مارشت دراَنگازی

(ناکو کمانچر)

      نبشتہ کار: ارپان آرپ

ناکو کمانچر جان تو سک گیر پیداگ ئے، بلوچستان ءِ ھر ندارگ بے ترا ابیتک ءُ مُلور اِنت۔ مند ءِ سُھرچک ءُ بانوریں کلیر ترا یات کنگ ءُ زَرگ ءَ اَنت۔ تئی جُتا بوگ ءُ بیرانی ءَ رند بولان ءِ شپاد ءُ درتہ پُچیں بلوچ پرزنداں کئے مارا پیش دار ایت ءُ آیانی بزگیں دل ءِ چیھانٹاں اَکسانی دروشُم ءَ پدّر ءُ سھرا کنت؟ دشت ءِ سُرمگیں پُلکاں مارا کئے پیش دار اِیت؟

زامُران ءِ شھد ءُ بینگیں مُزاتیاں مارا کئے پیش دار اِیت؟ ھمایاں مارا کئے پیش دار اِیت کہ پہ تئی چَوَٹ ءُ ترامبلیں پادانی اِناشاں تئی گُلزمین بیرَکیں شال ءِ مسک ءُ زبادیں وشبو ءَ زَر اَنت؟ پُرمَڑاھیں وش آتکے ءَ بے کرار ءُ بے تاھیریں دل ءِ ھول ءَ ھون چَکیں اَرس آں ریچگ ءَ اَنت۔

ھما شپادیں زھگ تئی ودار ءَ سنگ ءُ ڈوک اِش وتی سرجاہ ءُ پُلک اِش وتی نپاد کُتگ اَنت، ھما وژدلیں باریگ ءِ اُوست ءَ کہ تو کائے ءُ وتی سوگاتاں آیانی دمک ءَ بھر کن ئے۔

ناکو! زندگی بے وپائیں ھمسپرے، بلے تئی وپاھانی سپر تانسریں راج ءَ گیر کئیت ءُ ترا یات کنت۔ پمیشکا تو شموشگ نہ بہ ئے ءُ مدام ھیالاں ساڑی ءُ گوں وتی زیبائیں ندارگانی اکساں سھرا بہ ئے۔ تو زندگ ئے، پہ مدامی زندگ ئے۔

بھشت تئی ھنکین بات ناکو جان۔