ بندیگ اَنت۔
بلوچ جھدکار نودربر، ڈاکٹر، اُستاد، نبشتہ کار، اھوالکار ءُ لس مھلوک اَنت کہ آ وتی ڈیھ ءَ امن ءُ ایمنی ءَ گندگ لوٹ اَنت۔ ایشانی تہ ءَ لھتے بلوچ یکجھتی کمیٹی ءِ وڑیں امن ءُ ایمنی ءِ جھداں کن اَنت، زھرشانی، جلسہ ءُ سرپدی ءِ پروگرامانی بند ءُ بست ءَ کن اَنت۔ ایشانی مول ءُ مراد زوراکی نہ اِنت، بلکیں ایشانی سِلاہ راستی ءُ منّانک چکاریں درور ءُ گپ اَنت۔ چی ءَ کہ آ اِیمنیں راہ ءُ درانی وسیلگ ءَ اِنساپ ءِ لوٹ اَنت۔
بلوچ ورنایانی تہ ءَ ڈاکٹر مھرنگ بلوچ، بیبرگ بلوچ، ماجبین بلوچ ءُ دگہ بازیں نام ھست اَنت۔ اے مردم سداں ھاندانانی درد ءِ نمائندگی کن اَنت کہ آیانی نزیکیں مردم گار اَنت۔ آ گار ءُ بیگواھیں مردمانی اکساں دست ءَ گوں کوچگاں رھادگ بنت۔ پُراِیمیں زھرشانی ءِ بند ءُ بست کن اَنت، پریس کلبانی دیم ءَ گپ جن اَنت ءُ راستی ءَ ابید دگہ ھچّے لوٹ نہ کن اَنت۔
امن ءُ ایمنی ءَ ابید بازیں اے جھدکار دزگیر ءُ زندان ءَ بندیگ کنگ بوتگ اَنت۔ ایشانی جرم؟ بس ھمیش اِنت کہ مئے بیگواھیں مردم کُج ءَ اَنت؟ مئے ھکّ پرچا پادمال کنگ بنت؟ مئے توار پرچا بے توار کنگ بیت؟ بدل ءَ ریاست ایشاں بیھار ءُ پادتْراپ دنت۔
واکدار چہ ھما مردماں ترس اَنت کہ گوں دلیری ءَ گپ جن اَنت۔ سرکار ایشانی جنجال ءُ جیڑھاں گوشدارگ ءِ بدل ءَ پہ ایشانی واستا بے تواری ءِ راہ ءَ گچین کنت۔ آیاں آوار بجن ءُ بے ڈسّیں جاھاں بندیگ ءُ بیگواہ بہ کن، کھول کہ اے گم ءِ دیمپانی توار چِست کنت ءُ زھرشانی کنت گُڑا وڑ وڑیں بُھتامانی دیمپان بہ اَنت۔
وھدے کہ امن پسندیں مردماں گوں مجرم ءِ وڑ ءَ ھبر کنگ بیت گڑا چاگرد ءِ تہ ءَ ترس ءُ بیمّے پیداک بیت، پمیشکا اے ھبر ودّ اِیت ءُ ھر بنی آدم ءِ دل ءَ پہ راستی ءِ ھاتر ءَ گپ جَنگ یک ھترھے بیت۔ ریاست مرچی باندا گوں ھمے رِپک ءُ پندلاں اِنسانی ھکّانی پدجنوکاں پدکنزینگ ءِ ناکامیں کُوشستے کنت ءَ اِنت، بلے اے کارپد ھاموش بوگ ءِ بدل ءَ گیش تورناک ءُ درد بکش اِیت۔ ھمے درد دوبر زندگ بوگ ءِ سِتکین ءَ دنت۔
چوش کہ بلوچ جھدکارانی بندیگ کنگ ایوک ءَ چندے مردمانی بندیگ کنگ نہ اِنت، بلکیں اے یک سرجمیں راجے ءِ اُمیت ءُ وابانی بندیگ کنگ اِنت۔ بلوچ راج ءَ ھمے گْوش اِیت کہ تئی توار ھِچ پرک نہ کنت، تئی جست ءُُ پرس ءَ اے ملک ءِ تہ ءَ ھِچ جاہ ءَ بستار نیست۔
بلے بلوچ جھدکارانی کِسّہ ایوک ءَ لوکل ءِ جیڑھے نہ اِنت، بلکیں اے یک انسانی ھکّانی جیڑھے۔ دنیا ءِ توامیں مردم پہ ھکّ ءِ پدجَنگ ءَ آمیدگِس ءِ در ءَ ٹُکّ اَنت، پہ وتی شرپ ءُ بنی آدمی آزاتی ءِ بارو ءَ گھگیری کن اَنت۔ پمیشکا میان اُستمانی انسانی ھکّانی گلاں گپ جَنگی اِنت، چی ءَ کہ ھاموشی گوں زوارک ءَ ھمدست بوگ ءِ درور اِنت۔
چوش کہ بلوچ جھدکارانی بندیگ کنگ مروچی دردناکیں راستیاں چہ یکّے، بلے داں مھلوک ءِ دل ءَ آیانی توار زندگ اِنت اِنساپ ءِ جُھد ءُ گھگیری برجاہ مان اِیت۔ زندان ءِ ھچ دیوال راستی ءِ گپ جنوکیں توار ءَ پْروش دات نہ کنت، بلکیں زندان ءِ ھمُک درد ءُ دور باندا گْواچنیں کسّھے ٹھ اِیت ءُ منی ایردستیں راج ءَ گھگیری ءِ شون ءَ دنت۔ پمیشکا اے توار ایرموش ءُ گُٹگیر بوگ ءِ بدل ءَ زْرمبشتے بیت ءُ اے زوراکیانی تاموریں شپ ءَ گوں سُھرچکیں بامے ءَ بدل کنت، بلکیں مارا وتی جُھد ءِ بیرک یلہ دیگی نہ اِنت۔
