نبشتہ کار: ساگر نور
اکرم جان، چہ تئی روگ مارا سک درد بوت۔ تئی بچکند انگت منی چمانی دیم ءَ اَنت ءُ مُدام تو کندگ ءَ ئے۔ من ءَ یات اِنت کہ 19, مارچ 2018 ءَ وھدیکہ من ءُ تو گوں دگہ لھتیں سنگتانی ھمراھی ءَ کور ءَ پہ پِکنک ءَ شُت ایں۔ گُڑا تو پہ کندگے ءَ گْوشت کہ اِے یاتگاری پکنکے دوبر باریں چوشیں پکنک بیت یا نہ بیت کہ ما پد ءَ بیا این ءُ پکنک بہ کن ایں۔
سنگتاں درائینت کہ بیت بلے تئی گپ راست بوت اَنت پد ءَ نہ بوت دومی روچ ءَ تو گوشت کہ بیا، گِاس ءَ رو ایں۔ پد ءَ من ءُ تو لوگ ءَ اتک ایں۔ ھمے روچ ءَ من گوشت کہ من رو آں گُڑا دو سے روچ ءَ پد کایان ءُ پد ءَ وتی ڈگار ءِ سر ءَ رو ایں
من ءَ گوشت ئِے کہ دیر مکن من ءَ تھنا روگ وش نہ بیت پد ءَ شھید ءَ گشت کہ من وتی لوگ ءَ لَڈین آن ءُ پیسری ئیں جاگہ ءَ بر آں گُڑا تو بیا من ءُ تو مُلک ءِ سر ءَ رو ایں۔ گُڑا من موکل کُرت، منی دست چُک اِت ئِے ءُ پہ بچکندے ءَ گشت ئِے روگ ءَ ئے؟
من گڑا دیم پہ وتی لوگ ءَ شُت آں شپ ھمے یکیں بوت سُھب ءَ سنگتے ءَ ھال کُت کہ سولیر ءَ پاکستانی لشکر آتکگ ءُ لوگ پہ لوگ ءَ پٹ ءُ پول کنگ ءَ اِنت ءُ توپکانی توار ھم بوتگ گُڑا من اِے گپ اشکرت سک پریشان بوت آں دگہ سنگتے ھمد ءَ اَت من ھمراہ کُت ءُ دیم پہ سولیر ءَ نیمگ ءَ شُت آں۔
راھ ءَ سنگت دیست اَنت، سنگتاں ھمے گْوشت کہ پوج آتکگ ءُ اکرم جان ءُ ناکو گلام کادر پوج ءِ تہ ءَ کپتگ اَنت ءُ تِیرانی توار بوتگ گُڑا ما چہ جاہ ءَ درکپتگ ایں اکرم جان ءُ ناکو گلام کادر ءِ انگت ھال نیست۔
گِند ئے اِے روچ 22 مارچ 2018 اَت،بزانکہ شھیدانی شھادت ءِ روچ اِنت۔ گُڑا دومی روچ ءَ من گوں سنگتاں شُت آں ھما جاگہ چار اِت ءُ دیست کہ شھید اکرم جان ءَ جْوان جنگ داتگ ءُ کمو دیم ءَ شُتگ شھید بوتگ۔ پد ءَ شھید ناکو گلام کادر ھمے جاگہ کہ پوج ءِ تہ ءَ کپ ایت ھمے جاگہ ءَ کمو دیم ءَ پوج شھید کنت ئِے ما جاگہ چار ات ءُ دیم پہ گِس ءَ شُت ایں لوگ ءِ مردم اِے گپ ءَ سرپد اَت اَنت ءُ گشت اِش کہ چہ توپکانی توار ءَ رند پوج ءِ لھتیں گاڑی اتکگ اَنت ءُ دیم پہ پشتُکو ءَ شُتگ اَنت ما زانتگ کہ اکرم جان ءُ ناکو گلام کادر شھید کنگ بوتگ اَنت ھمے وڑ ءَ دانکہ پانزدہ روچ آپریشن بوت پوج ءَ پد ءَ آپریشن سولیر ءَ ھلاس کُرت ءُ شُت شھید اکرم جان ءُ شھید ناکو گلام کادر شھید کُت اَنت ئِے۔
شھید نمیران اَنت، شھید انی ھون آجوئی ءِ پُل رُدین ایت۔
