نمدی یے پہ شھید سکندر جان ءَ

نبشتہ کار: اکرم شوھاز

سکندر جان، تئی روگ ءَ من ءَ باز تور اِت۔ سک دیر اِنت کہ منی دل ءَ لوٹ اِت کہ پہ تو نمدی یے نبشتہ بہ کن آں۔ بلے من ءَ وھد ءَ موہ نہ داتگ۔ من ءَ پھل بہ کن۔ من زان آں اے نمدی ترا سر نہ بیت، بلے اے منی دل ءِ واھگ بوتگ کہ من پہ تو نمدی یے نبشتہ بہ کن آں۔

من ءَ یاد بیت کہ من جاھے ءَ شُتگ اِت آں، بیگاہ ءِ وھد ءَ واتر بوت آن ءُ دیم پہ وتی میتگ ءَ من اَتک ءُ وتی منزل ءَ سر بوت آں۔ بلے منی دل ءَ باز واھگ ھستگ اَت کہ انشپی من وتی سنگتاں گور بہ رو آں۔ من وت ءَ تیار کُت، من جانے شودان ءُ پہ سنگتانی نیمگ ءَ رو آں بلے من چوش نزانت کہ ملکموت چوش زیت کیت۔ من جان شُشت ءُ وتی سرگ ءِ رَندگ ءَ ات آں۔ من وتی گوانکو زُرت ءُ دامگ ءَ کُت۔ من وھدے کہ چار اِت لھتیں لمبر ءَ سیاھیں شپ وزیت ءَ ایر اِنت۔ من یکبرے بھمانگ ءُ ھبکہ بوت آں۔ سک جیڑ اِت منی دل ءَ من ءَ باز پرما کُت کہ جُست بہ کن آں بلے من وت ءَ داشت۔ دمانے گوست یک سنگتے ءَ من ءَ کلوے دات کہ اَڑے تو سھیگ ئے؟

من پسہ دات کہ یار اناں چی بوتگ؟ پسہ ئِے دات کہ تو انگت سھی نہ ئے؟ من پسہ دات اناں پُل چے بوتگ؟ من ءَ گُشت ئِے کہ اَڑے مھروانیں سکندر جان شھید بوتگ۔

چہ اے گپ ءِ اشکنگ ءَ  من یکبرے پْرُشت آں۔ یک دمانے ءَ بے توار بوت آن ءُ پد ءَ سنگت جُست کُت کہ اے گپ کہ تو گُشت زاناں اے راستے؟ پسہ ئِے دات ھو پُل اے راستے۔ منی گوانکو چہ دست ءَ لگُشت ءُ کپت۔ من سک بے ھاٹیگ بوت آں۔ بلے پد ءَ من جیڑ اِت کہ اے جَنَگے اد ءَ چوشیں کار بیت ءُ پیسر ءَ بوتگ۔ من وتی دل سک ڈڈ کُت۔

وھدے کہ بیگاہ ءِ موسم کیت۔ تئی ترانگ ءُ تئی کندگانی توار من ءَ سک بے ھاٹیگ کن اَنت۔ وھدے کہ بیگاہ ءِ وشیں کوش کش اِیت۔ تئی یات  کیت ءُ من ءَ سک بے ھاٹیگ کنت۔

یک مرچے من ءَ یات بیت منی ھیال ءَ 2018 ءِ سال اَت۔ رمس من ءَ وَ یات نہ بیت بلے من، تو ءُ دگہ سنگتے نشتگ اِت ایں۔ ھمد ءَ سنگت ءَ ھبرے گُشت تو چتور کند اِت؟ من اوں سک کند اِت۔ بلے تو  سک کند اِت۔ پد ءَ تو من ءَ گُشت کہ اَڑے بس کن۔ واجہ مارا ھبر دنت ءُ بے ازت کنت۔ من بس کُت بلے اے کندگ ءَ من ءَ لاچار کُت۔

پد ءَ من ءُ تو گِستا بوت ایں۔ وھد روان بوت۔ دانکہ 2022 اَت۔ من ءُ تو دُچار کپت این ءُ ترا بلے ھما ھبر یات اَت۔ تو من ءَ درائیت کہ ترا یات بیت ھما روچ؟ من گُشت ھو پُل دانکہ من زندگاں اے ھبر منی دل ءَ نہ روت۔ تو سک کند اِت تئی کندگانی توار انگت منی گوشاں مان اِنت۔ تئی کندگانی تواراں من ءَ سک بے چاڑ کُتگ۔

من ءُ تو جاھے ءَ نشتگ اِت ایں۔ ھور ءِ موسم اَت۔ تو من ءَ گْوشت کہ اَڑے شوھاز تو بہ رو دارے چِن ءُ بیار۔ چاھے اڑ کن ایں۔ من گْوشت اناں من ءَ واک نہ کنت۔ تو چاہ ور ئے، بہ رو دار بیار۔ اگاں نہ ور ئے گُڑا بہ نند۔ تو کند اِت ءُ گْوشت تو زاناں منی کجام ھبر ھاں کُتگ کہ نی تو اے ھبر ءَ بہ زور ئے؟

من کند اِت ءُ گْوشت اناں جان من مسکرائی کن آں۔ من کہ تئی ھبر ءَ مہ زوراں۔ گُڑا کئی ھبر ءَ زوراں۔ گُڑا جمبر ءَ بستگ اَت ترمپ ترمپ ءَ ھور رچیگ ءَ اَت۔ موسم دلکش اَت۔

 ھمبل تئی جاہ وشبات پُل۔

دانکہ دنیا ھست، تو مئے ھیالانی توک ءَ زندگ ئے۔

دریگتیں ملکموت ءَ چوش مہ کُتیں۔