نبشتہ کار: ماھکان بلوچ
یک روچے من گوں وتی بلوچیں دزگْوھارے ءَ گپ ءُ رپ ءَ ات آں۔ من آئی ءِ گپانی پسّو ءَ ماں راجی زُبان بلوچی ءَ دیگ ءَ ات آں ءُ دزگْوھار ھم بلوچی ءَ نبیسّگ ءَ ات، بلے گوں انگریزی آباں نبشتہ ئِے کنگ ءَ ات۔
من چہ آئی ءَ جُست کت “دزگْوھار تو بلوچی ءَ گوں بلوچی آباں چی ءَ نبشتہ کت نہ کن ئے؟، اگاں تو ھیل نہ ئے گُڑا تو جُھد بِہ کن چوناھیگا تو وت بلوچے ئے اگاں تو جُھد کن ئے گُڑا سوبین بَہ ئے؟”
درائینت ئِے “بانک وانگ ءَ من بلوچی ونت کن آں بلے گوں بلوچی آباں نبشتہ کنگ ءَ ھیل نہ آں چریشی ءَ منی وھد تباہ بیت ءُ منی لنکک ھم درد کن اَنت پمیشکا من انگریزی آباں ھیل آں ءُ بلوچی ءَ گوں بلوچی آباں من نبشتہ کت نہ کن آں۔”
گُڑا من آئی ءَ گْوشت کہ پہ واٹر ءِ نبشتہ کنگ ءَ ترا پنچ آب ءِ رند ءَ تچگی اِنت انچوشکہ Water بلے پہ بلوچی ءَ ترا “آپ” بزاں پہ دو آب ءِ پکار انت ءُ نی من ءَ بِہ گْوش کجام زبان راست ءُ ارزان اِنت۔۔۔”
بزانکہ ھمے داب ءَ دگہ بازیں درور داتگ۔ گُڑا دزگْوھار بے توار بوت ءُ مار ات ئِے کہ من راست ات آں ءُ آ رَد انت۔ گُڑا دزگْوھار ءَ بلوچی نبیسّگ ھیل کنگ بُنگیج کت بلے بلوچی سْیاھگ ئِے سک رَد اِت اَنت۔ من گْوشت “بانُک دلپْروش مہ بَہ ئے، ھر روچ تھنا دہ دمان ءَ بلوچی درونتاں بہ وان گُڑا وھد ءِ ھمراھی ءَ وت زبر بَہ ئے۔”
دزگْوھار ءَ گْوشت راجی زبان ءِ شریں دربری یے(کورسے) راہ بہ دئے من وان آن ئِے۔ من بلوچی زبان ءِ کَسانیں دربری یے راہ داتگ بانُک ءَ یکیں روچ ءَ دربری ونت ءُ ھلاس کُت۔
اے راستیں کسہ ءِ نبیسگ ءُ چاپ کنگ ءِ مول مراد ایش انت کہ اگاں تو یک درآمدی زبانے ءَ ھیل ئے گُڑا اے گپ ءَ ھچبر مہ کن کہ من جِند ءِ زبان ءَ نبشتہ کت نہ کن آں یا راجی زبان ءِ نبشتہ کنگ گْران انت، بلے گپ ایش انت کہ ما راجی زبان ڈالچار کتگ۔ مارا راجی زبان وانینگ نہ بیتگ ءُ نہ بوگ ءَ انت پمیشکا ءَ گُڑا وتی شرپ ءِ رکینگ ءِ ھاتر ءَ ما نیمونے کن ایں کہ بلوچی گْران اِنت۔
او بلوچیں واجہ ءُ بانُکاں، چوناھا راستی ایش انت بلوچی چہ تیوگیں زباناں تچک ءُ ارزان اِنت بلے سد ھپ ءُ بژن انت کہ ما انگت ءَ ناسرپد ایں۔ گِند ئے بلوچی مئے وتی راجی زُبان اِنت پمیشکا باید اِنت ما ھر روچ دہ دمان ءَ درونتاں وانان ءَ بلوچی دربرگ ءِ جُھد بِہ کن ایں گُڑا وھد ءِ ھمراھی ءَ وت راست نبیسگ ءَ ھیل کن ایں۔ چوناھا بلوچی وت وانگ، دربرگ ءُ راج ءِ وانینگ مئے یک راجی زمہ واری یے۔ شالا بلوچ تپاک ءُ یکمُشت بات اَنت ءُ بلوچی دیمروی بکنات۔
