شھدائے مُرگاپ

نبشتہ کار: میجر مجید

شھید گلام مھمد بلوچ

شھید شیرمھمد بلوچ

شھید لالا منیر بلوچ

تو پمّنی واہ ءِ پد ءَ

 مُرواردیں اَرساں مہ گْوار

واھگ منی جند ءِ نہ اِنت

 ھست اِنت تئی زرد ءِ کرار

ماتی منی دلجم بہ بی

مرگ ءِ لوار ءِے کُشت نہ کنت

من کہ مِراں بازینے بیت

گوں شادھاں گوں تو ھوار

تلکاریں ھونانی نشان

ارسیگیں کاڑانی گُشان

(شھید گلام مھمد)

سد سلام گوشاں مُرگاپ ءِ شھیداں کہ وتی سر اِش پہ ماتیں گلزمین ءُ کُلیں انسانیت ءُ گلامیں راجانی سربلندی ءِ ھاتر ءَ کُربان کُت اَنت۔ مروچی ھمے شھیدانی ھون ءِ لکیر بلوچ راج ءُ کُلیں گلامیں کومانی رھشون اِنت۔ شھدائے مُرگاپ ھما شھید اَنت کہ جُنز ءِ بنداتی دھر ءَ زورگیر ءَ 3 اپریل2009 ءَ چہ ایڈوکیٹ میر کچکول اَلی ءِ کارگس ءَ روچ ء رھمانی کُلیں مھلوک ءِ دیم ءَ دزگیر کت اَنت۔ ایڈوکیٹ میر کچکول اَلی ءَ باقاعدہ پوج ءِ ھلافءَ ایپ آئی آر ھم درج کت، گواھی ھم دات کہ شھدائے مُرگاپ چہ منی کارگس ءَ ، منی چمانی دیم ءَ یزیدی لشکر ءَ چست کتگ اَنت۔ اے دْرچ ءَ من ایڈوکیٹ کچکول اَلی ءِ ھمت ءُ جوانمردی ءَ سلام گوشاں ، بلے ھمے ایف آئی آر ءِ سر ءَ کس ءَ دلگوش گْور نہ کت، تانکہ چیزے روچ ءَ پد بزاں 9 اپریل2009 ءَ شھدائے مُرگاپ ءِ زدگ ءُُ زانگولیں لاش مں مُرگاپ ءَ دزکپت اَنت، بلوچ ءِ ازلی دژمن پنجاپ ءِ یزیدی لشکر ءَ شھدائے مُرگاپ سک باز لَٹّ ءُُ کُٹّ کتگ اِت اَنت، انچوش کہ آیانی لاشانی پجّار ھم مشکل اَت، چہ ھیلی کاپٹر ءِ سر ءَ دور دیگ بیتگ اِت اِنت، دژمن ءَ سک باز اذّیت داتگ اِت اَنت۔

نِزّء من اے ھبر ءِ تہ ءَ شک نیست کہ جھانی سامراج ھم اے درگت ءَ گوں یزیدی لشکر ءَ ھم پَتّ ءُُ ھمراہ اَت، چی ءَ کہ جان سولکی نامیں مردے، بلوچ راجی سرمچاراں اے ھاتر ءَ دزگیر کُتگ اَت کہ واکداریں توان مئے نیمگ ءَ دلگوش گْور بہ کن اَنت، مئے آجوئی ءِ جیڑہ ءَ بہ زیر اَنت۔ دَراھگ ءَ پد جان سولکی ءِ جند ءَ ھم گْوشتگ ات کہ آ جھانی واکداراں سکین دنت کہ بلوچ ءِ ھک ءَ آواز چست بہ کن اَنت، بلے ھچ نہ بیت۔ اے راجی بامردانی شھیدی ءِ یک سببے منی نِز ءَ جان سولکی ءِ دزگیر کنگ ءُ یلہ دیگ ھم بیت کنت، چی ءَ کہ اے درگت ءَ شھید گلام مھمد بلوچ جان سولکی ءِ رہائی کمیٹی ءِ باسکے اَت، جان سولکی ءِ پہ سلامتی دراھگ ءَ پد اے بلوچ رھشونانی چست کنگ ءُ بے دردی شھید کنگ الم مانایے دار اِیت، دِلانی تہ ءَ شَک ودی بیت کہ اے بردُکیں وئیلانی کڑی وت ماں وت دپ ور اَنت، بلے وائے بے وسی ءُ نادزرسی، سد اِیپ پہ زوراوری، اے درگت ءَ ھچ رنگیں پٹّ ءُ پولے دیم ءَ نیاتکگ۔

