نبشتہ کار: رُژن ءِ پدگر
سُھریں دْروت بلوچ راج، چوش گْوشت نہ کناں کہ شما جوڑ ءُ وش اِت بلے گوں ھداوند ءَ دُوا اِنت ھُدا شمارا وش ءُ جوڑ بہ کنت۔ پرچا کہ من یکشل ءَ گْوشت نہ کناں کہ زورگریں پاکستانی لشکر ھرروچ بلوچ ءِ سر ءَ زلم ءُ زوراکی کنگ ءَ اِنت۔
بلے! نوں زورگریں پاکستانی لشکر انچیں زُلم ءُ زوراکی کنگ ءَ اِنت کہ چہ اے زلماں مارا سرپدی رسگ ءَ اِنت کہ نوں پاکستانی لشکر ءَ پْروش وارتگ۔ پرچا کہ پاکستانی لشکر گوں سرمچنڈاں جنگ دات کُت نہ کنگ ءَ اِنت، چمیشکا کسانیں زھگ ءُ زالبوالاں لٹّ ءُ کُٹّ کنگ ءَ اِنت۔
نوں وَ پاکستان وتی دل ءَ زانت کہ بلوچستان کُنگراں چہ منی دست ءَ بُرتگ، نوں منی کِرّ ءَ دگہ راہ پشت نہ کپتگ، منی لشکر گوں کُنگراں جنگ دات کُت نہ کنت۔ نوں دل ءِ سوک ءَ کسانیں زھگ ءُ زالبولاں بہ جنان ءُ بہ گْوشاں کہ منی لشکر ءَ بلوچ ناشرکار(دہشت گرد) جتگ اَنت۔
انوں زورگریں لشکر انچوش تُرس ءِ آماچ اِنت کہ ھمینچو بہ گْوش کم اِنت۔ اگاں تُرس آماچ مہ بوتیں زاھریں گپّے اَت کہ زھگ ءُ زالبول اِش نہ جتگ اِت انت۔ نوں پاکستان گُڈّی ساہ ءَ رس اِتگ کہ زالبولاں بارت ءُ بندیگجاھاں بند کنت۔ پاکستان لوٹگ ءَ اِنت کہ بلوچ راج ھلاس بہ بیت ءُ بلوچستان منی بہ بیت، پرچا کہ پاکستان ءَ وَ بلوچانی کار نہ اِنت آئی ءَ بلوچستان ءِ مال ءُ مڈّیانی پکار انت کہ بید ء بلوچستان ءِ مال ءُ مڈّیانی ءَ پاکستان ءَ شُد کُش اِیت۔ چی ءَ کہ پاکستان چہ بلوچستان ءَ ھرچ وڑیں چیز کش اِیت، بارت ءُ پنجاب ءَ دنت اِش۔
چوناھیگا وَ پاکستان ءِ وتی کِرّ ءَ ھچ نیست اِنت۔ پاکستان بلوچستان ءَ زندگ کتگ، بلے نو پاکستان زندگ بوگ ءِ گُڈّی ساہ اِنت۔ نوں بلوچاں یکشل ءَ جھ جتگ۔ بلوچ ورنا کربانی دیگ ءَ چک ءُ پد نہ بوتگ اَنت ءُ نہ بیگ ءَ اَنت، نوں پاکستان چہ مجگی ناسازی (زہنی حالت) ءَ شیپتال اِنت پمیشکا نہ زانت کہ من چے بہ کناں۔ کجام داب ءَ بلوچ ءَ پْروش بہ دیاں، بلے بلوچ راج ءَ پْروش دات کنگ ءَ نہ اِنت۔ زورگریں پاکستان ھمینچو بے سوبیں زُلم کنگ ءَ اِنت، اے زلم گنتر بلوچانی جُھد ءَ مھکم تر کنگ ءَ اِنت۔
زورگریں لشکر نوں ھرجاہ بے سوب اِنت۔ نوں زورگریں لشکر ءِ کر ءَ بید ء دْروگیں پندل ءَ دگہ راہ پشت نہ کپتگ۔ ھر روچ بے سوبیں پندل رسانکدر ءَ شنگ کنت۔ چہ ایشی ءِ پندلانی سازگ ءَ بلوچ راج ءَ ھچ تاوان نہ رسگ ءَ اِنت، بلکیں بلوچ راج ءَ سرپدی رسگ ءَ اِنت کہ زورگریں لشکر بے سوب اِنت کہ چوشیں بے سوبیں پندل سازگ ءَ اِنت۔
گوں ھُدواند ءَ دُوا اِنت کہ بلوچستان زوت ءَ چہ زوت آجو بات ھرچ ورنا بندیگجاہ ءَ ِنت آجو بہ بات اَنت۔۔۔
