جنگ ءُ درد ءِ کسہ

نبشتہ کار: کمبر بلوچ

جنرل مشرپ ءِ زوراکیانی بنداتی زمانگ اَت ءُ بلوچ جنز ءَ مھکم بوگ ءَ چہ دارگ ءِ ھاتر ءَ ماں شال ءِ سارتیں شپے ءَ نواب ھیر بکش دزگیر (اگاں نواب ءَ گھگیری کُت گڑا پاکستان آئی کُشگ ءَ ساجو اَت) کنگ بوت ءُ نیو کاھان ءَ ھیر بکش مری ءِ پگری ءُ گلی (تنظیمی) سنگت دزگیر کنگ بوت اَنت۔ زندانی بوگ ءِ وھداں سرکار گوں ھیر بکش مری ءَ ماں کاھان ءَ تیل ءُ گیس کشگ ءِ ھاتر ءَ سُھل ءُ تْران (مزاکرات) کنگ ءِ جھد کنت، بلے آ زورگر ءِ اے لُٹ ءُ پُل ءِ شوربندی ءَ نہ منّ اِیت ءُ بیست ءُ یکمی کرن ءِ بام پہ نوکیں اُمیتے ٹِک دنت۔

بلوچ جنز ءِ سر چست کنگ ءَ ھوار استان ءَ جنز ءِ بگیری ءَ رَد آشوبی شوربندی ھم ٹھینت اَنت ءُ نورا مری اولی مردم اَت کہ زورآنسری آوار جَنگ بوت۔ پوجی کیمپانی جوڑ کنگ ءِ مزنیں دْرچے تیوگیں بلوچستان ءَ بندات بوت، ڈیرہ بگٹی ءُ کاھان پاکستانی پوج ءِ زوراکی ءِ زد ءَ اِت اَنت ءُ اُود ءَ ھزارانی کساس ءَ مھلوک زورانسری بیگواھی ءُ اِستانی زُلم ءُ زوراکیانی آماچ بوت اَنت۔

مزن نامیں رھشون نواب اکبر ھان بُگٹی (اکبر خان بگٹی) ءُ بالاچ ھان مری (بالاچ خان مری) ءِ شھیدی ءَ جنز ءَ را نوکیں ساھے بکشات، آجوئی ءِ پگر ءُ سسّا سرجمیں بلوچستان ءَ سر کُت۔ بلوچ جُنز ءِ زور ءِ پروشگ ءُ آئی ءَ نزور کنگ ءِ جھد ءَ زورانسری آورجنی ءِ اَمَل اِستان ءَ سلاھے ءِ وڑ ءَ کارمرزگ بندات کُت، دو ھزار ھشت ءَ پد پیپلز پارٹی ءِ دؤر ءَ ژانگولیں جونانی ماں دگؔانی، کوہ ءُ گیابانی تہ ءَ کپگ ءِ بے آسریں دْرچے بندات بوت۔

استان ءِ جنز ءِ ھلاپ ءُ بگیری ءَ بلوچ ءِ یک سرجمیں پدریچے چہ درانڈیھی ءَ آشنا کُت، سیاست ءِ سر ءَ جار ء بادشاھی ءُ ابید ءِ جار پِرّینتگیں بندشاں بلوچستان ءَ سیاست ءِ دراھیں در بند کُت اَنت ءُ کوہ آباد کُت اَنت۔
ماں بلوچستان ءَ ھمے دوئیں دھکاں ھزاراں مردم زورانسری آوار جَنگ بوت ءُ آیانی ژانگولیں جون دست کپت اَنت۔ بلوچ جنز ءِ بگیری ءُ آئی ھلاسی ءِ جھد ءَ پاکستان ءَ بلوچ ءِ ھلاپ ءَ زُلم ءُ زوراکی ءِ دراھیں وسیلگ کارمرز اِت اَنت، اے زُلم ءُ زوراکیاں بلوچ گلزمین ءِ تہ ءَ انسانی اندوھے رودینت، زوراکی ءِ شکم ءَ چہ ھزاراں کسّھاں سر چست کُت ءُ بلوچستان ءِ دراھیں تَبک سانمند کُت اَنت۔

