آرپہ پاؤنڈیشن

نبشتہ کار: شوھاز بلوچ

دنیا ءِ کُجام کُنڈ ءَ اگاں جنجال ءُ ھزابے کپتگ، گُڑا تو نودربر دیستگ اَنت کہ آ وتی راج ءِ کش ءَ اوشتاتگ اَنت۔ زمین ءِ جنگ بہ بیت یا سیاست ءِ گپ بہ بیت، راج ءِ گُلامی ءُ ایر دستی بہ بیت یا کہ گُژن ءُ شُد بہ بیت، بلوچستان ءِ ھونی ئیں کسّہ بہ بیت یا کہ اپریکہ زھرشانی ءِ دگ بہ بیت ترا نودربر گندگ ءَ کئیت کہ آ وتی راج ءِ واستا جُھد کنگ ءَ، پہ راج ءِ شَرتر ءُ گھتر کنگ ءِ واستا جپ ءَ کَشگ ءَ اَنت۔

ھمے رنگ ءَ کہ 2022 ءَ بلوچستان ءِ جُتا جُتائیں دَمگ ءَ ھور ءَ گورت، مردمانی گِس آپ ءَ بُرت اَنت، مردم در پہ در بوت اَنت، آئی کِشت ءُ کِشاری برباد بوت، آئیانی بازیں مال ءُ دلوت ھار ءَ بُرت اَنت، مردم بے گِس ءُ بے جاہ بوت اَنت۔ ھمے سال ءَ کبریٰ بلوچ نام ءِ نودربرے پہ وتی راج ءِ کُمک کنگ ءِ واستا پاد کئیت آ یک پاؤنڈیشنے جوڑ کنت، اے پاؤنڈیشن ءِ نام ءَ آرپہ پاؤنڈیشن ایر کنت۔ چوش کہ آرپہ (عارفہ) یک کسانسالیں جنکے آئی ءَ را شومُک (کینسر) ءِ نادْرھی ءَ گپت ءُ شومُک ءَ باج برت، بانُک آرپہ چہ اے جھان ءَ رکست کنت ءُ وتی گُڈی جاہ ءَ روت، پد ءَ بانُک کبریٰ بلوچ آرپہ ءِ نام ءِ سر ءَ پاؤنڈیش ءَ جوڑ کنت ھما گریب ءُ بے دریں کھول ءُ مردمانی کُمک کنگ ءَ بندات کنت۔
آرپہ پاؤنڈیشن ھر ھما جاہ ءُ دمگ ءَ کار کنگ ءَ اِنت کہ اُود ءَ سرکار ءُ چہ استان ءِ نیمگ ءَ انسان ءِ زندگی ءِ آسراتی چیز کم اَنت،، انچوش کہ وانگ ءُ زانگ، راشن بھر کنگ، پہ وانوکیں نودربراں وانگجاہ ، گُد ءُ پُچ، بوٹ ءُ بستہ ھم وتی وس ءُ واک ءَ بھر ءُ بانگ کنت۔

آرپہ پاؤنڈیشن

آرپہ پاؤنڈیشن لس مھلوکی گلے، ایشی ءِ تہ ءَ سرکار ءُ استان ءِ ھچ بھر مان نہ اِنت۔ ایشی چیئرپرسن بانُک کبریٰ بلوچ اِنت، کار کنوک لس مھلوک اِنت۔ آرپہ پاؤنڈیش بُنُکی آسراتیانی واستا کار کنگ اِنت ھما کہ بُنُکی آسراتیاں چہ زبھر کنگ بوتگ اَنت۔ آیانی لوٹ ءِ سرجم کنگ ءَ کار کنگ اِنت۔ چوش کہ آرپہ پاؤنڈیشن یک درسرکاری گلے، گُڑا اے راستے کہ آ باز چیز یکیں وھد ءَ سرجم کُت نہ کنت، پد ءَ ھم اے گل وتی وس ءُ واک ءَ، ھما سرکاری وانگجاہ کہ بُنکی آسراتیاں چہ زبھر اَنت آیانی آسراتیانی پورا کنگ ءِ واستا جُھد کنگ ءَ اِنت ءُ دومی نیمگ ءَ گریبیں لس مھلوک ءِ سر ءَ راشنے بھر ءُ بانگ کنگ ، دومی climate change ءِ سر ءَ ھم کار کنگ ءَ اِنت۔

موسم ءِ بدلی (climate change)

