نبشتہ کار: مھرُل مھر
اگاں گال ءِ بلوچ جنک چارگ ءُ اِش کنگ بہ بیت گڑا مارا بلوچ راج ءِ ھما شیرزالیں جنک یات کاینت کہ آ جنگ، سیاست ءُ لبزانک ءِ پڑ ءَ گوں وتی ھمکوپگیں براتاں جنزان اَنت۔ ھما کہ تبد ءُ لوار یاکہ کھریں زمستان ءَ پہ وتی گاریں براتانی شوھاز ءَ در پہ در اَنت، مارا ھما جنک دیم ءَ کاینت۔ بلے مئے بلوچ راج ءِ تہ ءَ لھتیں انچیں جنک ھم ھست کہ آ چاگرد ءِ سِلکاریانی آماچ اَنت، ھستیں دور ءِ آسراتیاں منی راج ءِ بانکیں جنک وتی ھرجان جتگ اَنت۔
منی راج ءِ منگھیں بانک گوں سوشل ءَ میڈیا ءَ انچوش ھمگرنچ اَنت کہ آیاں ناں وتی زبان، ناں زمین، ناں بلوچیت ءُ نیکہ وتی دود ءُ ربیدگ گندگ ءَ کئیت۔ آ اینچو اوں نہ زان اَنت کہ ما بلوچ اِین ءُ پہ بلوچ جنکاں چوشیں بے سریں سُبلّی یک ایبے نہ، بلکیں یک مزنیں گناھے لیکگ بی۔ بلے مرچی بیست ءُ یکمی کرن ءِ جنک وھدیکہ دو تبک وان اَنت آ وت ءَ آجو ھیالیں مردم پھم اَنت ءُ چاگرد ءِ سلکاریانی آماچ اَنت۔ اگاں ما بلوچ ءِ راجدپتر ءَ بہ وانین ءُ وتی اھدی دور ءِ جنین آدماں گوں مرچیگیں جنین آدماں دیم پہ دیم بہ کن اِیں گڑا آیانی نیام ءَ مارا بلاھیں پرکے گندگ ءَ کئیت اِنت۔ آیانی لج ءُ مڑاہ انچوش بوتگ کہ ھچ کس ءَ آیانی پد اوں نہ دیستگ اَنت بلے اگاں مرچیگیں دور ءَ لھتیں انچیں جنک چارگ بہ بیت کہ آیاں وتی دودمان شموشتگ ءُ شھدیں زبان ھم بدل کتگ ءُ سوشل میڈیا ءَ وتی کارپد اِش پدّر اِش کتگ اَنت۔ بلے بژن پہ ھما برات ءُ پِتاں کہ آ وتی جنکیں زھگاں چوش آجو کن اَنت۔
اے گپ راستے کہ تالیم انسان ءَ بدل کنت، انسان ءِ ھیال ءَ بدل کنت، آئی ءَ جیڑگ پرمائیت، آئی ءَ پہ دیمرئی ءَ سکین ءَ دنت، آئی ءَ زبان ءُ راج ءِ بابت ءَ جیڑگ ءَ پرمائیت، بلے اے تالیم ءَ ھما جاگہ ءَ ما لانت گوش اِیں کہ اود ءَ بلوچ جنک وتی دود ءُ ربیدگ ءَ لگتمال ءُ سلکاری ءِ آماچ بہ بنت۔ بلوچ آجوئیں راجے نہ اِنت، بلے پیسر ءَ مردماں گیرت مندی ءِ واستا بلوچ ءِ درور داتگ۔ انگت اوں مئے برات پہ ننگ ءِ ھاتر ءَ زندانی بوگ ءَ اَنت، وتی کسانسالیں جوانی ءَ ءُ وتی تنگوئیں سراں پہ لج ءُ ننگ ءَ ندر کن اَنت۔ ناں سرد چار اَنت ءُ نیکہ گرم، ناں شُد چار اَنت ءُ نیکہ تُن، در پہ دری زند گوازینگ ءَ اَنت بس ھمے ننگ ءِ رکینگ ءِ ھاتر ءَ ءُ اے ننگ ءَ ما بلوچ جنک گوں سوشل میڈیا ءَ پادمال کنگ ءَ اِیں۔