دو دھک گوشگ ءَ بہ گندئے تھنا دو کسانیں گالبند اَنت، بلے یک زھگے، براتے، ماتے ءُ گْوھارے ءِ پہ وتی دوستیں مردمانی یک ساھتے ءِ گندوکے ءَ دو دھکاں وداریگ بوگ ازابے ءَ چہ کمتر نہ اِنت۔ بلوچستان ءِ تہ ءَ ھزاراں مات ءُ گوھار درد ءُ اندوھانی گْرانیں ودار ءِ نوبتاں چہ گوزگ ءَ اَنت کہ آیاں لبزانی تہ ءَ درشانگ ءِ ساھت ءَ نبشتہ کار ھم چہ ھوش ءُ اِنان ءَ در کئیت کہ آ وت ھم ھمے کسّھانی بھر اَنت ءُ بلوچستان ءِ وڑیں مزنیں (کینوسے) ءَ پیداک بوگ ءَ اَنت۔

یک مردمے ءِ زورانسری آوارجنی تیوگیں کھولے ءُ چاگردے ءَ پہ مچؔانکی درد ءُ دورے ءِ سبب جوڑ بیت ءُ جنگ آماچیں بلوچستان ءِ مھلوک ءِ اندوھاں ھما مردم پھم اِت کنت کہ وت ھمے گماں چہ آشنا اِنت۔ بلوچستان زوراکی ءُ نااِنساپی ءِ داستاناں چہ پُر ءُ چَکار اِنت ءُ استانی زوءِاکی ءِ سبب ءَ سدانی کساس ءَ مردمانی زند زھرشانی ءُ پریس کلبانی دیم ءَ گوزگ ءَ اِنت۔

بلوچ گلزمین ءِ ھما کماشاں کہ وتی زند ءِ گُڈسری روچ وتی ورنائیں بچّانی کُمک ءَ گوں ایمنی ءَ گْوازنگی اَنت بلے آیاں وتی کماشیں کوپگاں بچّانی آجوئی ءِ بار زرتگ ءُ زھرشانی کنگ ءَ اَنت، ءُ ھما بچاں کہ وتی کسانی ءِ وشیں ساھت پت ءِ ساھگ ءَ گڈوازنگی اِنت، بلے آیانی زند وتی کماشانی آجوئی ءِ جھد ءَ توار چست کنگ ءَ گْوزگ ءَ اِنت۔
بلوچ ڈیھ ءِ مانائیں جنکاں شاھدربرجاہ ءُ مزن شاھدربرجاھاں کانود (کانون) ءُ سیاست ءِ کلاساں لینن ءُ جھانی سیاست ءِ سر ءَ باوست کنگی اِنت، بلے آیانی گیشیں وھد وتی نازاکیں براتانی آجوئی ءِ جھد ءَ آمیدگِس (عدالت) ءُ کمیشنانی روگ ءُ آھگ ءَ زِیان بْوان اِنت۔ بلوچ ماتانی زند دو دھک اِنت زورانسری بیگواھیں بچّانی ودار ءِ گْرانیں ساھتاں کساس کنگ ءَ گْوزگ اِنت ءُ ھما بے آسریں ودار کہ کرنانی کید ءَ بندوک اِنت۔

بلوچستان نامیں مزنیں (کینوس ) ءَ زوراکی ءِ آس ءَ ھزارانی کساس ءَ سُتکگیں مردمانی کسّہ ھست اَنت کہ آ پہ وانوک ءُ گوشداروکاں راھچار اَنت، اے (کینوس) ءِ ھزاراں کسّھانی تہ ءَ تھنا ھما کسّہ ترا داں سر بیتگ اَنت کہ آیاناں کیمرہ ءِ چمّاں گپتگ ءُ رسانکدر ءَ رست اِش کتگ یا کسّہ گوشے ءَ نبشتھی دْروشمے ءَ دیم ءَ آؤرتگ اَنت۔ بلوچستان ءَ دگہ چوشیں ھزاراں کسّہ ھست کہ آیاں انگہ زبان دیگ نہ بیتگ۔
زورانسری بیگواھیں مردمانی کسّھاں نبشتہ کنگ ءِ جُرم ءَ بازیں نبشتہ کار وت کسّہ جوڑ بیتگ اَنت، ءُ اے کسّھانی جھانی رسانکدر ءَ رسینگ ءِ جھد ءَ ساجد ھسین وت ھم کسّھے جوڑ بوت ءُ ھمے داستان ءِ بھر بوت۔

