نبشتہ کار: آئیشہ بلوچ
پاکستان ءِ زُلم ءُ زوراکیاں بلوچ راج پہ وتی راجی آجوئی ءُ ڈیھ ءِ وتواجھی ءَ بے وس کُت۔ بلوچ راج ءِ بِے کساس کُربانی ءُ جُھدانی برکت ءَ مرچاں بلوچ راج ءِ جیڑہ میان اُستمانی گل یو این او ءَ زُرتگ۔ یو این او ءِ واکداراں پاکستان ءِ سرکار ءَ زور دات کہ بلوچستان ءِ تہ ءَ بلوچ راج ءِ ناھودگیں کُشت ءُ کوش ءَ بند بہ کن، دْراھیں بندیگاں آجو بہ کن ءُ بنی آدم ءِ ھکانی لگتمالی مہ کن چوش مہ بیت کہ ما دِگہ گامے زُورگ ءَ بے وس بَہ ایں۔
پاکستان چہ یو این او ءِ واکداراں تُرس اِت ءُ وتی دْروگیں بیان درشان کُتگ اَنت ئِے۔ گِند ئے پاکستان پرچا مہ تُرس ایت؟ پاکستان وَ سرپد اِنت کہ من بلوچ ءَ پْروش دات نہ کن آں، اے جیڑہ ءَ ھمے داب ءَ روان بنت ءُ زیتیں روچاں ھمے یو این او بلوچستان ءِ آجوئی ءِ گپ کنت۔ چوناھا پاکستان سرپد اِنت کہ من چہ اِے جنگ ءَ پْروش وارتگ انی بلوچ راج گوں پاکستان ءَ نپرت کنت۔ بلے ما بلوچ بے جزباتی مہ بَہ ایں پرچا کہ اے راجی جنگ ءَ انگت تْرُند ءُ روک بوگی اِنت۔ پاکستان مئے سر ءَ گیش زُلم کنت۔ اگاں ما دُنیا ءِ گْوستگیں جنگاں بہ چار ایں گُڑا سرپد بَہ ایں کہ جنگ ءِ تہ ءَ پْروش ءِ مستریں نشانی ایش اِنت کہ زورگِر ءُ کبزہ گیریں دُژمن لس بے گناھیں مھلوک ءِ سر ءَ زُلم کنت۔
وھدیکہ زورگِریں دُژمن یک دلیریں راجے ءِ گوریلہ جنگ ءَ پْروش ءِ آماچ بیت گُڑا بدواہ وتی راستیں دْروشم ءَ پیش دار ایت۔ اگاں ما تھنا پاکستان ءِ گْوستانک ءَ بچار ایں پاکستانی پوج ءَ ھم مُدام ھمے وڑ ءَ کُتگ۔ وھدیکہ 1970 تا 71 ءَ بنگالی راج ءِ ھلاپ ءَ پاکستان ءَ مار اِت کہ پنگالی زالبول، نودربر، اُستاد، لس وانِندہ، ورناہ ءُ کماش اے جنگ ءَ ھوار اَنت، انی بنگالی راج گوں پاکستان ءَ نپرت دار ایت ءُ وت ءَ چہ وتی دل ءُ مجگ ءَ پاکستانی نہ منّ اَنت گُڑا بیرگری یا گْوش ئے زھر ءِ ھلاسی ءَ 26 مارچ 1971 ءَ آپریشن سرچ لائیٹ ئِے بُنگیج کُت کہ ھمے آپریشن ءَ بے کساس بنگالی شھزانت، ازمکار، نودربر، استاد ءُ رھشون شھید کنگ بوت اَنت۔
گِند ئے مرچاں پاکستانی پوج بلوچستان ءِ تہ ءَ ھم ھمے وڑیں پْروشے ءِ آماچ اِنت۔ پرچا کہ اے بلوچ راجی آجوئی جنگ ءَ لس بلوچ مھلوک توری آ زالبول، نودربر ءُ اُستاد بِہ بنت یا توری لس وانِندہ، ورناہ ءُ کماش بنت ماں اِے جنگ ءَ گوں راجی لشکر بی ایل اے ءَ ھمگام ءُ ھمکوپگ اَنت۔ پاکستان ءِ زانتکاریں سْیاسی، پوجی، جرنلسٹ ءُ سرسوجی گل(تنک ٹنک) دْراہ سرپد اَنت کہ بنگال ءِ وڑ ءَ بلوچ راج ھم گوں پاکستان ءَ نپرت دار ایت ءُ چہ وتی دل ءُ مجگ ءَ پاکستانی نہ اَنت ءُ راستی ھم ھمیش اِنت۔ آزات بلوچستان بلوچ راج ءِ سسایے، بلوچ راج ءِ یک دیستگیں وابے ءُ اے واب ءِ راست کنگ ءَ بلوچ راج ءَ بے کساس کُربانی داتگ ءُ انگت دنت۔ پاکستان زانت کہ پْروش ایشی نسیب ءَ اِنت پمیشکا انی پاکستانی پوج جنگ ءِ گڈی بھر ءَ بلوچ راج ءِ لس مھلوک ءِ سر ءَ آپریشن سرچ لائیٹ ءِ رِد ءَ بے کساس زلم کنت۔ زھرشانی کنوکیں راج ءِ مچیانی سر ءَ ڈاریکٹ تپنگاں آس دنت انچوشکہ شکاری شکار ءِ مزا زور ایت۔ چوناھا دژمن وَ زُلم کنت۔ گِند ئے اے زُلم راج ءِ تہ ءَ دُژمن ءِ ھلاپ ءَ نپرت ودی کنت ءُ نپرت ایردستیں راجاں آجوئی ءِ راہ ءَ پیشدار ایت۔
