زمین زادگیں شھید ءُ سرمچارانی نام ءَ

نبشتہ کار: شکّل بلوچ

جنگ ءِ تہ ءَ شُد ءُ گُژنگی، تُن، ءُ دگہ باز انچیں راہ ءُ کِشک پہ زند ءَ ترنداں چہ ترندتریں زند پہ سرمچاراں سگگی بنت، اے سگ ءُ اوپار پہ ماتیں گُلزمین ءَ ءُ پہ وتی راج ءِ باندات ءَ وتی جان ءَ ندر کنگ ءَ ھچ چک ءُ پد نہ بنت۔ بلوچ سرمچار بلوچ راج ءِ مڈّی اَنت، بلوچ راج ءِ ھمت ءُ توکل اَنت، بلوچ راج ءِ آجوئی ءِ مانزمان اَنت۔ اَبید سرمچاراں بلوچ راج ناسرجم بیت۔

زمین زادگ، زمین ءِ ھکیگیں وارس یکشل ءَ وتی سراں پہ وتی مات ءَ کُربان کنگ ءَ اَنت، اے جنگ ءَ بلوچ راج ءِ پُسگاں پہ وتی گُلزمین ءِ ھاتر ءَ وت ءَ ندر ھم کُتگ ءُ انگت کُربان بوگ ءَ جاڑی اَنت۔ بلوچ راج یک وش بھتیں راجے کہ آئی ءِ بچاں پہ وتی راج ءُ گُلزمین ءِ ھاتر ءَ ھر ساھت ءَ دژمن ءِ بگیری ءَ جنگ ءَ تیار اَنت، پہ وتی ماتیں سرڈگار ءِ رکینگ ءِ ھاتر ءَ ناں شپ چار اَنت ءُ نیکہ روچ۔

انوں بلوچ راج وتی بلوچ سرمچارانی گون ءَ ھمگامی ءَ ھوار اِنت، پرچا کہ آ زان اَنت کہ مئے راست ءُ تچکیں مردم پہ مئے ھاتر ءَ کوھاں پہ گُژن، تُن ءُ بزگی سگگ ءَ اَنت، پہ مئے ھاتر ءَ وتی جان ءِ کُربان کنگ ءَ ھر وھد تیار اَنت۔

بلوچ سرمچار دیم پہ منزل ءَ جُنزان اَنت، نہ اوشتوکیں گام پہ آیوکیں باندات ءِ چراگ ءَ سھرا بیت۔ روچ پہ روچ بلوچ ءِ جُنز مھکم بوان اِنت، دیمروئی ءِ نیمگ ءَ روان اِنت۔ بلوچ گُلزمین ءِ آجو کنگ ءِ ھاتر ءَ بلوچ ءِ ھر پُسّگ کسان، مزن، زالبول پہ وتی آیوکیں پدریچ ءِ رکینگ ءِ ھاتر ءَ وتی بلوچ سرمچارانی گون ءَ ھمگام اَنت۔

اگاں ما راجانی آجوئی ءِ راجدپتر ءَ بہ چاریں زالماں اِیردستیں راج گیش گلام جوڑ کُت نہ کُتگ اَنت، بلے آ راجاں وتی ایردستی ءِ بگیری ءَ ءُ زالم ءُ زوراکیانی ھلاپ ءَ اُوشتاتگ ءُ جنگ کُتگ۔ مرچی بلوچ ءِ سرڈگار زالمیں اِستان پاکستان ءَ زور ءُ زبردستی بلوچ راج ءِ سرڈگار کبزہ کُتگ۔ یات بہ بیت کہ پاکستان ءَ 27 مارچ 1948 ءَ زورانسری بلوچستان کبزہ کُتگ، بلے مرچی روچ ءُ مروچی بلوچ نرمزاراں وتی زورانسری ءِ کبزہ ھچبر نہ منّ اِتگ ءُ دژمن ءِ ھلاپ ھما داب ءَ اُوشتاتگ اَنت۔ بلوچ راج وتی راجدپتر ءَ ھچ داب ءَ شموشگی نہ اِنت، بلوچ راج ءَ سرپد ءُ پوہ بوگ لوٹ اِیت کہ بلوچ اِستان یک آزات اِستانے ءِ بستار ءَ برجاہ بوتگ، بلے بلوچ ءِ لھتیں راجدروھاں پہ وتی راج ءِ ءُ پہ وتی سرڈگار ءَ گداری کُتگ بلے بلوچ راج ءَ اے چیز ھم ھچ شموشگی نہ اَنت۔

بلوچ راج مدام دژمن ءِ رپک ءُ پندلانی تہ ءَ بھر ءُ بانگ کنگ بوتگ اَنت، دژمن وتی اے رپک ءَ بازیں ھدّے ءَ سوبمند ھم بوتگ، بلے راستی کس ءَ پروش دات کُت نہ کُتگ ءُ بلوچ راج مدام وتی ھک ءِ ھاتر ءَ دژمن ءِ رپک ءُ ھُنر پروش داتگ اَنت۔ انوں اگاں ما بہ چار اِیں بلوچ راج اگاں گیش بے وسی ءِ تہ ءَ اِنت آیانی زمہ وار بلوچ ءِ جند ءِ مردم بلوچ ءِ چُکچینی ءَ ھوار اَنت، اگاں ھمے راجدرو لگام دیگ بہ بنت گڑا ما الم ءَ وتی آجوئی ءَ گر اِیں۔

بلوچ راج ءِ راجی سپاھی(سرمچار) زندگ بات اَنت

بلوچستان آجو بات