ماں چِلی ءَ پنوشے ءِ زورانسری ءِ زُلم ءُ زوراکی بہ بنت ، کینیا ءَ “ماؤ ماؤ” جنز ءِ ھلاس کنگ ءَ پہ بے کساسیں زوراکی ءِ کسّہ بہ بنت یا بلوچ زمین ءِ سر ءَ پیداک بیوکیں درداں چہ چَکاریں کسّہ، زورگر ءُ زوراک ءِ ھلاپ ءَ جھد کنوکیں راجانی اندوھانی رنگ ءُ چھر یک اَنت۔

یوراگوئے ءِ کارمستر (صدر) (2015-2010 ) “جوس موجیکا” نوزدہ سد ھپتاد ءِ دھک ءَ یوراگوئے ءِ زورانسری ءِ زمانگ ءَ دوازدہ سال زندانی کنگ بیت ءُ بلوچانی ھم سدانی کساس ءَ “جوس موجیکا” دو دھکاں چہ پاکستان ءِ زندانانی تہ ءَ تھکشیں دردانی ھزاباں سگگ ءَ اَنت۔

ارجنٹینا ءِ تہ ءَ زوراک ءِ زوراکیانی آماچ بیتگیں زھگانی مات وتی زھگانی ھاتر ءَ “ بیونس آئرس” ءِ دگؔانی تواب ءَ کن اَنت ءُ بلوچ مات پہ وتی زھگانی آجوئی ءَ بلوچستان ءَ زورگریں بنجاھانی تواب ءَ کنگ ءَ اَنت ءُ اُمر ریوابیلا ءِ کسّہ بلوچستان ءَ ساہ کشگ ءَ اِنت۔

دو ھزار ھشت ءَ سری لنکا ءَ تامل ٹائیگرزانی جنز ءِ ھاموش کنگ ءِ جھد ءَ “جافنا “ جنگ آماچ کُت ءُ ھزاراں تامل زورانسری آوارجنی ءِ آماچ بوت ءُ ساھداریں ارواھانی جاہ ءَ بے ساھیں کسّھاں جاہ کُت۔ جافنا ءِ تاملانی بے زبانیں کسّہ بہ بنت، ارجنٹینا ءِ ماتانی اندوہ یا بلوچستان ءِ راھچاریں مات، درد ءُ دورانی کسہ یک اَنت۔

ھاپز سئید (حافظ سعید) ءِ زورانسری بیگواھی ءَ بیست سال سرجم اِنت، آئی ءِ کھول استان ءِ بے سریں گپاں چہ ایمن نہ بوت گڑا پولیس ءَ بے نامیں کبرے کش اِت ءُ آئی کماش “ اللہ بکش بنگزئی “ ءَ را پیش داشت، بلے آ دو دھک ءَ پد ھم باور کنگ ءَ جاڑیگ نہ اِنت کہ کبر آئی زھگ ئیگ اِنت۔

پاروک (فاروق) ءِ مات وتی زند ءِ گُڈسری روچاں وتی بچّ ءِ آجوئی ءِ راھاں چار اِیت، بلے آ وتی زند ءَ دوبر وتی بچّ ءَ دیدار کُت نہ کنت ءُ کوڑھیں امروز ءَ یل دنت ءُ نوں آئی جاہ ءَ نماسگ ءَ وتی کماش ءِ آجوئی ءِ بار کوپگاں زرت۔

ڈاکٹر اکبر مری ءِ بچّ بلوچستان مزن شاھدربرجاہ ءِ پائن آرٹس ڈیپارٹمنٹ ءِ بے رنگیں دراں گوں رنگی ئیں دْروشماں سنگار اِیت، بلے پانزدہ سال اِنت کہ آئی زند چہ رنگاں زبھر ءُ پہ آئی کماش ءَ کوھنیں تابوت ءَ سویت یونین ءِ چاپ بوتگیں سُھریں آشوب ءَ گوں بندوکیں کتاباں چہ ابید دگہ ھچ پشت نہ کپتگ۔

اَلی ھیدر ، انیسہ ، سمی ءُ مھلب دین ءِ کسانی پریس کلبانی دیم ءَ گوں زھرشانیاں گْوست، ھمے جھد ءِ تہ ءَ رُست ءُ مزن بوت اَنت، بلے آیانی آریپیں پتانی گْرانیں ودار آسر نہ بوت ءُ انگہ آیانی ودار ءِ نوبتاں پہ یک دید ءُ بچکندگے ءَ نشتگ اَنت۔