سرجمیں بلوچ راج ءَ مُراد بات کہ بلوچستان ءَ ھم یک دلیر ءُ ناتُرسیں راجی لشکرے ھست کہ آئی ءِ تہ ءَ چیریں ترامگیج زِراب ءُ پدائین گل کہ سرجمیں جھان ءَ مجید برگیڈ ءِ نام ءَ زانگ بیت، ھم ھست اِنت ئِے کہ دلیریں ءُ کُنگریں جنگولاں سر ریچ انت۔ ما گوں پھر ءُ ناز ءَ گْوش ایں کہ مرچاں اے وڑیں لشکر امریکہ، روس ءُ چین ءَ ھم نہ اَنت کہ بلوچ راج ءَ ھست اَنت۔
پاکستانی پوج ءِ ھمتواریں سرسوجی گل انسٹیٹوٹ آپ پِیس اینڈ کنپلکٹ اسٹڈی(IPCS) ءِ سروک آمر رانا گْوش ایت چہ 20 سال ءَ برجاھیں بلوچ راج ءِ نوکیں گوریلہ جنگ ءَ پاکستانی پوج پْروش ءِ آماچ اِنت ءُ مستریں سبب ئِے ایش اِنت کہ بلوچ راج گوں پاکستان ءَ نپرت کنت پمیشکا بی ایل اِے چہ یک گوریلہ گلے ءَ بدل بوتگ ءُ یک سرجمیں راجی لشکرے جوڑ بوتگ پمیشکا چہ 2023 ءِ اُرشاں سال 2024 ءَ ارش %70 گیش بوتگ اَنت۔ بلوچ آجوئی لوٹوکیں گل بی ایل اے ءُ بی ایل ایل ءَ سک دیمروی کُتگ۔ بی ایل اِے ءَ یک راجی لشکر ءِ وڑ ءَ شپیشل جنگی یونٹز، مجید برگیڈ ءِ وڑیں ایلیٹ کلاس ءِ جانّدْری گل ءُ انٹیلیجنسی گل زِراب ھم اڈ داتگ اَنت کہ انی پاکستان ءِ ھلاپ ءَ شریں دابے ءَ کار کنگ ءَ اَنت۔ چی ایشی ءَ ھوار بلوچ راج ءِ تہ ءَ پاکستان ءِ ھلاپ ءَ یکشل ءَ نپرت پیداگ بوگ ءَ اِنت۔ پاکستانی سرسوجی گلIPCS ءِ رِد ءَ چہ اکبر بگٹی ءُ بالاچ مری ءِ شھادات ءَ پد بلوچستان ءِ آجوئی جنگ چہ سردار ءُ نواباں درکپتگ ءُ بلوچ ورناھیں رھشونانی دست ءَ شُت آیانی تہ ءَ زالبول ھم ھوار اَنت پمیشکا پاکستان ءِ واست ءَ دِگہ راہ ءُ سوج ھم نیست کہ گوں کَے ءَ گپ ءُ تْران بہ بیت؟
پاکستانی پوج زیت چہ اِے جنگ ءَ پْروش ایت ءُ بے اِزتی ءَ چہ بلوچستان ءَ درکپ ایت۔ دومی نیمگ ءَ باید اِنت راجی لشکر بی ایل اِے کوہ سلیمان ءِ دمگ انچوشکہ ڈیرہ مُراد جمالی، جھل مگسی، ڈیرہ بگٹی، جیکب آباد ءُ ڈیرہ گازی ھان ءِ دمگاں ھم بلوچ راجدوستی آشوب ءُ سرمچاراں ودی کنگ ءِ جھد بہ کنت پرچا کہ مارا وتی سرڈگار ءِ ھمُک انچ آجو کنگ اِنت۔ چہ آجوئی ءَ پد ءَ ھمے بلوچ راج ءَ ماں وانگجاھاں براھوئی ءُ بلوچی زبان ءَ دژمن ءِ زُلم ءُ جبر کِسہ ءُ راجدوستی وانینگ بیت کہ پاکستان ءِ دْروگیں مھر ءُ دوستی شُودگ ءُ ھلاس بہ بنت۔
شالا بلوچ راج وت ماں وت تپاک ءُ بلوچستان آزات بات، بلوچ راج وتی ماں وت ھمکوپگ، ھمگام ءُ ھمدرد بہ بات۔ شالا بلوچ راج یکمُشت ءُ راجمستری(جمھوری) بلوچستان دیمروی بہ کنات۔
