نبشتہ کار: کوھی بلوچ
بلوچ ھر وھد ءَ کہ وتی چماں پچ کنت گُڑا آئی چم ماں سُرمگیں کوھاں کپ اَنت، ھما کوہ کہ سرمچارانی داتگیں کُربانیاں زیبا کُتگ اَنت۔ اے تمردیں سرمچار اَنت کہ گُلامی اِش شھمات کُتگ ءُ پہ آجوئی ءَ نہ شپ چار اَنت ءُ ناکہ روچ۔ اے ھمے سرمچنڈیں سرمچارانی رِتکگیں ھون ءُ ھیدانی برورد اِنت کہ دُژمن بے سوب بوتگ، اے ھمے سرمچارانی داتگیں کُربانی اَنت کہ مرچی دُژمن وتی لوگ ءَ مجگی نادرَہ اِنت۔ اگاں مرچی اے سر مہ بوتیناں گُڑا نہ ایوک مئے زمین درمداں وتیگ کُتگ اَت، بلکیں زُبان، دود ءُ ربیدگ ءُ راجی پَجّار اُوں پامال اَت۔
مرچی یک سرمچارے ءَ وتی لوگ یک کُرتگ، وتی زاتی واھِشت کل کُرتگ، وتی مات ءُ پِت، وتی کوپگیں برات لاڑیں گْوھار یک کُرتگ، گُڑا پہ وتی راج ءُ راج ءِ باندات ءِ رکینگ ءَ، وتی ماتیں زُبان ءِ رکینگ ءَ، وتی آوکیں پدریچ ءِ رکینگ ءَ، وتی راجی پَجّار ءِ رکینگ ءَ، ءُ پہ وتی وشیں باندات ءِ رکینگ ءَ۔ ھما سرمچار داں وتی گُڈی تیر کہ جنگ کنت گُڑا آ اے نہ جیڑ اِیت منی ساہ در اَتک آ بس ھمے جیڑ ایت کہ منی مَرگ( شھیدی) ءَ چے پد منی توپک ءِ بڈّ ءَ کنوک بیت یا کہ نہ، ھما پند کہ من بُرتگ باریں اے کِشک ءَ کے کئیت اِنت ءُ منی بوج ءَ بڈّ ءَ کنت اگاں ناں۔۔۔۔۔۔۔۔۔
گُڑا ھما راج ءَ را زانگ ءُ پھمگ لوٹ اِیت کہ یک بچے پہ وتی راج ءِ رکینگ ءَ، پہ وتی ننگ ءِ رکینگ ءَ، پہ وتی شھدیں زُبان ءِ رکینگ ءَ، ءُ پہ وتی راجی پَجّار ءِ رکینگ ءَ کہ تُپنگ ءَ زور اِیت ءُ چہ لوگ ءَ درکپ اِیت گُڑا آ اے نہ چار اِیت کہ من مِراں، من کُشگ باں یا منی لوگ ماندارگ باں، آ بس وتی راج ءِ بزگی ءُ گُلامی ءَ چار اِیت کہ منی راج منی ڈول ءَ گُلام مہ بیت ءُ گوں گُلامی ءِ زند ءَ زِند مہ گوازین اِیت، منی راجی پَجّار گار مہ بیت، منی زُبان ءُ منی دود ءُ ربیدگ بہ رَک اَنت ءُ منی آوکیں پدریچ وَشھال بہ بیت۔ ءُ منی آوکیں پدریچ بانداتیگیں روچ ءَ اے مہ گْوش اِیت کہ منی راج ءَ جنگ نہ کُتگ ءُ منی زمین اِش نہ رکینتگ۔
گُڑا اے جنگ ءِ بابت ءَ جیڑگ لوٹ اِیت، پھمگ لوٹ اِیت ءُ زانگ لوٹ اِیت کہ منی گُلام کنوک کے اِنت ءُ من کئی دُمب گِپتگ ءُ سرجناں اُوں، مارا نوں وتی کوریں چم پچ کنگی اَنت ءُ چارگی اِنت کہ منی دُژمن ءُ منی دوزواہ کے اِنت، ھما کہ تُپنگے زُرتگ ءُ کوہ ءَ جنگ ءَ اِنت یا ھما کہ ریاست (پاکستان) ءِ کانُودانی منوک اِنت ءُ بلوچ ءِ چُکچینی ءَ کنگ ءَ اِنت۔ ریاست پاکستان ءِ لوٹ ھمیش اِنت کہ من بلوچ راج ءَ گُلام بہ کناں ءُ آئی ءِ مال ءُ مڈّیانی لُٹ ءُ پُل ءَ بہ کناں، گُڑا ھما راج ءَ را سما کنگی اِنت، ھما راج ءَ را پھمگی اِنت، ءُ ھما راج ءَ را زانگ لوٹ اِیت کہ من ءَ نوں اے جنگ وتیگ کنگی اِنت، ھمائی ءَ کہ اے تُپنگ وتی کوپگاں کُتگ ءُ جنگ ءَ اِنت گُڑا ھمائی ءِ بڈّ ءِ بار سُبک کنگی ءُ وتی کوپگاں کنگی اِنت۔