اے دو دھکانی رَد آشوبی شوربندی نہ تھنا زورانسری بیگواھی ءِ ھد ءَ بندوک اِنت، بلکیں ژانگولیں جون، مُچانکی کبر، ماں ویرانگاں دور داتگیں جون، پولیس ءِ دست ءَ زورانسری بیگواھیں مردمانی دروگیں میڑاں جَنگ بوتگیں ناشناسیں جون ھوار اَنت۔

اپریل دو ھزار نوہ ءَ مرگاپ ءَ چہ چئیرمین گلام مھمد، شیر مھمد ءُ لالا منیر ءِ ژانگولیں جونانی دور دیگ ءَ چہ پد استان ءِ (kill and dump) نوکیں شوربندی بندات بیت ءُ ھما اِنت اے شوربندی وتی دْروشماں مٹّ کنان ءَ جُنزان انت۔

ماں اُوتّل ءَ رسول بکش مینگل ءِ جون گوں دْرچکے ءَ بندوک بیت کہ آئی جسد ءِ سر ءَ بوٹ ءُ سگریٹاں گوں داگ داتگیں ریمانی نشان پر بنت۔
انسان ءِ کُشگ ءَ پہ یک تیرے بس اِنت، بلے سنگت سنا ءِ جزم ءِ پْروشگ ءَ بے سوب بوگ ءِ سبب ءَ پاکستان آئی جبین ءِ سر ءَ بیست ءُ ھشت تیر سرد کنت دانکہ بلوچستان ءَ وتی تُرس ءُ بیمّ ءِ ھاکمی ءَ برجاہ بہ داراں۔
ھمے رنگ ءَ چہ بازیں لَٹ ءُ کُٹ ءَ رسول جان ءِ جسد ءِ دراھیں ھڈؔ پْرشتگ اِت اَنت، زندان ءِ تہ ءَ زورانسری بیگواھیں مردمانی جِسد ڈرل کنگ بوت اَنت ءُ آیانی جبین ءِ سر ءَ گوں تیزیں ازباباں پاکستان ءِ ھک ءَ اوگام نبشتہ کنگ بوت۔

اے زمانگ ءَ چوشیں روچے نہ گوست وھدے بلوچستان ءُ کراچی ءَ چہ زورانسری بیگواھیں مردمانی ژانگولیں جون ماں سرجانی، ھب، گڈانی، وندر ءُ مرگاپ ءَ دست نہ کپت اَنت۔
توتک ءِ سبز ءُ آبادیں ڈگارانی تہ ءَ کشت ءُ کِشاری ءِ جاہ ءَ مُچؔانکی کبرانی تہ ءَ زورآنسری بیگواھیں مردمانی جون کل کنگ بوت اَنت کہ آیانی پجّار روچ ء مروچی نہ بیتگ۔

دشت ءِ مِلکیں زمین کہ اُود ءَ ابرم ءِ درشان گوں گواڑگ ءِ زیبداریں پُلانی دْروشم ءَ بیت، بلے مروچی بلوچ ءِ بے نامیں جونانی کبرستانے آباد اِنت کہ آیانی پجّار گوں ناماں نہ بیت بلکیں نمبراں چہ بیت۔
پاکستانی استان ءِ رَد آشوبی شوربندیانی شِکم ءَ چہ پیداک بیتگیں زوراکیانی ھلاپ ءَ زھرشانیانی مھکم ءُ مزنیں جنز پاد اتکگ اَنت۔

بلوچستان ءَ سیاسی گھگیری ءِ بندات چہ ھُزدار ءَ ڈاکٹر اللہ نذر ءُ آئی سنگتانی زورانسری آوارجنی ءِ ھلاپ ءَ لانگ مارچے ءِ دْروشم ءَ بوت۔ شھید رسول بکش مینگل ءِ سروکی ءَ گپّار ساسولی، رھیم جتک ءَ ھوار شھید گلام ءَ آیانی آجوئی ءِ ھاتر ءَ اکتوبر دو ھزار پنچ ءَ چہ ھزدار ءَ بہ گر داں کراچی ءَ لانگ مارچے کش اِت۔ بانک کریمہ ءِ سروکی ءَ بلوچ زالبوانی اولی مارچ ڈاکٹر ھنیپ شریپ ءِ آجوئی ءِ ھاتر ءَ تمپ ءَ چہ تربت شھر ءَ کشگ بوت۔

