نبشتہ کار: میجر مجید
چوناھا اے اُستا گال ءِ بزانت زانتکار، سوھو، کواس ءُ کیمیاگِر باز زیبدار ءُ پُر مانائیں لبزے، بلے بدبھتی ءَ مئے دودمان ءَ اے لبز رد کارمرز بیگ ءَ بیتگ ءُ انگت بیگ ءَ اِنت ءُ رواج گپتگ، ھمے گال ءَ کہ یک ھُنرے، بُرتگ ءُ یک ٹکّ ءُ بولکی رنگ داتگ، راستی اے نہ اِنت، اے گال ءَ گوں ٹک ءُ بولک ءَ ھچ سیادی نیست، اُستا مئے دودمان ءِ ھما مھلوک اِنت کہ آیاں پہ راج ءَ کِشت ءُ کشاری ازباب، ننگار ءُ جُگ، مرز ءُ شَت، داس، تپر، کونڈال ءُ برد ءُ دگہ بازیں ازباب جوڑ کتگ، ءُ آ وھد ءَ جنگانی دْرچ ءَ ھمے مھلوک ءَ پہ جنگی لشکر ءَ زھم، اِسپر، کاٹار، کارچ ءُ اپسانی واستا نال جوڑ کتگ ءُ جنگ ءَ ھمکوپگ بیتگ اَنت۔
آ زمانگ ءَ گیشتر مھلوک ءِ روزگار گوں کِشت ءُ کشاری ءَ بیتگ، اے ازبابانی جوڑ کنگ ءِ ڈُبّہ گڑا اُستا ءَ زرتگ، یک ھسابے ءَ اے مھلوک مئے دودمان یا مئے راجدپتر ءِ انجینئر گْوشگ بیت، بلے پہ نادلگوشی مئے چاگرد ءَ ھمے کار ءُ کسب ءَ یک ٹکّ ءُ بولکے ءِ بزانت ءَ زرتگ، پہ زالبولاں ایشاں وڑ وڑیں سھت ءُ زیور جوڑ کتگ، چوش کہ: دُرّ، کپگو، کید، سنگو، ٹِک، کید، منگلیک ءُ باھوبند ھمے وڑیں چیز پہ زالبولاں جوڑ کتگ۔ سکیں مھنت کشّیں مھلوکے بیتگ، مئے چاگرد ءَ ھمے کار ءُ کسب برتگ ءُ ھمیشانی ٹک ءُ بولک جوڑ کتگ کہ سکیں ردیں ھبرے۔
دومی گال: لوڑیگ
لوڑیگ ءِ لبزی مانا لوٹوک اِنت، پرچا کہ ایشاں وھدے تئی واستا کِشت ءُ کِشار، رون ءُ موش ءِ ازباب جوڑ کتگ اَنت گڑا گلہ ءُ برنج ءِ رون ءَ، ھامین ءَ، جوپاگ ءَ، سورو رون ءَ آتکگ اَنت ءُ وتی ھک اِش چتّو لوٹ اِتگ، پنڈگ اِش نہ لوٹ اِتگ، پرچا کہ دھل ءِ تہ ءَ لوڑیگ ءِ جھد ھم ھوار بیتگ، آیاں وتی ھک رون ءُ موش ءِ وھد ءَ چتّو لوٹ اِتگ، ھمے سوب ءَ ایش اِش لوٹوک گوشتگ اَنت، دیمتر ءَ ھمے گال لوڑیگ جوڑ بیتگ۔
مئے کماشے واجہ مولداد ء مھمد ءَ اے ٹک ءِ بارہ ءَ مزنیں پولکاری یے کتگ اَت، انی بیران بوتگ نیست اِنت، (اللہ پاک آئی ءِ جاہ ءَ وش بہ کنت) گْوشت ئِے کہ اُستا یا لوڑیگ زاتے نہ اِنت، یک کار ءُ کسبے، ءُ ھمے کار مھلوک ءَ یک ٹک ءُ بولکے جوڑ کتگ کہ اے سکیں ردیں گپے ءُ آئی ءَ اے ھم گوشت کہ اُستا میر شکّل ءِ نماسگ ءُ پدریچ اَنت، میرشکل آم بلوچے بوتگ چو ایدگہ بلوچاں، آئی ءَ اے بارہ ءَ سک باز من ءَ گْوشت دانکہ من یک روچے گْوشت کہ واجہ من ایشاں نبشتہ بہ کناں؟ گْوشت ئِے شر اِنت۔ پد ءَ منی وتی جند ءِ سُستی مرچی باندا، مرچی باندا، تاکہ واجہ مولداد بیران بوت، بلے آئی ءَ اے سکتی ءَ گوں گْوشت کہ اے انچیں آم منی تئی ایدگہ کومانی وڑیں بلوچ اَنت، بلے ایشاں ھمے کار کتگ اے گپ اِش گْوشگ بیتگ۔
