نبشتہ کار: بْرمش بلوچ
بلوچ راج ءِ وانِندہ کَس ءَ دلگوش نہ کن اَنت۔ ما ھر کَس وت ءَ بلاھیں زانتکار سرپد بَہ ایں۔ گِند ئے مرچیگیں موبائل ءِ زمانگ ءَ دنیا ءِ گُلامیں راج وتی راجی زباناں چہ پیسبوک، وٹس ایپی گل(گروپ) ءُ یوٹیوب ءَ وانگ ءُ دربرگ ءَ اَنت۔ ھمے راج موبائلاں وتی راجی زبان ءِ کتاب منّ اَنت، ھمے راج وتی زبان ءِ دَرونت(سبق) ءُ راجی دوستی نبشتانکاں وان اَنت ءُ وتی زبان ءِ راست نبیسگ ءِ جُھد کن اَنت۔ بلے مئے راج ءِ نودربر، اردو ءُ پارسی ءِ استاد، انجینئیر ءُ ڈاکٹراں ھوار دِگہ لس وانِندہ یک روچے ھم وتی راجی زبان ءِ وانگ ءُ دربرگ ءِ جُھد نہ کن اَنت ءُ گْوش اَنت کہ من وانگجاہ(اسکول) ءُ دربرجاہ(کالج) ءَ پارسی ونتگ پمیشکا بلوچی وانگ ءَ وھد نہ رس ایت۔ بزانکہ پہ ایشاں جُھد ھچ بستارے نہ دار ایت۔
گِند ئے اِے وڑیں دلپروش، ناسرپد ءُ ناپوھیں وانِندھاں سرپدی دیگ لوٹ ایت کہ ما وَ زان ایں کہ شُما بلوچی ماں وانگجاھاں نہ ونتگ ءُ ناں بلوچی ماں وانگجاھاں وانینگ بوگ ءَ اِنت پمیشکا شُما بلوچی راست نبشتہ کُت نہ کن اِت، ما وَ سرپد ایں کہ شما بلوچی نبیسّگ ءَ ھم سُست ءُ نزور اِت، شُما وڑ ءَ پیسر ما ھم بلوچی وانگ ءُ نبیسگ ءَ نزور اِت ایں۔ گُڑا ایشی ءِ متلب اِے وَ نہ اِنت کہ ما وتی راجی زبان ءَ مہ وان ایں! زاناں شُمارا کَے گْوش ایت کہ شُما چہ اولی روچ ءَ بلوچی نبشتہ بِہ کن اِت؟
چوناھا شُما بلوچ اِت پمیشکا شما وتی ماتی ءُ راجی زُبان ءَ وت ونت کن اِت، سرپد ھم بَہ اِت گُڑا اِے ھم پہ ما گنج اِنت۔ اگاں ما پارسی، ھِندی ءُ انگریزی ءِ وڑیں دری زُبانانی وانگ ءُ دربرگ ءَ دہ سال جن ایں گُڑا باید اِنت کہ ما یک ماھے ءَ وتی زُبان ءِ وانگ ءُ دربرگ ءِ جُھد ھم بہ کن ایں کہ بلوچی مئے راجی زبان ءُ راجی پجّار اِنت۔ اگاں ما بلوچ راج ءِ وانِندہ ھر روچ تھنا دہ دمان ءَ ھم بلوچی دَرونت ءُ راجی دوستی نبشتانکاں وان ایں گُڑا ما یک ھمپتگے ءِ تہ ءَ ھم بلوچی راست نبیسگ ءَ زبر بَہ ایں۔ اگاں ترا کسے بلوچی وانینگ ءَ اِنت گُڑا باید اِنت شما بلوچی وانگ ءُ دربرگ ءِ جُھد بہ کن اِت۔
چہ ایشی ءَ ھوار لھتیں مردم گْوش اَنت کہ منی موبائل ءَ بلوچی کیبورڈ نیست پمیشکا بلوچی ونت نہ کن آں۔ گِند ئے دنیا ءِ ھر راج آ توری اربی، روسی، چینی ءُ جاپانی یے بہ بیت یا توری پشتو، سندھی ءُ ھِندھی یے بہ بیت ھرکَس ماں موبائلاں وتی زبان ءِ کیبورڈاں وت ایرگیج(ڈونلوڈ) ءُ ساز کنگ ءَ اَنت ءُ ما بلوچ ھم وتی موبائلاں بلوچی کیبورڈ ءَ وت ایرگیج ءُ ساز کنگ ءَ ایں۔ اگاں تو بلوچی کیبورڈ ءِ ایرگیجگ ءُ ساز کنگ نہ زان ئے گُڑا چہ وتی سنگت ءُ دزگْوھاراں جُست بہ کن ترا سرپدی دے اَنت۔