نسر اللہ بلوچ، ماما کدیر ءُ پرزانہ مجید ءِ سروکی ءَ “وائس پار بلوچ مسنگ پرسن “ ءِ جوڑھِشت ٹھینگ بوت کہ آئی مول ءُ مراد مُچؔانکی جھدے ءِ وسیلگ ءَ وتی کس ءُ وارساں آجو کنائینگ اِنت، اے زورانسری بیگواھیں ھاندانانی ھاتر ءَ نوکیں بامے ءُ اُمیتے ءِ کردار ءَ پیلو کنت، زوراکی ءِ ھلاپ ءَ گھگیری ءُ جھد ءَ زندگ دار اِیت۔

بلوچ نودربر گل آزاد ءِ وائس چیئرمین زاکر مجید ءِ آجوئی ءِ جھد ءَ گَل ءَ سول نافرمانی ءِ ترز ءِ پرتشددیں زھرشانی ءِ راہ ھم کارمرز کتگ۔ بلوچستان ءَ زُلم ءُ زوراکی ءُ زورانسری بیگواھیں مردمانی آجوئی ءِ جھد ءَ ماما کدیر ، سمی دین ءُ پرزانہ مجید ءِ سروکی ءَ زورگر ءِ بُنجاہ ءُ ماں جھان ءَ وتی توار ءِ سر کنگ ءَ دو ھزار سینزدہ/ چاردہ ءَ شال ءَ بہ گر کراچی، کراچی ءَ بہ گر داں اسلام آباد ءَ دو ھزار کلومیٹر ءِ دراجیں لانگ مارچے کش اِت۔

چیئرمین زاھد ءِ آجوئی ءِ ھاتر ءَ بی ایس او آزاد ءَ تا مرگ شد ھڑتال ءِ راہ گچین کُت ءُ لتیپ جوھر چل روچ ءَ داں شد ھڑتال ءَ نند اِیت ءُ اے اَمَل ءَ استان باور کنگ ءَ لاچار کُت کہ زورانسری آوارجنی چنکسیں سنگینیں جیڑھے ءُ اے اولی رند اَت کہ انتزامی بلوچستان ءِ مزن وزیر ڈاکٹر مالک ءَ زھرشانی کیمپ ءِ دورہ کُت آئی ءَ زورانسری آوارجنی بلوچستان ءِ مزنیں جیڑھے گوشت، اِشی ءَ چہ پد زورانسری بیگواھیں مردمانی نام ءَ پارلیمانی پارٹیاں وتی گیمرتگیں سیاست ءَ زندگ دارگ ءِ جھد کُت، بلے چوش کہ زورانسری آوارجنی ءِ بُنیات بلوچ جھد ء آجوئی ءَ ھلاس کنگ ءِ نیّت ءَ ایر بیتگ پمے ھاتر ءَ مدام دروگیں تسلھاں چہ ابید اے جیڑہ دو دھک اِنت کہ برجاہ اِنت۔

اے دوئیں دھکانی تہ ءَ زھرشانیانی مزنیں توارے ماں بلوچستان ءِ کنڈ کنڈ ءَ اِش کنگ بیتگ، پریس کلب، ریڈ زون ءُ دگؔانی سر ءَ نندانک برجاہ بیتگ اَنت، ماما کدیر ءِ زھرشانی کیمپ پنچ ھزار روچ اِنت اُمیتانی بنجاہ اِنت۔ سلاہ بندیں جنز ءَ ھم سر چست کت، بلے استان ءَ وتی ناروائیں زوراکیانی شوربندی یلہ نہ دات اَنت۔ استان ءِ مول ءُ مراد بلوچ جھد ء آجوئی ءَ لپاشگ ءُ ھلاس کنگ اِنت، پمے ھاتر ءَ آ وتی زوراکیاں نہ دار اِیت، زورانسری بیگواھی ءُ زوراکی ءِ دْرچ برجاہ اَت، ژانگولیں جونانی جاہ پولیس ءِ دروگیں میڑاں گپت ءُ زور بیگواھیں مردمانی دست ءُ پاداں بندگ آیاں گاڑی ءَ کنگ ءُ گوں بمباں تْراکینگ استانی زوراکی ءِ یکشلیں ناروائی اَنت کہ برجاہ اَنت۔