نی منی دسبندی ایش اِنت کہ اے درگت ءَ پٹ ءُ پولے بہ بیت پرچاکہ اے بلاھیں سماجے، ناروائی یے کہ مئے بازیں مھلوک ھمے لوڑیگ ءُ اُستا ءِ گال ءَ ٹک ءُ بولک سرپد بنت ھالانکہ اسل گپ اے وڑ ءَ نہ اِنت۔
چوش کہ اُستایانی بلاھیں ارزشتے بیتگ اے سکیں مھنت کشّیں مھلوکے بیتگ، چہ درستیں کوماں جوڑ بیتگ، اُستایاں رِند، لاشاری، رئیس ءُ دگہ دگہ بازیں کوم ھوار اَنت، ھرکس ءَ کہ آھِن کاری یا سُھر ءِ کار ءُ بار بزاں زرگر یا تھت ءُ منجو ءُ ایدگہ ساز ءُ سامان جوڑ کتگ آ اُستا گْوشتگ اِش ءُ مزن مزنیں جنگانی نیام ءَ اُستا گون بیتگ اَنت، جنگی ازباب کہ پْرشتگ اَنت گڑا ھمے اُستایاں ھما دمان ءَ ھما جنگ ءِ توک ءَ ھمے ساز ءُ سامان پد ءَ اڈ کتگ ءُ داتگ اَنت۔ نی بدبھتی ایش اِنت کہ ھمے مھنت یا ھمے کار مئے مھلوک ءَ زاتے یا ٹک ءُ بولکے جوڑ کتگ بلے راستی اے وڑ ءَ نہ اِنت، واجہ مولانا روانبد گْوش اِیت:
کُل بلوچ یکیں لوگ ءِ پرزند اَنت
گوں ھمے یکیں جامگ ءُ شلوار
نی اے اُستایانی توک ءَ رِند ھم بیت کنت، ھوت ھم بیت کنت، لاشاری ھم بیت کنت، رئیس ھم بیت کنت ءُ دگہ دگہ بازیں کوماں ھم ھمے کار کتگ گڑا آیاں ھم ھمے اُستا ءِ نام اِش گْوشتگ، بلے راست چوش نہ اِنت، راست اے وڑ ءَ اِنت کہ مولانا روانبد ءَ بہ چار کہ چے گْوش اِیت کہ:
کل بلوچ یکیں لوگ ءِ پرزند اَنت
گوں ھمے یکیں جامگ ءُ شلوار۔
اد ءَ من دگہ گپے گیش کنگ لوٹاں کہ من ءَ میر امین اللہ میر چاکر کہ ھستیں وھد ءِ ٹک ءُ بولکانی مزنیں پٹ ءُ پولکارے آئی ءَ ٹک ءُ بولکانی دْرچ ءَ سک پٹ ءُ پول کتگ، ءُ باز شریں شریں چیز ئِے دیم ءَ آؤرتگ، گڑا آئی ءَ من ءَ یک روچے اے ھم گْوشت، انچوش کہ من بُرز ءَ نبشتگ کہ واجہ مولداد ءَ گْوشتگ اَت، آئی ءَ اے ھم گْوشت کہ اُستا ٹّک ءُ بولکے نہ اِنت بلکیں اے ھُنر ءُ کِردے۔
میر چاکر ءِ مات ءِ پت میر شیھان ولد شھسوار ولد میر شھداد، ولد نوروز، نوروز مزنیں میرجلال ھان ءِ بْرات بیتگ، آ سُھر ءِ یک بلاھیں تاجرے بیتگ، آئی ءَ سُھر ءِ کار ءُ بار کتگ، اوگانستان (افغانستان) داں ایران ءُ ھرچے کہ نزیک گْور ءِ ملک بیتگ اَنت آئی ءِ سُھر ءِ کار ءُ بار بیتگ، آئی ءَ گْوشتگ ھرچے کہ زرگر اَنت اے گیشتر رِند اَنت، اے گیشتر چہ رِند ءِ کبیلہ ءُ ٹک ءَ اَنت بلے چوش کہ ایشاں ھمے سُھر ءِ کار ءُ بار کتگ گڑا ایشاں ھمے اُستائی نام پِر لِچّ اِتگ۔
گُڈسر ءَ من واجہ میر امین اللہ ءِ منّت ءَ گراں کہ واجہ ءَ گوں من اے پٹّ ءُ پول ءِ دْرچ ءَ سک باز مدت ءُ کمک کتگ۔
تپاکی آجوئی ءِ مانزمان اِنت،
بلوچستان آجو بات۔