مروچی کلیں بلوچستان، کلیں انسانیت اے شھیدانی سر ءَ ناز کنت، مروچی بلوچ راج ھمے شھیدانی رند پد ءَ وتی ماتیں گلزمین ءِ آجوئی ءِ جھد ءَ دیم ءَ بران اِنت۔ اے شھیدانی ھون بلوچستان ءِ آجوئی ءِ مانزمان اَنت۔

بلوچ شھیدانی لڑ مروچی سک دْراج انت۔ کلیں شھیدانی جھد ستا کرز اَنت۔ اے دْرچ ءَ من بلوچستان ءِ ایندگہ شھید ءُ دنیا ءِ گلامیں راجانی شھیداں سلام

گوشاں شھید گلام مھمد گْوش اِیت:

کُھتاں آزمان کنت سرشان گوں رگامی گْوارگاں

پُر وداریں دیدگاں ارسے شلیت باریں کدی

مھر ءِ آس ءَ سُتکگ اَنت پیردان ءِ سْیاہ ڈن ءِ پِڑ ءَ

سُھرچک ءُ آتاریں یک پُلے سْرپیت باریں کدی

وش رواجیں وھد ءِ سالونک کیت پہ گْورامبازے ءَ

پُر وداریں وھد ءِ بانور سمبھیت باریں کدی

شھدائے مُرگاپءِ ارواہ ھما وھد ءَ تاھیر گِر اَ ت کہ کُلیں بلوچ راج شھیدانی رند پد ءَ وتی جھدانی کاروان ءَ پہ وتی مرادانی منزل ءَ رھادگ بہ کنت۔ شھیدانی روچ دارگ ءِ مول ءُ مراد گوں شھیدانی پروگرام ءَ ھوار بئیگی اِنت، شھیدانی نیم بُندگیں واب مانا (تعبیر) کنگی اَنت، شھیدانی واب ءِ مانا (تعبیر) آجوئی اِنت۔ گُڈسر ءَ من وتی نبشتانک ءَ گوں وتی اے شئر ءَ آسر کناں کہ اے شھدائے مرگاپ ءِ نام ءَ ندْر کنگ بیتگ:

ندْر پہ شھدائے مرگاپ ءَ

ھوناں مرگاپ ءَ شنزتگ دوشی

گلزمین ماتیں جُمبتگ دوشی

گونڈلاں آماچ اِنت کئی بالاد

جون کئی باریں شِنگ اتگ دوشی

میر بلوچ خان ءِ شکّلیں جنگجاہ

ٹوپ ءُ دُمبالاں گُرّاِتگ دوشی

پُرسی اِنت نوری ءِ دیار مسکیں

گوکپْروش چہ زُلماں لرزاِتگ دوشی

زوراکی چنگیز ءُ یزیدانی

آزمان لنجیں جکستگ دوشی

جِنّ ءُ انسان ءُ پْریشتگاں گْریتگ

ارش ءُ کُرش جھل ءَ کنزاِتگ دوشی

شنزاِتگ ھوناں تلّاں مرگاپ ءِ

مسکیں ساچاناں بُرّاِتگ دوشی

نگرھیں جان ءُ پتکگیں دلبند

بالاد سِیکارچاں بُرّاِتگ دوشی

جھ جت آشوب ءِ مُرتگیں ولّ ءَ

جمبراں زلم ءِ پوش اِتگ دوشی

گیدی ءِ دوست ءُ دژمناں گْریتگ

پون تلاراں چہ چُرّاِتگ دوشی

دین ءُ اسلام ءِ سیمسر اِش پْروشت انت

دژمن ءَ ہِیکّی شنزاِتگ دوشی

گوں وتی بکّالی تب ءُ میلاں

ھُنڈال انساپ ءِ بُرّاِتگ دوشی

لال ءِ گیوار ءِ مادنیں کشک ءَ

کلکشان تامور اِش کُتگ دوشی

کدھاں پُر کیپیں تھورانی

چہ گنوکی ءَ سار کتگ دوشی

مھرجتیں زِرد ءِ تْرونگلیں تْرمپے

لال ءِ گیوار ءَ دْرنز اِتگ دوشی

سُہمھرچکیں ھوناں مئے شھیدانی

گلزمین بانور کتگ دوشی

دْرنگیں اَرواھاں اَندر ءَ کبر ءِ

گوں جنتّی ھُوراں سِیر کتگ دوشی

تاں کدی دارئے مھر ءِ ابدالاں

بالواں رُژنے بالتگ دوشی

تپاکی آجوئی ءِ مانزمان انت

بلوچستان آجو بات