چاگرد ءِ اے سلکاری ءُ بدیں ھیالاں چہ ھمے زانگ بیت کہ مارا تالیم ءَ بس آجو کتگ، بلے جیڑگ ءِ ھچ وڑیں سنچ ءُ بودشت نہ داتگ۔ ھردیں کہ تو ٹک ٹوک، انسٹا گرام یا پیسبُک ءُ سوشل میڈیا ءِ آ دگہ کارمرز بیوکیں چیزانی تہ ءَ برو تاں تو دگہ راجاں چہ گیش بلوچ جنکاں گند ئے کہ کسے ءِ چمّ درا اَنت ، کسے ءِ لُنٹ ، کسے ءِ سرجمیں بدن زاھر اِنت ءُ بس دیم ئِے چیر داتگ ءُ کسے ءَ وتی گشان دور داتگ ءُ دیم اِش ھم درا اَنت۔ ءُ دژمن چہ ھمے شرمناکیں اکس ءُ تامراں سوب کنت ءُ آیانی جان ءِ گُداں ھم کش اِیت پہ بلوچ ءِ بے سوب کنگ ءُ آئی ءِ بدنام کنگ ءَ دژمن ھرچ وڑیں پندل ساز اِیت۔
سد بژن پہ ھما بلوچ ورنایاں کہ آ ھمے جنکانی اکس ءُ تامرانی سر ءَ انچیں کمنٹ، لایک کن اَنت کہ آ گیشتر اے سلکاری ءِ آماچ بنت، باید اِنت بلوچ سرجم ءَ برات اِنت ءُ ھرچ گوھار ءِ ازت ءَ وتی ازت بہ پھم اِیت آیاں چہ اے بدیں کمک ءَ ابید شریں راہ ءِ سرپدی ءَ بہ دنت، بلے آ گوں اے وڑیں کمنٹاں کہ ، باز وش ، سک شوک ئے ، بے درور چہ اے وڑیں کمنٹاں ھما جنک ءَ دوبر سلکاری ءِ نیمگ ءَ راہ دیگ ءِ جھد ءَ کن اَنت۔
چوش ھم نہ اِنت کہ بلوچ ءِ سرجمیں جنک ھمے وڑ ءَ اَنت۔ لھتیں جنک پہ درور بانک کریمہ، شیرزالیں مھرنگ، کامریڑیں سمی، دردواریں سیما، راجدوستیں بیبو ءُ برات رکینوکیں گلزادی ءِ دروشم ءَ دیم ءَ کاینت کہ آیاں چاگرد ءِ تہ ءَ پہ وت یک بلاھیں نامے جوڑ کتگ۔ منی ھیال ءَ آیانی تالیم چہ اے سوشل میڈیا ءِ جنکانی تالیم ءَ گیشتر اِنت، بس آیانی دل ءِ تہ ءَ راج ءِ درد ھست ءُ ایشانی تالیم ءَ ایشان ءَ جیڑگ ءِ بودشت داتگ ءُ رھشونی ءِ سکین داتگ۔
گڈسر ءَ بس گوں وتی بلوچیں گوھاراں دزبندی کن آں کہ وت ءَ چہ چاگرد ءِ سلکاریاں بہ رکین اِت، وتی زبان، راج ءُ رھشون ءُ جنگجوئیں براتانی ناماں ھراب مہ کن اِت۔ اگاں پہ راج ءَ ھچ کُت نہ کن اِت آیانی شھیدیں ءُ سرمتابیں دیمونیاں تاوان بار مہ کن ات۔سوبین بات اِت، بلوچ بات اِت، سوبمند ءُ ازمندیں راجے بات اِت۔
چہ بچک ءَ ننگ بریناں چُک جنکیں شرتر اِنت
چہ جنک ءَ لج برین ءَ مات ءِ سنٹی گھتر اِنت