چوش کہ ابرم ءِ نیمگ ءَ چہ مردم رنگ رنگیں ھزابانی دیمپان بیت، ایشی ءِ سبب ءَ مردمانی زندگی ھلاس بوت کنت۔ یکے وَ ایش اِنت کہ بلوچستان ءِ تہ ءَ infrastructure development بس ھُدا ءِ نام اِنت کہ ھچ نیست، اگاں ھور کمو وتی کد ءَ گیش بہ بیت مردمانی گِس ءُ جاگھاں بارت ءُ مردماں پچیں آزمان ءِ چیر ءَ دور دنت۔ آرپہ پاؤنڈیشن ترا اے وھد ءَ ھم گندگ ءَ کئیت کہ مردمانی مدد ءُ کُمک ءَ کنگ ءَ اِنت، ھو آرپہ پاؤنڈیشن آ وڑیں گَلے نہ اِنت کہ سرجمیں اُمر ءَ یکیں مردم ءِ کُمک ءَ کُت بہ کنت۔ پرچہ کہ اے گَل ءِ تہ ءَ مردم ناں کہ سرکاری نوکر اَنت ناں کہ اے گَل سرکاری گلے، اے گَل چہ لس مھلوک ءَ چندہ یکجاہ کنت ءُ ھما مردم کہ ھمے وھد ءَ ھزابانی دیمپان اِنت آ وتی اے وھد ءَ دیم ءَ تیلاک دات بہ کنت۔

وانگ ءُ زانگ:

وانگ ءُ زانگ مردم ءِ اوّلی ءُ گُڈسری لوٹیت اِنت ءُ وھد ءِ بودناکی ھمے وانگ ءُ زانگ ءِ تہ ءَ ماں اِنت، آرپہ پاؤنڈیشن وانگ ءُ زانگ ءِ سر ءَ ھما دمگاں کار کنگ ءَ کہ وانگجاھانی تہ ءَ پہ زھگاں وانگی چیزانی ءُ بُنکی لوٹانی آسراتی کم اِنت، ھما آسراتیانی واستا جُھد کنگ کہ سرجم ا٘ش بہ کناں۔ بلوچستان ءِ کوچگ ءُ دشت یا ھما جاہ کہ بازیں چیز ءَ زبھر اَنت آیاں وتی وس ءُ واک ءَ سرجم کنگ ءِ جُھد ءَ کنگ اِنت داں کوچگ ءُ دشتانی تہ ءَ نشتگیں مردمانی کمو کُمک کنگ بہ بیت پہ وانگ ءَ چوناھیا ھر راج ءِ مرچیگیں دور ءَ لوٹ وانگ اِنت کہ آئی تہ ءَ بودناکی ءُ زانت ھَست۔ آ وان اِیت چیزاں سرپد بیت، دیم ءَ پہ وتی کوم ءُ چاگرد ءَ گھتری ءُ شَتری کار اَنت۔ یک چاگردے مہ وان اِیت ءُ مہ پھم اِیت، مہ زانت آ چہ دُگنیا ءِ ھر اِلم ءُ زانت ءَ زبھر بیت۔ آ یک کورچاتے یا کہ تھاری ءِ تہ ءَ سپر کنت۔ اے اِلم ءُ زانت کہ ترا چہ دُگنیا ءِ ھر چیز ءَ باسما کنت، ترا رنج ءُ درد ءِ ھال ءَ دنت، ترا اے ھال ءَ دنت کہ تئی کوم ءُ راج تہ ءَ پرچا بزّگ ءُ بدھالی اِنت۔ ھر چاگرد ءِ وڑ ءَ بلوچ ءِ چاگرد ءِ تہ ءَ ھم وانگ ءُ زانگ ءِ دلگوش المی اِنت کہ ایشی ءِ سر ءَ ما ءُ شُما جُھد بہ کن اِیں۔ ھما گل ءُ کونسل کہ اے جیڑہ ءِ سر ءَ کار کنگ ءَ اَنت باید اِنت ما آیانی کُمک بہ کن اِیں، آیانی ھمراھداری بہ کن ایں کہ آ چاگرد ءِ باندات ءِ رُژنائی ءِ واستا کار کنگ ءَ اَنت۔

جان سلامتی (healthcare )

آرپہ پاؤنڈیشن پہ جان سلامتی ءَ ھم کار کنگ اِنت، چوش کہ بلوچستان ءِ تہ ءَ دگہ گل ھم ھَست کہ آ کار کنگ ءَ اَنت۔ نادْرہ ءَ دارو ءُ درمان دیگ ءَ اَنت، ھما جاہ کہ آ گل رست نہ کنت یا سھی نہ بَنت گُڑا اے کار ءَ آرپہ پاؤنڈیشن ءِ باسک کنگ ءَ اَنت۔ نادْرہ پہ دارو ءُ درمان یا کہ آئی ءِ جان سلامتی ءِ واستا دگہ آسراتی سرجم کنگ ءِ واستا ھم جُھد کنگ ءَ اِنت، بلوچستان ءِ تہ ءَ مرچیگیں وھد ءَ بیمار انچو باز اِنت کہ چوشیں گِسے نیست کہ آئی تہ ءَ بیمار در نئیت، پد ءَ بلوچستان ءِ تہ ءَ نندوکیں مردم گیشتر گریب اَنت۔ یکے وَ سرکار ءِ نیمگ ءَ بلوچستان انچو نادْرھجاہ ھَست ترا یک پیناڈول ءِ گولی یے ھم دست نہ کپ اِیت، گُڑا ایشی ءِ کُمک لس مھلوک ءَ کنگی اِنت۔ شُمئے کسانیں اَمَلے یکے ءِ زندگی ءَ رکینت کنت۔ NIH ءُ IDSR ءِ گوشگ ءِ رد ءَ بلوچستان تہ ءَ دگہ سوبھاں چہ گیش مردم نادْرہ اَنت، وڑ وڑیں بیماریانی شکار اَنت۔ PIDE گوشگ ءِ رد ءَ بلوچستان چہ دگہ سوبھاں گیشتر گریب تر اِنت۔

