ما اردو بہ وان اِیں؟

نبشتہ کار بْرمش شاشانی

مرچاں ما بہ گِند اِیں مئے چاگِرد ءِ توک ءَ بازیں نودربر  اردو ءُ دِگہ زُبان وانگ ءَ اَنت، ھمے بابت ءَ من یک جُستے کُتگ اَت۔ من وتی راجی جُھد کاراں اے جُست ءَ کن آں، کہ ما اردو بہ وان اِیں یا اِنّا؟ اے گوشگ بِہ بیت کہ مَن ءَ باز مردُم ءُ راجی جُھد کاراں ھمے سرپدی داتگ کہ اردو مہ وان اِت، منی جُست اے بیتگ کہ ما اردو زُبان ءَ بہ وان اِیں یا کہ اِنّا؟

پد ءَ اے گوشگ بیتگ کہ مارا درامدانی زُبان وانگی نہ اِنت، من اِے گوشگ لُوٹ آں کہ ڈاکٹر پاروک بلوچ چے واستا دری زُبان ءَ نبشتہ کنت؟ بُرز کوھی پرچا دری زُبان ءَ نبشتہ کنت؟ اِے گوشگ بہ بیت کہ بُرز کوھی بلوچی گپ کنت ءُ دری زُبان ءَ چی واستا وان اِیت؟ بایدیں کہ آ وتی ماتی زُبان ءَ گپ بَہ جنت، گُڑا وتی ماتی زُبان ءَ نبشتہ بہ کنت۔ ڈاکٹر پاروک مئے وتی بلوچ کُوم ءِ واستا جُھد کنگ ءَ اِنت، گُڑا آ پرچا وتی ماتی زُبان ءَ نبشتہ نہ کنت؟

بازیں جُھدکاراں ھمے گوشتگ کہ اردو زُبان ءَ مہ وان اِت ءُ نبشتہ مہ کن اِت، اے گوشگ بہ بیت کہ ما  اردو زُبان مہ وان اِیں؟ اگاں ما اردو زُبان مہ وان اِیں گُڑا ما چو چون زانت کُت کن اِیں کہ مئے بلوچ راج چون اِنت۔ اگاں ما راجدپتر ءَ مہ وان اِیں گُڑا ما اے زانت کُت کن اِیں کہ مئے کوم چون بیتگ؟ مارا چون جُھد کنگی اِنت؟ اگاں ما چیرجنگی (گوریلا) بابت ءَ وانگ بِہ لوٹ اِیں گُڑا ما کے ءَ بہ وان اِیں؟

 اِیشی ءِ بابت ءَ بُرز کوھی سرپد کنت کہ مارا چے کنگی اِنت، مارا وتی راج ءَ پہ چون جُھد کنگی اِنت۔

اگاں ما چی گویرا ءِ بابت ءَ سرپد بوگ لوٹ اِیں گُڑا ما کُجام بلوچی کتاب ءَ بہ وان اِیں کہ چی گویرا کے بیتگ ءُ چے کُتگ ئِے؟

ڈاکٹر پاروک بلوچ اے واستا اردو ءَ نبشتہ کنت کہ دیم ءَ دگہ کوم بہ زان اَنت کہ بلوچ چے ءِ بیتگ ءُ چون بیتگ

ءُ بلوچستان چون زورگرگ بیتگ۔

 اگاں بُرز کوھی انگریزی ءَ نبشتہ مہ کنت گُڑا انگریز کوم چون سرپد بوت کنت کہ بلوچ کے اِنت ءُ بلوچ چون پُلگ بیتگ۔ بابا نواب ھیر بکش چون جنگ کُتگ، بلوچ مات ءُ پِت دگانی سر ءَ کپتگ اَنت یا کہ اِنّا؟

چوش کہ مرچی بلوچ راجی جُھدکار بلوچی ءَ نبشتہ کن اَنت، انگریز چے زانت کہ بلوچاں اد ءَ چے نبشتہ کُتگ۔ من اے گوشگ لوٹ آں کہ انگریز مئے کوم ءَ بہ وان اِیت، اگاں انگریز ءَ مئے کوم زانت گُڑا انگریز بہ بیت یا کہ دِگہ کومے بہ بیت آ کوم پہ بلوچ ءَ توار چِست کنت گُڑا پمیشکا مارا سرپد بوگی اِنت ءُ دِگہ مُلک سرپدی دیگ لوٹ اَنت کہ  ما بلوچ کوم چون اِیں، ما چون بیتگ اِیں۔ ھمے وڑ ءَ مارا پیسر ءَ  پہ وت جُھد کنگی اِنت، پد ءَ کہ درامدے مئے کوم ءَ وان اِیت آ زانت کہ بلوچ چون اَنت، پمیشکا مارا گھگیری کنگی اِنت۔

شالا جُھد کار بات اِت، وتی ماتی زُبان ءِ دیمروئی ءَ جھد ءُ کوشست کنات اِت۔ راجدوست ءُ زُبان دوست بات اِت، شالا راجی سرمچار بات اِت۔