نبشتہ کار: کوھی بلوچ
اے مرچگیں ھبرے نہ اِنت کہ ریاست پاکستان بلوچ ءِ چُکچینی ءَ کنگ ءَ اِنت ءُ بلوچ راج ءَ را وتی گُلام کَنگ ءِ جُھد ءَ کنگ ءَ اِنت۔ مرچی بلوچ راج ءَ ھپتاد ءُ ھَپت سال اِنت کہ گوں زُلم ءُ زوراکیاں مِڑگ ءَ اِنت، مُدام تیر سُپتگیں جون چِست کنگ ءَ اِنت ءُ ریاست ءِ تھاریں کوٹیانی تَہ ءَ بندیگ ءُ ازیت سگگ ءَ اِنت۔ ما بہ گْوشاں کہ اے مَرچیگیں ھبرے گُڑا ما مَیاریگ بہ اِیں، چی ءَ کہ اے زُلم ءُ زوراکی ءَ را دیر اِنت کہ بلوچ راج ءِ سر ءَ بوگ ءَ اِنت۔ بلوچ ھَرّوچ وتی سالوکیں بچ ءُ بانوریں جنکانی جوناں چِست کنگ ءَ اِنت۔
بلوچ راج اے زُلم ءُ زوراکیاں داں مھشر ءَ بیھال نہ کنت ءُ ریاست پاکستان ءَ را اُوں بیھال بوگی نہ اِنت کہ من کے کُشتَگ ءُ کئی گوم ءَ جنگ ءَ اُوں، بلکیں بلوچ راج وتی رِتکَگیں ھونانی ھِساب ءَ یک یک ءَ گیپت۔ اے ھِساب ءَ بلوچ نہ داریت، بلکیں ھما زوراک (ریاست پاکستان ءُ آئی ءِ اِدارہ) ءَ را دارَگی اِنت۔ اَنچوش کہ بلوچ ءَ زیکّیں روچ ءَ پہ وتی سرڈگار ءَ کُربانی داتگ مرچی اُوں دیگ ءَ اِنت، گُڑا اے جنگ ءَ ھِچ زوراک داشت کُت نہ کنت ءُ کس اے مہ گْوش اِیت کہ من بلوچ راج ءَ وتی گُلام کنگ ءِ جُھد ءَ کناں.
بَلوچ راج ءَ مَرچی سَما کُتگ، بَلوچ راج زانت کے منی دُژمِن ءُ کے منی ھمبل اِنت، بَلوچ ءَ سَما کُتگ کہ کے منی مڑیانی لُٹ ءُ پُل ءَ ھوار اِنت ءُ کے منی مال ءُ مڑیاں رکینگ ءَ اِنت۔ گُڑا زوراک ءَ را اُوں زانگی اِنت کہ نوں منی زوراکی بوت کُت نہ کَنت۔ تو ھما راج ءَ وتی گُلام کُت کن ئے کہ آ گُنگ ءُ بے توار بہ بیت، بلوچ راج نہ زیکّیں روچ ءَ گُنگ بوتگ ءُ ناں کہ مَرچی گُنگ اِنت۔ بلوچ راج ءَ وتی راجی پَجّار ءِ رکینگ ءَ، پہ وتی راج ءِ رکینگ ءَ، پہ وتی آجوئی ءَ، ءُ پہ وتی باندات ءِ رکینگ ءَ جنگ کُتگ، جنگ کنت ءُ جنگ ءَ اِنت۔
پَنجابی پوج! بَلوچ یک راجے، گوش انت کہ ”تو یک کَورے ءِ دَپ ءَ داشت کُت کن ئے، بلے یک کومے (راجے) ءِ دَپ ءَ داشت کُت نہ کن ئے“ گُڑا اے راج نہ پہ کُشگ ھلاس بیت ءُ ناں کہ پہ گار ءُ بیگواہ کنگ ءَ ھلاس بیت، تو ھَمنچُو بلوچ شھید کن ئے دِگیہ ھَمنچُو بَلوچ تئی زُلم ءُ زوراکیانی دیمءَ چو کوہ اُوشت اِیت ءُ ترا زوراکی ءَ نیل ایت۔ ترا ھَرچ زُلم ءُ زوراکی یے کنگی بوتگ تو کُتگ، ترا ھَرچ لُٹ ءُ پُل ءِ کنگی بوتگ تو کُتگ نوں منی راج (بلوچ) ءَ سما کُتگ، منی راج ءِ گُلام کنگ تئی دْروگیں وابے کہ آئی ءَ تئی بے سوبی وت پدّر کنگ ءَ اِنت، اے تئی بے سوبی اِنت کہ تو مْئے مات ءُ گْوھاراں شھید کنگ ءَ ئے ءُ بلوچ ترا زُلم ءُ زوراکی ءَ
نیل ایت اے ھبر ءَ تو اُوں شر سرپدے، انگت ھزار مھناز ھست پہ برمش ءَ پیداک کنگ ءَ۔
بلوچ راج نہ ایوک ریاست ءِ پاکستان ءَ را گْوش ایت کہ زوراکی مکن، بلکیں ھما پنجابیاں گْوش ایت کہ وتی بچاں بدار اِت ءُ پہ بلوچ چُکچینی ءَ دیم مہ دے اِت، اگاں ناں گُڑا بلوچ ءِ دست ءَ ھمے تُپنگ اِنت کہ تئی دست ءَ اِنت۔ ترا اگاں مَرچی ٹوپ ءُ ٹینک ھست، گُڑا مارا پہ وتی زَمین ءِ رکینگ ءَ، مال ءُ مڑیانی رکینگ ءَ، زُبان ءِ رکینگ ءَ، دود ءُ ربیدگانی رکینگ ءَ، ءُ وتی راجی پَجّار ءِ رکینگ ءَ انگت بچ ءُ جنک ھست کہ ترا چہ وتی زَمین ءِ چہ در بہ کن اَنت۔ ترا مَرچی بلوچ پہ در کپگ ءَ راہ دیگ ءَ انت، چوش مہ بیت بانداتیگیں روچ ءَ ترا وتی سِپاھیگانی جون بڈّ ءَ بہ بنت ءُ در بہ کپ ئے ءُ اے روچ دور اُوں نہ اِنت کہ ترا وتی سِپاھیگانی جون بڈّ بہ بنت ءُ در بہ کپ ئے۔۔۔۔۔۔
