نبشتہ کار: گریشگی
چوش کہ بازیں زانتکار ءُ کواسانی گْوشگ اِنت کہ سیاست یک اِبادتے، بلے من گوش آں کہ سیاست اِبادت ءَ گوں ھوار راجی ھزمتے۔ پمیشکا منی جیڑگ، منی مُول ءُ مراد ھمیش اِنت کہ سیاست پہ بلوچ راج ءَ یک بلاھیں ارزشتے دار اِیت۔
سیاست چہ بندات ءَ گوں دو گالبنداں پرّیچگ بیت۔یکے واکداری (اقتدار) ءِ سیاست ءُ دومی لیکہ (نظریہ) ءِ سیاست۔ واکداری (اقتدار) ءِ سیاست ءِ مول ءُ مراد واک ءُ ھکومت ءِ گرگ ءُ آئی ءِ کارمرز کنگ اِنت، چوش کہ لیکّھی سیاست ءِ تہ ءَ جتا جتائیں ھیال ءُ گتانی بُنیات ءَ پیسلہ کنگ بنت.۔
ھمے رنگ ءَ سیاست ءِ مول ءُ مراد گوں ارزانیں لبزاں چاگرد ءِ وشھالی ءُ دیمروئی ءِ دیم ءَ برگ اِنت، ءُ اے سیاست جتا جتائیں پڑاں بیت۔ پہ درور دمگی، راجی ءُ میان استمانی پڑاں کنگ بیت۔
پمیشکا سیاست ءِ ارزشت ھمیش اِنت کہ آ چاگرد ءِ جیڑھانی گیش ءُ گیوار ءِ ھاترا پلیٹ پارمے جوڑ کنت ءُ مردمانی زند ءَ سانمند
کنت۔
سیاست یک انچیں نزامے کہ آئی وسیلگ ءَ واکدار لس مھلوک ءِ جیڑہ ءُ جنجالاں گیش ءُ گیوار کنت۔ ھمے وڑ ءَ اے چاگردی گل ءِ بھر اِنت کہ آئی ءِ بنیاد ءَ کانود، رھبند ءُ سرکاری بُنھشت ءِ سر ءَ اِنت۔ سیاست ءِ تہ ءَ جتا جتائیں لیکہ، پارٹی ءُ تھریک ھوار بنت کہ آ چاگرد ءِ جیڑھانی گیش ءُ گیوار ءِ ھاتر ءَ جتا جتائیں راہ ءُ رھبند پیش کن اَنت۔
چوش کہ سیاست زندگی ءِ راجمانی ءِ یک ھاسیں بھرے، اگاں ما گْوستانک ءَ چمشانکے بہ دے اِیں
سیاست گوں بنی آدم ءَ ھمگْرنچ اِنت۔ سیاست چاگرد ءِ ھژدری ئیں بھرے، سیاست پہ بنی آدم ءِ زندمان ءَ گھتری، وشھال ءُ اِیمنی ءِ واستا اِنت۔
بلے اے واکداری پیسلہ سازی ءِ اَمَل ءَ سانمند کنت۔ سیاست جتائیں پڑاں بوت کنت، چوش کہ دمگی، راجی یا میان اُستمانی پڑ ءَ۔
سیاست ءِ مول ءُ مراد راج ءِ وشھالی ءُ ملک ءِ دیمروئی اِنت، بلے باز براں اے سیاست پہ جتا جتائیں سیت، لیکہ ءُ واکداری ءِ تہ ءَ بدل بیت۔ اے گپ ءِ آسر ءَ برے برے کرپشن، ناانساپی ءُ چاگردی جیڑہ دیم ءَ کاینت، پمیشکا اے المی اِنت کہ ما یک شیوار ءُ سرپدیں شھری یے بہ بہ اِیں دانکہ ما وتی ھکانی رکّینگ ءُ جوانیں ھُکومتے ءِ واستا وتی توار ءَ چست بہ کن اِیں۔ چی ءَ کہ وتگڑیں سیاستدان ھر وھد ءَ وتی زات ءُ لاپ ءِ مزن کنگ ءَ جند ءِ برات ءِ ھو ءَ چونسگ ءَ پہ چک ءُ بد نہ بوتگ اَنت۔
بلے! اے یک راست ءُ تچکیں ھبرے کہ سیاست پہ چاگردانی دیمروئی ءِ ھاتر ءَ بلاھیں ارزشتے داریت، اے ھم راستے کہ مئے چاگرد ءِ توکا وتگڑیں سیاستدان ھست کہ آ وتی راج ءِ چُکچینی ءَ کنگ ءَ اَنت، وتی زبان، دودو ءُ ربیدگ ءَ پہ ادارُکی سیت ءُ نپّانی ھاتر ءَ ولگوج کنگ ءِ ناکامیں کوشست کنگ ءَ اَنت، پمیشکا مارا سیاست زانگی ءُ وتی راج ءِ ھک پدجَنگی اَنت۔