اگاں ما وتی کوریں چماں پچ نہ کناں ءُ بہ چاریں گُڑا مرچی دُرس پدر اَنت، اگاں ما دُژمن ءَ ءُ دُژمن ءِ کُرتگیں زوراکیاں بہ چاریں گُڑا مارا سما بیت کہ منی راج ءِ گوم ءَ زوراک ءَ چینچو زوراکی کُتگ ءُ انگت آئی ءِ زوراکی بَرجاہ اَنت، مرچی ریاست اَنچو زوراک بوتگ کہ مئے مات ءُ گْوھاراں اُوں جنگ ءَ ءُ آیاں زِندانی کنگ اِنت، آیاں کم شرپ کنگ ءَ اِنت ءُ آیاں وتی تھاریں کوٹیاں بندیگ کنگ ءَ اِنت۔ وھدے کہ دُژمن پدر بیت یا دُژمن وت ءَ را پدر کنت گُڑا ھما راج کہ گُلام کنگ بوتگ گُڑا آئی ءَ را وتی رھشونانی ھَمراھداری کنگی اِنت، ھمائی ءِ ھمراہ بوگی اِنت کہ آئی ءِ اے جنگ وتی کوپگاں کُتگ، ھمائی ءِ درد وتیگ کنگی اَنت کہ آئی ءَ وتی زاتی زندگی پہ گُلیں راج ءَ کُربان کُتگ ءُ جنگ ءَ اِنت۔
گُڑا پَشت کپتگیں ھبر ھمیش اِنت کہ اے جنگ وتیگ کنگی ءُ جنگ کنگی اِنت، زوراک ءِ زوراکی سرجمیں جھان ءَ پدر کنگی اَنت، ھمائی ءِ ھَمراھداری کنگی اِنت کہ آئی ءَ اے جنگ وتی کُتگ ءُ جنگ ءَ اِنت۔ ھما راج گُلام کنگ بیت کہ آئی ءَ را زُبان، زَمین، دود ءُ ربیدگ ءُ راجی پَجّار نیست، بلے بلوچ راج ءَ دُرس ھست اَنت گُڑا بلوچ راج ءِ گُلام کنگ نہ بیت، چی ءَ کہ بلوچ راج ءَ بِھ گُلامی نہ منّ اِتگ، بلوچ راج ءَ پہ گُلامی ءَ مُدام جنگ کُتگ ءُ زوراک ءِ دیم ءَ چو کوہ ءَ مِک بوتگ۔
گُڈی ءَ بس ھمے گْوش آں کہ وتی شھیدیں بلوچ پُسّگانی ھونانی گوم ءَ دگا مہ کن اِت، چی ءَ کہ آئی ءَ وتی جان پہ تئی باندات ءَ کُربان کُتگ، آئی ءَ وتی واب پہ تئی راجی پَجّار ءِ رکینگ ءَ بُرتگ، آئی وتی لوگ پہ تئی وشیں باندات ءَ یل کُتگ، آئی وتی جان پہ تئی ننگ ءِ رکینگ ءَ نَدْر کُتگ، آئی وتی زند ءِ دراھیں واھِشت پہ تئی ھاتِر ءَ کُربان کُتگ اَنت، ءُ آئی ءَ وتی ھون پہ تئی آوکیں باندات ءَ ءُ پہ وتی سرڈگار ءِ رکینگ ءَ رِتکگ اَنت۔ گُڑا اے منی ءُ تئی راجی پرز ءُ زمہ واری بیت کہ ھمائی ءِ رازداری ءَ بہ کنیں، آئی ءِ اے گرانیں بار وتی کوپگاں کنگی ءُ دیم ءَ جُنزگی اِنت۔ اے ھبر ءَ مُدام وتی مَجگ ءَ بہ کن کہ آجو ھما راج بیت کہ آئی وتی راجی رَھشون وتیگ کُتگ اَنت ءُ آ راج کدی آجو نہ بیت کہ آئی ءَ وتی رَھشونانی گوم ءَ دَگا کُتگ۔