بلوچ جنز ءَ گوں بندوکیں مردمانی کھول مُچانکی سزا ءِ دیمپان کنگ بوت اَنت ءُ زورانسری بیگواھی ءِ ھلاپ ءَ جھد کنوکیں زالبولانی دیم ءِ دارگ ءَ پہ آیاناں ھم بکشگ نہ بوت اَنت ءُ آ ھم آوارجنگ بوت اَنت، سیاسی جنز ءَ ھواریں مردمانی سر ءَ زوراکی ءِ دِرچ یکشل ءَ برجاہ اِنت۔

استان ءِ رَد آشوبی شوربندیاں چہ گیش ءَ گیش سانمند بلوچ زالبول بوت اَنت، مُچؔانکی سزا ءِ آماچ بوت اَنت، استانی بیڑاں کم شرپ کت اَنت، لوگ ماندارگ بوت اَنت، گِسانی یکیں کوپگ آوارجَنگ بوت اَنت، ءُ وتی زمین ءَ کوڑاچھیں زندے ءِ گْوازینگ ءَ لاچار کنگ بوت اَنت۔

بلوچ ءِ جنگ آماچیں چاگرد ءَ بازیں چوشیں زالبول ھست اِنت کہ آ انگت سرپد نیاں کہ آیانی لوگواجہ زندگ اَنت اگاں مرتگ اَنت۔
کماشانی ساھگاں چہ زبھر کتگیں زھگاں سرپدی نیست کہ آیانی کماش انگت زورانسری بیگواہ اَنت یا ناشناسیں کبرے ءِ میار کنگ بیتگ اَنت۔
ودار ءِ گْرانیں ساھتاں گوں دُچاریں ماتاں سرپدی نیست کہ آیانی زھگ زندگ اَنت اگاں ماں گیابانے ءَ آیانی جون چگل دیگ بیتگ اَنت۔

ھپتاد ءِ دھک ءِ زوراکیانی کسّہ ماں بلوچستان ءِ تلاریں کوھانی تہ ءَ ھاموش کنگ بوت اَنت، بلے بیست ءُ یکمی کرن ءِ بلوچ جنز وتی کارستانی ابدمان کنگ ءَ یکشلیں جھدے کنگ اِنت۔ اے زمانگ ءِ سیاسی چِست ءُ ایراں زورگر ءِ زُلم ءُ زوراکی ءِ سِکیں دیوار دور داتگ اَنت ءُ بلوچ ورنا سنگت سنا ءِ دْروشم ءَ بیست ءُ ھشت تیر وتی سینگ ءَ سرد کنگ ءَ جاڑیگ اَنت، بلے استانی زوراکیانی دیم ءَ پُشت کِنز نہ بنت۔

بلوچ یکجھتی کمیٹی ءَ بلوچ راج یک مھکمیں ءُ توانائیں گھگیری یے ءَ گوں یکجا کت، بلے چوش کہ زورگر ءِ مدام مول ءُ مراد جھد ء آجوئی ءِ راہ ءِ دیم ءَ اڑاند جوڑ کنگ اِنت، پمے ھاتر ءَ استان وتی یکشلیں ناروائیں زوراکیاں ھلاس کنگ ءَ جاڑیگ نہ اِنت تاں ھما وھد ءَ بلوچ گلزمین ءَ گلامی ءِ لُنجیں شپ سائیل اِنت زوراکیانی دْرچ برجاہ مان اِیت۔

داں آجوئی ءِ بام ٹِکؔ بہ دنت بلوچ راج ءِ لائیکیں ءُ زانتکاریں سر زورانسری بیگواھی ءِ آماچ بنت، جنز ءِ یکشلیں دْرچ ءِ دارگ ءِ جھد ءَ ژانگولیں جون ءُ ناشناسیں کبرستانانی لڑ ءَ گیشی آیان بیت ءُ کردار مٹّ بیان بنت، بلے بلوچ جنز برجاہ مان اِیت۔ آجوئی ءِ بیرکداریں سنگت دِگہ بنت، نام ءُ کردار مٹّ بنت، بلے بلوچ راجی آجوئی ءِ کاروان جُنزان کنت۔