نبشتہ کار: آئیشہ بلوچ
چہ بولان ءِ ٹرین اُرش ءُ ماں نوشکی ءَ پاکستانی لشکر ءِ کاروان ءِ سر ءَ اُرش ءَ پد پاکستانی پوج ءَ وتی دْروگیں پارلیمانی مُلکار(سْیاستدان) یکجاہ کُتگ اَنت کہ بلوچ راجی لشکر بی ایل اے ءُ آئی ءِ ھمدستیں جنگولی گلانی ھلاپ ءَ بلوچستان ءَ یک بلاھیں ملیٹری آپریشنے ءِ پرمان دیگ بہ بیت۔ گِند ئے بلوچ راج ءِ سر ءَ اے نوکیں جنگے وَ نہ اِنت۔ وھدیکہ 27 مارچ 1948 ءَ پاکستان ءَ بلوچستان ءِ اُرش کُت ءُ ایردست کُت داں ھما روچ ءَ بلوچ راج یکشل ءَ پاکستان ءِ آپریشن ءُ زلم ءِ آماچ اِنت۔ پاکستان ءَ چہ وتی کُتگیں گْوست ءِ آپریشن 1948، 1956 ءُ 1973 ءَ ابید چہ نپرت ءَ دِگہ ھچ پائدگ نہ زُرت بلکیں ھمے جنگاں بلوچ راج ءِ تہ ءَ گیش باوری دات کہ بلوچ یک گلامے راجے ءُ اِے گلامی ءِ تھاروکی ءَ بلوچ ءِ زبان، دود، رواج ءُ اِزت لگتمال بنت۔ بلوچ راج ءِ ٹیل، گیس، تنگو، زِر ءُ دگہ ھُدا دادیں مڈّی لوٹ ءُ پُل ءِ آماچ بنت پمیشکا چہ 2003 ءَ شھید نواب اکبر ھان بگٹی ءُ شھید بالاچ مری ءِ سروکی ءَ بُنگیج بوتگیں انیگیں وھد ءِ جنگ بلوچ راج ءَ پہ وتی سرڈگار بلوچستان ءِ آجوئی ءُ راج ءِ وتواجھی ءَ وت بُنگیج کُت ءُ مرچی اے جنگ ءَ 23 سال اِنت کہ پاکستان پوج پْروش ءِ آماچ اِنت، بزانکہ بلوچستان ءِ تہ ءَ کدی آپریشن نہ اوشت اِت بلکیں یکشل ءَ برجاہ اِنت۔
پد ءَ زانتکاریں پاکستانی مُلکار ھم سرپد اَنت کہ پاکستانی پوج بلوچ راجی لشکر بی ایل اے ءَ پْروش دات نہ کنت بلکیں اے نوکیں جنگ ءَ پاکستان بلوچ راج ءِ زالبول، نودربر، اُستاد ءُ دِگہ زھرشانی کنوکانی سر ءَ زُلم کنت کہ بلوچ راج بہ تُرس ایت ءُ وتی راجی لشکر بی ایل اے پلہ مرزی مہ کنت پمیشکا ما گندگ ءَ اِیں کہ شال ءَ بِہ گِر داں کراچی ءِ لیاری ءَ پاکستان ءَ لس بلوچ ءِ سر ءَ نوکیں جنگے بُنگیج کُتگ ءُ دیم ءَ ماھرنگ ءُ سیمی دین ءِ نزیکیں مردم اِے زلم ءِ شکار بنت۔ گِند ئے اِے پاکستان ءِ ناسرپدی اِنت پرچا کہ چہ ایشی ءَ بلوچ راج ءِ تہ ءَ گیش نپرت ودی بیت ءُ بی ایل اے بلوچ راج ءِ تہ ءَ گیش پاپولر بیت، بلوچ راجی آجوئی ءِ جنگ ءَ یک نوکیں ھاٹی یے رس ایت۔
چوناھا پْروش وارتگیں دژمن جنگ ءِ گڈسر ءَ زلم کنت ءُ بلوچ راج ھم چہ 1948 ءَ یکشل ءَ پاکستانی پوج ءِ کُشت ءُ کوش، زُلم ءُ زوراکی ءِ آماچ اِنت ءُ اِے زُلم ءُ جبراں راج ءِ لس وانِندگیں مھلوک پہ راجی آجوئی ءَ آگاہ ءُ یکجاہ کُت اَنت۔ مرچاں چہ دُژمن ءَ اے زھر ءُ نپرت ءِ آسر ءَ بلوچ راجدوستی ءَ سک دیمروئی کُت ءُ مرچی بلوچ راجی لشکر بی ایل اِے ءُ آئی ءِ جان ندری گل مجید برگیڈ، بی ایل ایپ ءُ بی این اے وڑیں سِلاھبندیں گلانی رھشُون لس بلوچ وانِندگ اَنت ناں کہ سردار ءُ نواب اَنت۔ اے پنجابی ءِ زورانسری ءِ آسر اِنت کہ بلوچ جُھد ءِ تہ ءَ شھید ریھان بلوچ ءُ سرمچار بانُک شاری بلوچ ءِ وڑیں بازیں سرمچار ودی بوتگ اَنت ءُ پہ بلوچستان ءِ آجوئی ءُ دُژمن ءِ پْروش دیگ ءَ مرچاں ایشانی ھزاریں رندگیر ھست۔
گْوش اَنت کہ داں وھدے کہ تو یک جیڑھے ءَ سرپد مہ بَہ ئے کہ جیڑہ ءِ بُنیات ءُ جِند چے اِنت؟ یا گْوش ئے کہ اِے جیڑہ زاناں چون ودی بوتگ؟ تو آ جیڑہ ءَ گیش ءُ گیوار کُت نہ کن ئے پمیشکا یک جیڑھے ءِ گیش ءُ گیوار کنگ ءَ پیسر جیڑہ ءِ جِند وانگ ءُ زانگ لوٹ ایت، جیڑہ پھم لوٹ ایت گُڑا ما ھمے جیڑہ ءَ گیش ءُ گیوار کُت کن ایں۔ ھمے پیم ءَ ماں یک مُلکے ءَ مُلکاری جیڑہ ھم ھما وھد ءَ گیش ءُ گیوار بنت وھدے کہ آ مُلک ءِ لس مھلوک ءُ آ مُلک ءِ مُلکار آ جیڑھے ءِ جِند ءَ سرپد بہ بنت۔ وھدے کہ ماں یک مُلکے ءَ یک مُھکمیں راجمستری(جمہوری) سرکار ءُ بودناکیں رھشُون بنت آ مُلک وتی جیڑھاں پھم اَنت ءُ جیڑہ گیش ءُ گیوار کن اَنت بلے پاکستان ءِ وڑیں وتگڑیں مُلکے کہ آئی ءَ ناں بودناکیں رھشُونے ھست ءُ ناں کہ اِے دْروگیں مُلک ءَ راجمستری یے بوتگ پمیشکا آ بلوچستان ءِ جیڑہ ءَ چون دلگوش ءُ سرپد بوگ ءَ تیار بنت؟ اے زلم ءُ نپرت بلوچ راج ءَ گیش ھاٹیگ دنت ءُ بلوچ راج وتی آجوئی ءِ جنگ ءَ سوبین بیت۔
بلوچ راج شالا تپاک ءُ یکمُشت، وتی ڈیھ ءِ وتواجہ ءُ بلوچستان شالا آجو بات، آزات، آزات ھیال ءُ راجمستری بلوچستان شالا دیمروئی بہ کنات۔
