جنگولیں ساجد

   نبشتہ کار: ترانگ کولواھی

ساجد جان تو سکا مھروان، تئی مھر ءِ گپ ءُ کسہ سک باز اَنت۔ مئے وڑیں بنی آدم ءِ کرّ ءَ آ لبز ءُ دانک نیات اَنت کہ تئی وڑیں مِھروان ءُ دلپھکیں جنگولے ءِ توسیپ ءَ بہ کن آں۔ ساجد جان من ءَ انگت یات بیت کہ من ءُ تو ھال ءُ اِھوال کُت، ساجد جان ترا یات بیت اِنت من ترا جُست کُت کہ ترا پہ میتگ ءِ پیر ءُ کماشانی دیوان ءُ مجلسانی واستا زھیر نہ کنت؟ گڑا ساجد جان تو پَسو دات ءُ گْوشت کہ من ءَ برے برے پیر ءُ کماشانی سر شپ ءِ زِگر ءَ یات کئیت اِنت۔

ھمے وڑ ءَ منی ھال ءُ اِھوال تاں دیر ءَ بوت گوں ساجد جان ءَ، اَنچو وھد جُنزان اَت، تئی ھال ءُ اِھوال گار بوت اَنت ءُ تاں 6 ماہ ءَ منی گوں ترا ھال ءُ اِھوال نہ بوت، گڑا من سک پَریشان بوت آں ءُ ھچ وش نہ اَت۔

 ساجد جان اے وھد ءَ کہ تئی ھال ءُ اِھوال گار بوت، گڑا منی دل ءَ نہ گْوشت کہ گوانکو ءَ کارمَرز بہ کن آں، ساجد جان من ءَ ھچ  وش نیاتک۔ من اِد ءُ آؤد ءَ تئی جُست کُت، سنگتانی کرّ ءَ ھال کُت کہ مِھروانیں ساجد جان ءِ ھالاں بہ دے وش ءُ جوڑ  اِنت، نیٹورک ءَ نہ اِنت؟ سنگت ءَ پسّو دات کہ ساجد جان گوں رستریں لشکر ءَ ڈیک وارتگے ءُ جنگ کُرتگ ئِے۔ اے جنگ ءَ وتی آدگہ سنگتے کش اِتگ اَنت ءُ شھمیر جان شھید ءُ ساجد جان ٹپّی  بوتگ۔

اے ناوشیں ھبر کہ گُوشاں کپت دل ءَ دردے چِست بوت، بلے دومی نیمگ ءَ وشی اے واستا بوت کہ دُژمن ھم مُردار بوتگ۔ وھدے ساجد جان ءَ گوں ھال اھوال بوت، چہ ھال ءَ پد من گیگ ءُ گْوم بوت آں۔ چی ءَ کہ اے آجوئی ءِ جنگ اِنت، پمیشکا وتی دل ءَ مزن بہ کن اِت۔ اَنچو وھد روان اَت، یک روچے من ءَ نوکیں نمبرے ءَ ھال کُت، من ءَ انگت یات اِنت کہ وھد  2021\8\10  ءُ ساھت دو بج ءُ نیم اَت۔ گڑا من گْوشت کہ من ترا زانَگ ءَ نہ آں جگر! تو پسّو دات ءُ گْوشت ”من ساجد ءَ آں“، بلے من ءَ یَکین نہ بوت ءُ من پد ءَ جُست کُت  پُل من ترا نہ زان آں تو کُجام ساجد ئے؟ گڑا تو کندگے جت ءُ گْوشت من ساجد ءُ مھمود ءِ زھگ آں، وھد کہ ساجد جان تو کند اِت گڑا من زانت ءُ تَواربندے روان دات ءُ گْوشت ساجد جان بہ بکش  من ترا نہ زانتگ۔ ساجد جان ءَ پسّو دات ” اِنّا جگر! ھچ مسلہ نہ ِنت، جو بیت اِنت۔“

 گڑا ھمے وھد ءَ ساجد جان ءَ ویڈیو کال کُت، بلے من ویڈیو کال کٹ کُت ءُ تَواربندے روان دات ءُ گْوشت کہ ویڈیو کال مہ کن منی کرّ ءَ مردم  سک باز اَنت۔ ساجد جان ءَ تواربندے روان دات کہ تو برو دگہ گِس ءَ من ءُ تو گپ کنیں۔ مِھروانیں ساجد ءِماے گپ ءَ پد من ءُ منی سنگت دگہ گِسے ءَ شُتیں گوں ساجد جان ءَ ویڈیو کال کُت۔ وھدے ساجد جان من ءَ دیست، گُڑا من ءَ گْوشت ئِے کہ تو سک مزن بوتگ ئِے جگر۔ من ءَ انگت یات بیت کہ گپ گپ ءِ تہ ءَ من ساجد ءَ گْوشت کہ تو وتی کندگے روان بہ دے کہ من ءَ پہ تئی کندگاں سک زھیرے کُتگ۔ گڑا ساجد جان ءَ پسو دات کہ ”کندگ نہ بیت ءُ منی نادْراھی انگت وش وش نہ اِنت۔“

ھمے وڑ ءَ منی ءُ ساجد جان ءِ ھال ءُ اِھوال وٹسپ ءَ برجاہ اَت، گڑا من ءَ انگت یات بیت کہ 2022\6\19 ساھت پَنچ بج ءَ سنگتے ءَ من ءَ ھال کُت ءُ گْوشت ”مَروچی ساجد جان گوں ھمبلان درکپتگ ءُ پروم ءَ جڑپے ءَ کپتگ اَنت، بلے لھتیں سنگت ھم شھید بوتگ۔“ گوں اے ھبر ءِ اتش کنگ ءَ من سنگت ءَ را گْوشت اڑے مزاک مکن، گُڑا ھمے ساھت ءَ من کسے ءَ را گْوشت منی گوانکو ءِ واستا پیکیجے روان بہ دے، وھدے کہ سنگت ءَ منی پیکیج روان دات گڑا من پیس بُک ءَ  دیست کہ ساجد جان، بالی جان، تاھیر جان، ھمل جان ءُ دِگہ دو سنگت شھید کنگ بوتگ۔

ھمد ءَ پہ ناگتی منی زُبان ءَ چہ در اتک ساجد جان  تو چی ءَ چو  اِشتاپی کُت ءُ مارا یل دات! تئی روگ ءَ مارا ابیتک کُتگ، ساجد جان شُما کَمو وَدار کُتیں کہ کندُل جان ءُ یلان جان مزن بوت اَنت۔ ساجد جان من گْوشاں کہ تئہ گوں مِھروانیں ھمبلاں جاگہ باگ ءُ بھشت ءَ بات۔