لس مھلوک چوں کُمک کُت کنت؟

لھس مھلوک آرپہ پاؤنڈیشن ءِ کُمک ءَ باز چھرگ ءَ کُت کنت۔ مالی کُمک، تالیمی کُمک، گل ءِ تہ ءَ بھر زورگ۔

مالی کُمک:
یک گلے ءِ کار کنگ ءَ پہ الم اِنت کہ آئی کِرّ ءَ (Resources )مال ءُ زر بہ بیت، آ دیم ءَ کار کُت کنت۔وتی مکسد ءَ سرجم کُت کنت، اے گل ءِ تہ ءَ لس مھلوک ءُ نودربر اَنت۔ آ انچو چیز یکیں وھد کُت نہ کن اَنت کہ مال ھم یکجاہ بہ کن ءَ پد ءَ گل ءِ باسک ھم بہ بہ بنت۔ ءُ گریب ءُ بزّگیں مردمانی آسراتیاں سرجم بہ کن اَنت، یک نودربرے چنچو کہ کُت کنت آ پہ وتی گریب ءُ بے دریں مھلوک ءِ واستا بہ کنت۔ ھما مردم کہ آ وت گل ءِ تہ ءَ کار کُت نہ کن اَنت آیانی واستا الم اِنت کہ آ گل ءِ مالی کُمک ءَ بہ کن اَنت۔ آ پہ بلوچستان ءَ شَرتریں جُھد کُت بہ کن اَنت۔ وتی مھلوک ءِ واستا گیش ءَ چہ گیش کار کُت بہ کن اَنت، اگاں لس مھلوک ھمراھداری مہ کنت ھچ گل وتی مکسد ءَ رست نہ کنت۔ ھر کسی دست ءَ چہ چنچو چیز بوت کنت آ وتی وس ءُ واک ءَ اے چیزانی ھمراھداری بہ کنت۔

باسک ءِ جوڑ بوگ:

یک گلے کہ کار کنت آئی ءِ اوّلی چیز ھمیش اِنت کہ آئی تہ ءَ باسک بہ بیت نوں گلے جوڑ بیت۔ چوش کہ باسک بیت گُڑا کار بیت، کار کہ بیت اڑ ءُ جنجال گیش ءُ گیوار بْوان کن اَنت۔ اگاں کسے وھد دات کنت گُڑا باید اِنت کہ اے گل ءِ باسک جوڑ بہ باں، پہ بلوچستان ءِ لاچاریں مھلوک ءِ واستا کار بہ کن اَنت۔ چوش کہ اے گل بلوچستان ءِ بازیں دمگ ءَ کار کنگ ءَ اِنت، مستونگ، گوادر، ھاران، کلات، پنجگور، نال، ھزدار، لسبیلہ، نوشکی ءِ دمگ ءَ کار کنگ اِنت، اگاں تو بہ لوٹ ئے گڑا تو باسک جوڑ بہ ئے ءُ کار کُت کن ئے۔

تالیمی کُمک:

ھما نودربر کہ سوشل میڈیا نشتگ اَنت باید اِنت کہ ایشی ءِ پروموشن ءَ بہ کن اَنت کہ گیشتر مھلوک سھی بہ بیت اے گل ءِ کُمک ءَ کُت بہ کنت۔ اگاں تو یک ھنر مندے ءِ تو وتی ھنر ءَ ھم پیش داشت کن ئے۔ نبشتہ کنگ، ڈیزائن کنگ، ءُ مردماں آگاھی دیگ ھوار اِنت۔ اگاں نودربر اے کار ءَ کُت بہ کن اَنت گڑا گل گیشتر مھکم تر بیت ءُ آ گیشتر کار کُت کنت۔ نودربر اے گپ ءَ شر سرپد اَنت کہ اے استان پہ بلوچستان ءَ چے کنگ ءَ اِنت ءُ چے کنگ لوٹگ ءَ اِنت، اگاں ما بہ چار اِیں چاگی ءِ زمین ءِ دلبند ءِ در اتکگیں Resource بہ بَنت یا کہ سوئی ءِ تہ ءَ دراتکگیں گیس بہ بیت یا کہ گوادر ءِ پورٹ بہ بیت، ایشی ءِ تہ ءَ بلوچستان ءِ واستا کُجام شَری اتکگ؟ اے گپ ءَ تھنا ما ءُ شُما زانت کن اِیں ءُ شر زانت کن اِیں، گُڑا باید اِنت کہ سرکار ءُ استان ءِ سر ءَ چم دارگ ءِ بدل ءَ ما وت جُھد بہ کن اِیں۔ اگاں مارا یک گلے رستگ پہ کار کنگ ءَ، گُڑا ما وتی ھنر ءُ کار ءَ باید کہ پیش بدار اِیں آیانی ھمراھداری بہ کن اِیں۔