سرگْوستے پہ شھیدانی نام ءَ

نبشتہ کار: ساگر نور

  نمیرانیں وھید جان تئی مھروانی ءِ کسّھاں ھرچی بہ کن آں کم اِنت۔ من ءَ یات اِنت کہ 2014 ءَ من ءُ تو سپرے ءَ راہ دیگ بوتیں، من ءُ تو ھوری ءَ دیم پہ آواران ءِ راہ ءَ روگ ءَ اِت ایں۔ گُڑا ھمے روچ ءَ سک  ھور بوت ءُ کوراں آپ آؤرت۔ مارا پرپٹ ھم گون اَت، آپانی تہ ءَ جنان کُرت ءُ دیم ءَ شُتیں۔ کور ءِ در آیگ ءِ جاگہ مئے پرپٹ ھراب بوت ءُ من ءُ تو سک ھزاب بوتیں، بلے سک مسکرائی کُت ءُ گْوشت کہ مہ بوتیں اے راہ گوں دوری ءَ مارا پہ اے ھال ءَ کُتگ ئِے۔

گُڑا پہ سزائی یے پرپٹ تئی مردمے ءِ میتگ ءَ بُرت ءُ سر کرت۔ تو دومی روچ ءَ پرپٹ برت ءُ شر کُت۔ گُڑا من ءُ تو یک ھپتگے ھمود ءَ بوتیں، تو وتی کار کُت اَنت ءُ گْوشت کہ بیا رو اِیں، گُڑا من ءُ تو درکپت این ءُ دیم پہ گچک ءَ اتک اِیں۔ لھتیں وھد ءَ رند ترا دیست، تو گْوشت سنگتانی ھمراھی ءَ گوں برو اَنت تو چے گْوش ئے؟  من پسو دات تو گیشتر وت زان ئے کہ اِے دُژمن مارا نہ بکشا اِیت۔ مرچی بیت یا باندا مارا تاوان دنت۔ھمے وھد ءَ گچک ءَ لشکر اَتکگ اَت، لشکر سک آپریشن کنگ ءَ اَت۔ تو گْوشت کہ من گوں سنگتاں رو آں کہ ھال کُرگ اَنت۔ من ءَ یات اِنت تو (2016) ءَ آزاتی ءِ جُھد ءَ ھوار بوت ئے ءُ سلاہ بند بوت ئے۔ یک  شریں زمہ داریں سنگتے جوڑ بوت ئے۔ ترا وتی ھند ءِ زمہ داری ھم گون اَت، دلیر ءُ نتُرسیں مردمے اَت ئے۔

چوش کہ شھید وھید سکیں مھروان ءُ مسکرائی کنوکیں سنگتے اَت ءُ گوں من گیش یکجاہ بوتگ۔ من مُدام ترا گیر کاراں، تئی مسکرائی ءُ مھروانیاں۔

 ھمے وڑ ءَ 15 اگست 2020 ءَ لشکر گچک ءُ لاٹیار ءَ اَتک، گُڑا سنگتاں گْوشت کہ لھتیں پرپٹ اَتکگ کنڈگ ءِ پُشت ءَ بوت کنت کہ لشکر بہ بیت۔ گڑا اِے وھد ءَ شھید وھید ءِ گس ءَ شھید پِدا ءُ دگہ ھم  لھتیں سنگت بیت، گُڑا سنگتاں گْوشتگ بیا رویں لشکر ءِ راہ ءَ گریں۔ اگاں بئیت جْوان جنانے، گُڑا شھید وھید ءُ شھید پِدا گِس ءَ  چہ در کاینت دیم پہ راہ ءِ نیمگ ءَ رو اَنت۔ راہ ءِ سر ءَ سر بنت ءُ لشکر کئیت۔ گُڑا پِدا ءُ وھید جنگ دے اَنت داں دیر ءَ بالی گراب کاینت، تیرگواری کن اَنت ءُ دگہ لشکر ایر کن اَنت۔ بازیں جاگہ ءَ لشکرکشی بندات بیت، گوں بالی گراباں شھید وھید ءُ شھید پِدا باز جنگ دے اَنت داں دیر ءَ بالی گراب گرد ءُ چرّ کن اَنت،  گُڑا شھید پِدا جان ءَ لشکر شھید کنت ءُ شھید وھید جان انگت داں دیر ءَ جنگ دنت ءُ گُڈی ءَ لشکر انچوش لاچار بنت کہ دستی بمب جن اَنت ءُ شھید وھید جان ءَ شھید بیت۔

اِے وھد ءَ ما ھم گِس ءَ نہ ایں، اُود ءَ لاٹیار کہ لشکر آپریشن ءَ بندات کنت۔ سولیر ءُ گچک، دُراسکی ءُ مُشکے ءَ داں ھپت روچ ءَ پاکستانی لشکر ءِ لشکرکشی برجاہ بوت۔ ھپتمی روچ ءَ لشکر واتر بوت ءُ ھند اش یلہ دات  سنگتے ءَ گوں واکی ٹاکی ءَ ھال کُت کہ دو سنگت شھید کنگ بوتگ۔ سنگت ءَ گْوشت یکے شھید وھید جان ءُ دومی سنگت شھید پِدا جان اِنت۔ ملکموت ءَ سبر نہ کُت، بلے شھید نمیران اَنت۔