وتگڑیں ریاست ءِ پروش

نبشتہ کار: شکل بلوچ

پہ کُشگ ءُ گار کنگ ءَ ریاست وتی تاگت ءَ برجاہ دارگ ءِ جُھد ءَ اِنت۔ لھتے چانوگرانی پُشدر ءَ وتی سامراج ءِ مُھکم کنگ ءِ ھاتر ءَ پہ زر ءُ کلدار بھا زور اِیت۔ اے ریاست بلوچ ءِ زرد ءَ بَھا زور اِیت، یک برے کہ زمیر بَھا بوت گڑا آ چانوگر وتی پِت ءُ مات ءَ ھم نہ بکش اِیت۔

بی وائی سی بلوچ وتی آکبت ءِ جُھد ءَ وَ کنگ ءَ اِنت، بلے دژمن ھم بھا بوتگیں چانوگرانی پُشدر ءَ بلوچ راج ءِ توار ءَ وڑ وڑیں رِپک ءُ ھُنرانی وسیلگ ءَ ھاموش کنگ ءِ جُھد ءَ انت۔

ریاست ءِ نیمگ ءَ بلوچ لس مھلوک دھشتگردے، ریاست بلوچ راج ءِ چُکچینی ءَ کنگ لوٹ اِیت، پرچا کہ بلوچ ڈیھ ءِ دریا ءُ زمین چہ مُروارد ءُ گوھریں مڈیاں پُر اِنت چمیشکا ریاست وتی زوراں جَنَگ ءَ اِنت کہ بلوچ راج ھاموش بہ بیت یا بہ مِر اِیت۔

بی وائی سی ءِ رھشون ڈاکٹر مھرنگ، شاھجی سبگت اللہ، بیبگر بلوچ، بیو بلوچ ءُ گُلزادی بلوچ، اے ساھت ءَ اے بلوچ راج ءِ ریاستی زُلم ءُ زوراکیانی ھلاپ ءَ پہ بلوچ راج ءَ توار چِست کن اَنت، بلوچ راج ءِ گار ءُ بیگواھیں بلوچانی چہ ریاست ءِ داشتگیں کُشندہ ٹولیانی نیمگ ءَ چہ دروگیں میڑھے ءِ پُشدر ءَ بلوچ ءِ چُکچینی ءَ تَچک ءَ کنگ ءَ انت ءُ پد ءَ ھمے دروگیں میڑ ءَ را ریاست ایشاں دھشتگرد مَنّگ ءَ ءُ آیانی جوناں ماں جنگل ءُ گیابان ءَ دَور دیگ ءَ انت۔

پاکستانی آمیدگس، کانود ءُ دروگیں اسلامی نام ءِ سر ءَ بلوچ ءِ ڈیھ ءَ زورانسری کبزہ کنگ ءُ آیانی مال ءُ مڈیانی لُٹ ءُ پل کنگ ءَ ءُ وتی وتگڑیں جوڑ کُتگیں اِستان ءَ برجاہ بدار اِیت۔

چہ ایشی ءَ پد بلوچ بزاں بی وائی سی ءِ کریک ڈاؤن ءِ جَنَگ، دروگیں بے رھبندی 3Mpo ءِ پُشدر ءَ بلوچ راج ءَ تُرسینگ، کُشگ ءُ دور دیگ ءِ پالیسی ءَ کنگ ءَ اِنت۔

سرپراز ءِ وڑیں وتگڑیں چِرّیک دوستیں بلوچ پارلیمانی سیاست کنوک این پی ءُ بی این پی وتی سیاست ءَ پہ پاکستان ءِ پھریزگ ءِ ھاتر ءَ بلوچ راج ءِ چُکچینی ءَ تَچک ءَ ھوار اَنت۔ بلے بژن ءِ گپ ایش اِنت بلوچ راج ءِ جیڑہ مالی نہ انت، نوکری نہ انت، کہ لھتے بی سی ایس، سی ایس ایس پاس کنائینگ ءَ بلوچ ءِ مستریں جیڑہ ءَ چیر دات کُت نہ کن اَنت، بلوچ ءِ مستریں جیڑہ گلامی اِنت، بلکیں آئی ءِ جیڑہ بلوچ راج ءِ آجوئی انت کہ راجدپتر اے چیز ءَ گواہ انت کہ ریاستِ پاکستان ءَ زورانسری دزگیر کُتگ ءُ بلوچ ءَ را 77 سال اِنت ایردستے کُتگ۔

گار ءُ بیگواھیں بلوچانی جَنَگ ءُ دور دیگ ءِ ریاست ءَ وتی پالیسی تیز کُتگ، بلوچ راج ءَ زورانسری گلام جوڑ کنگ، بلوچستان ءِ بلوچ راجی مڈیانی لُٹ ءُ پل کنگ، وتگڑیں ریاستِ پاکستان ءِ رکینگ ءِ جُھد ءَ کنگ ءَ اِنت۔ ریاست وتی زوراں گوں بلوچ ءِ گون ءَ بلوچ ءِ کُشگ ءُ جَنگ ءَ تیز کنت۔

دومی نیمگ ءَ بلوچ راجی لشکر، وتگڑیں اِستان ءِ پروش دیگ ءَ روچ پہ روچ پاکستانی لشکر ءِ سر ءَ اُرش کنگ ءَ انت، بلوچ راجی لشکر ءَ اے ھم پاکستانی لشکر ءَ را موہ داتگ کہ شمارا چہ بلوچستان ءَ در روگ ءِ موکل دئیں، شمارا ما راہ دے اِیں بلے پاکستان ءِ وتگڑیں اِستان وتی تاگت ءِ نشہ ءَ اے بلوچ راجی لشکر ءِ بیان ءَ نہ منّگ ءَ اِنت۔

پاکستانی لشکر ءَ اَملی داب ءَ پروش وارتگ، پاکستان چہ چاگردی رسانکدر ءَ وتی رکینگ ءِ ھاتر ءَ دروگیں پندل، رپک ءُ ھُنراں گڑا رکّ اِت کنت؟ وھدے پاکستان ءِ جوڈشت کہ دروگے گڑا آ چہ وتی رکینگ ءَ ماں چاگردی رسانکدر ءَ دروگ وَ الم بند اِیت، اِستان بلوچستان ءَ وتی زُلم ءُ زوراکیانی چِہ، یا بلوچ راج ءِ گار ءُ بیگواہ کنگ ءَ ھچ داب ءَ وت ءَ وتی کشندہ ٹولیاں رکّ اِت نہ کنت ءُ ناں کہ بلوچستان ءِ بلوچ راجی مڈیاں لُٹ ءُ پل کنگ ءِ موکل دیگ بیت۔

بلوچستان ءِ جاور پہ پاکستانی لشکر ءَ نگیگ انت، اگاں پاکستان وتی زُلم ءُ زورکیاں یا کہ لُٹ ءُ پل کنگ ءَ چَک ءُ پد نہ بیت آ وتی زوراکیاں برجاہ دار اِیت گڑا بلوچ راج وتی ماتیں سرڈگار ءِ ھاتر ءَ وتی سر ءَ ھم دیگ ءَ چک ءُ پد نہ بیت۔

بلوچستان شالا آجو بیت۔