نبشتہ کار: دل مراد بلوچ
بلوچی رجانک: ھسابجار
مھرنگ بلوچ گوں وتی کاروان ءَ چہ پنجگور ءَ دراتکگ ات ءُ دیم پہ ھُزدار ءَ روگ ءَ ات۔ میان ءَ مئے ھَند گریشگ ات، کارواں ھرجاھ داران ات ءُ مھلوک ھم پہ وش اتک ءَ دیم ءَ درایاں ات انت۔ چوش کہ گریشگ منی ھند انت یا بوتگ بلے ھمبستگی یے وَ ھست، پمیشکا منی دل ءَ جت کہ چوش مہ بیت کہ دیم ءَ درایگ ءُ وش اتک کنوک کمیں بہ بنت من وت ءَ میاریگ بہ کناں۔
چار ات کہ رولیں ھاشم من بھ کار نہ بستگ، مرچی چکاسانے، کلوھے دیم دات، دامگ نیست ات، پمیشکا کلوھے سر نہ بیت۔ دومی روچ ءَ پسو ئے اتک۔
“ چُنت سال ءَ پد ترانگ ءَ کپتگ ئے، ھُگم کن۔”
شُگرے گپت کہ ھاشم دست کپت ءُ پہ کار ءَ دپ ء وت ئے گُشت۔
“ مھرنگ ءِ کارواں باندا گریشگ ءَ سر بیت۔ ترا ھر وڑ ءَ سدے پنجاھے مردم مُچ کنگ ءُ وش اتک ءَ سر بیئگی انت ۔
آئی ءَ من ءَ وشیں ھالے دات کہ آ وَ دو روچ انت چن ءُ لانچ ءَ انت ءُ مھلوک ھم آئیگ ءِ وڑ انت امیت انت مھلوک سک باز کئت ءُ ھوار بیت۔
دومی روچ ءَ پد ءَ کلوھے دیم دات بلے دامگ ءِ نیستی ات۔ چارومی روچ ءَ یھبرا ھاشم ءِ دیم داتگیں گریوگی بُتکے سر بوت۔ تکانسر بیتاں۔ ھما دمان جُست کُت:
“ھاں ھیر انت ؟”
گُشت ئے:
“ من تئی دیم ءَ ملامتاں۔”
من جُست کُت: “ پرچا؟”
گُشت ئے:
“چے بہ گُشاں ۔ دیم ءَ روگ ءُ وش اتکی ءِ روچ ءَ من سُھب ءَ مھلہ پرپٹ کش ات ءُ پہ روگ ءَ ساڑی اتاں یھبر ءَ ھور ءَ ایر دات۔
ما چہ سالاں پہ ھورے ءَ نیازمُندیں مردم ات اِیں، بلے اے روچی ھور بدوائی دات۔
تو وَ زان ئے، مئے میتگ چپ ءُ چاگرد ءَ ڈگارانی تھا انت چار ترمپ بہ کپ ایت آ سجیں روچ ءَ شترناک بیت۔ نہ کہ دُراھیں دمگ میستگ ءُ لچ ءُ مین بیتگ ات۔”
بلکیں من گوں ھمے بژن ءَ چہ اے جھان ءَ بُرواں۔
من پہ آئی ءِ دلبڈی دیگ ءَ آ تسلہ دات۔ “ اے وَ گُڈی مراگش نہ انت، سرجمیں زندے ھست دیم ءَ کہ مراگش بنت برو گوں ، پہ ھزمت کنگ ءَ چوشیں وھد باز کئیت۔”
بلے ھاشم ساکم نہ بوت، آ لبجگ ءَ ات ءُ پون بند بیت باور کن ئے، آ سھت ءَ من ءَ ھاشم ءِ آؤد ءَ سر نہ بیئگ ءَ ھینچکیں بلاھیں جیڑے ءِ اٹکل نیست ات ۔
بلے مروچی وھدے پاکستان ءِ لشکر ءِ جھگیر ءِ چاپکاری تران “ پریس بریفنگ “ گوشداشت تا من گُڈ اِتاں کہ بُن اسل ءَ ڈی جی ساب ھاشم ءَ گُشگ ءَ ات ۔
اگاں ھاشم سر بیتیں ۔۔۔
اگاں پرپٹ ءَ تاچاں ءُ لچ ءُ میناں ماندیاں مُچی ءَ سر بیتیں۔۔۔
تا اُود ءَ مردمانی کچ چہ “ بیست ءُ پنچ ءَ بیست ءُ شش “ بیتگ ات انت۔۔۔
ءُ ڈی جی ساب ءَ بلکیں اے دپتری کانفرنس ھم مہ کُتیں ۔
بیست ءُ پنچ بیست ءُ شش ءِ لشکری سائنس
براتاں! ھیال کن ات، پاکستان ءِ لشکر ءِ ھساب سک ھیرتیں پروشیں ھسابے یک مردمے پد ءُ پیش بہ بیت تا سرجمیں راج ءِ ھستی شک ءِ تھا کپ اِیت۔