گُڑا باید اِنت ما چہ درستاں پیسر بلوچی دَرونت، زُبان دوستی ءُ راجدوستی نبشتانکاں وانان کن ایں۔ مُدام بلوچی راست نبیسگ ءِ جُھد بہ کن ایں، اے جُھد ءَ ھمے سرپد بِہ بَہ ایں کہ سرپدی چہ وانگ ءَ رس ایت پمیشکا باید اِنت ما بلوچ وانِندہ وتی راجی زبان ءِ دَرونتاں وانان ءَ وتی راجی زبان ءِ وانگ ءُ دربرگ ءِ جُھد بہ کن ایں، بلوچی زبان، بلوچی گالوار ءُ نبشتہ ءَ بزان ایں، اِے بابت ءَ جُست ءُ پول ھم بہ کن ایں۔ چہ ایشی ءَ ھوار باید اِنت ما نبیسگ ءِ وھد ءَ اِشتاپ مہ بَہ ایں بلکیں وتی کسانیں کلوہ ءُ نبشتانکاں یکبرے وت ھم بہ وان این ءُ آیانی رَدیاں راست بِہ کن ایں۔ لبزانکی چیدگاں ماں راستیں جاھاں جن ایں ءُ ھمُک گالرِد ءَ شریں وڑ ءَ سنج بہ کن ایں۔ گِند ئے رَدیاں راست کنان ءَ مئے نبشتہ ءِ سْیاھگ ھم راست بیت پمیشکا جُھد بہ کن ایں کہ دگرانی نبشتانکاں وانان ءَ آیانی رَدیاں راست بہ کن ایں یا نوٹ بہ کن ایں کہ چے رَد نبشتگ ئِے؟ انچوشکہ ما جُھد ءَ ایں کہ مئے بلوچی نبشتہ راست بہ بیت پمیشکا باید اِنت ما بزان ایں کہ نبشتہ چے ءَ گْوش اَنت ءُ نبشتہ ءَ چُنت کاریچ، بزانکہ گام اَنت؟
نبشتہ ءِ سے مستریں کاریچ اَنت۔ ماں اولی کاریچ ءَ نبیسّوک جیڑ ایت کہ من چے نبشتہ بہ کن آں؟ دومی کاریچ ءَ آ وتی نبشتہ نبیس ایت ءُ سرجم کنت۔ سیمی لازم ءُ مستریں کاریچ ءَ آ وتی نبشتہ کُتگین ءَ وت وان ایت ءُ وتی نبشتہ ءِ رَدیاں راست کنت۔ اگاں چیزے پہ نبیسگ ءَ شموشتگ ئِے گُڑا ھوار ئِے کنت۔ ھمے وڑ ءَ آئی ءَ دَرونت ھم تازگ ءُ مُدام یات بنت۔ بزانکہ ما ھم وتی راجی زبان ءَ ھمے داب ءَ وان ایں، نبشتہ بہ کن ایں ءُ راج ءَ ھم بہ وانین ایں۔
یک گپے گْوش آں کہ بلوچی گوں انگریزی آباں نبیسّگ ءَ مارا ھچ پائدگ نہ رس ایت بلکیں بلوچی گوں انگریزی آباں نبیسّگ وھد ءِ زیانی اِنت پمیشکا ما گوں شما دزبندی کن ایں کہ بلوچی ءَ گوں انگریزی آباں نبشتہ مہ کن اِت، بلکیں مُدام وتی راجی زُبان ءَ گوں بلوچی آباں نبشتہ بِہ کن اِت کہ شُمئے وتی زُبان ءَ آب ھست اَنت۔ اگاں ما بلوچی ءَ گوں بلوچی آباں نبشتہ کن ایں گُڑا ما کم کم ءَ بلوچی نبشتہ ھم ھیل کن ایں۔
سلامت بات اِت، بلوچ راج شالا یکجان، یکمُشت، ھکوپگ ءُ ھمدست بات، بلوچ ءُ بلوچی شالا دیمروی بکنات۔
