نبشتہ کار: ماھروچ بلوچ
اگاں ما پاکستان ءِ انیگیں جاوراں چار ایں گُڑا سما بیت کہ پاکستان ءِ ھالات روچ ماں روچ ھراب بوگ ءَ اَنت ءُ پاکستان یکشل ءَ یک سول وارے ءِ نیمگ ءَ روگ اَنت۔01 مارچ ءَ پاکستان پوچ ءِ پلامرزیں مُلا ھمیدالھک ھکانی ءِ سر ءَ وتکُشی اُرش، چہ ھمے اُرش ءَ مُلا گوں وتی بازیں مردماں ھوار کُشگ بوت۔ چہ ایشی ءَ نیکراھی گل پوج ءِ ھلاپ ءَ بنت ، 04 مارچ ءَ بنّوں شھر ءَ پاکستانی لشکر ءِ بنجاہ ءِ سر ءَ ٹوھیں وتکُشی اُرش، اوگانستان ءُ پشتونستان تورکم سیمسر ءِ یکشلیں جنگ ءُ تیوگیں بلوچستان ءِ آجوئی جنگ کہ بلوچ راجدوست پاکستانی لشکر ءُ راجدْرواں پْروش دیگ ءَ اَنت۔ پاکستانی سیاسدان ءُ جنگی بلد بے تُرس ءَ گْوشگ ءَ اَنت کہ بلوچستان آجوئی ءُ پشتونستان سول وار ءُ تباھی ءِ نیمگ ءَ روان اَنت۔ بزانکہ پاکستان مرچاں بازیں جاھاں گٹ ءُ بے واک اِنت۔
یک نیمگے ءَ گوں نیکراھی گل ٹی ٹی پی، ھاپز گلبھادر ءُ جمائیت الھرار، دومی نیمگ ءَ گوں بلوچ راجدوستیں گل بی ایل اے، بی ایل ایپ، بْراس ءِ دْروشم ءَ گوریلہ جنگول ءُ زُلم ءُ زوراکیانی آماچیں سرجمیں بلوچ راج ءِ گوں پاکستان ءَ نپرت ءُ سیمی نیمگ ءَ گوں اوگانسان ءَ ھم جنگی جاور اَنت ئِے۔ پد ءَ سیاسی جیڑہ ءُ پنجاپ ءِ تہ ءَ پاکستانی لشکر ءِ بدنامی شُمئے دیم ءَ اَنت۔
دُنیا ءِ ھر وڑیں زانتکار پاکستان ءِ مرچیگیں ھالتانی بابت ءَ گْوش ایت کہ پاکستان یک رندے پد ءَ1971 ءِ وڑ ءَ بلاھیں لوگی جنگے (سول وارے) ءِ نیمگ ءَ روگ ءَ اِنت ءُ اے لوگی جنگ پاکستان ءَ 1971 ءِ وڑ ءَ پْروش ایت۔ چہ ایشی ءَ ابید پاکستان ءِ بازیں نامداریں پنجابی زانتکار ءُ شھزانت واجہ ھامد میر، نجم سھیٹی کامران ھان ءُ جاوید چوھدری ءَ ھوار دِگہ باز ءَ بازیں وھد ءَ گْوشتگ ءُ انگت ھم گْوشگ ءَ اَنت کہ پاکستان زیت یک لوگی جنگے ءِ آماچ بیت ءُ پْروش ایت۔ ما سرپدی دے ایں کہ لوگی جنگ چے ءَ گْوش اَنت؟ اِے لوگی جنگ بزاں سول وار چون ودی بیت ءُ ایشی ءِ بُندری لوٹ چے ءَ اَنت کہ چَہ آیاں زانگ بیت کہ یک مُلکے ءِ تہ ءَ یک لوگی جنگے ودی بیت۔ زاناں پاکستان ءَ اِے دْراھیں چیز ھست اَنت کہ پاکستان ءَ یک لوگی جنگے روک بہ بیت؟
وھدے کہ یک مُلکے ءِ دستور(Constitution) لگتمالی ءِ آماچ بیت ءُ پد ءَ ھر سیاسی گلے پہ وتی سیت ءِ ھاتر ءَ چَپیں گلانی ھلاپ ءَ سِلاہ چِست بہ کنت گُڑا مُلک ءِ تہ ءَ اِے وت ماں وتی جنگ ءَ انگریزی ءَ سول وار گْوش اَنت۔ بزانکہ ماں اے جنگ ءَ ھر گلے لوٹ ایت کہ مُلک منی مُلکاری سسّا ءُ لیکھانی رِد بہ جُنز ایت۔ اے جاور ھما وھد ءَ ودی بنت وھدے کہ مُلک ءِ دستور نزور بہ بیت ءُ راجی لشکر ھم سیاسی لب ءُ لالچ ءِ دُچار کپ ایت۔ اگاں مرچیگیں وھد ءِ آزات ھیالیں بلوچ آجوئی جنگ، ملائی ٹی ٹی پی ءِ جنگ ءَ ھوار پاکستان ءِ سیاسی ءُ پوج ءِ بدنامی ءَ بچار ئے پاکستان وَ تباہ اِنت۔ ایشی ءَ ابید دِگہ بازیں لوٹ ھم ھست اَنت ءُ پاکستان ءِ وڑیں مُلکے ءَ اے دْراھیں چیز ھست اَنت ءُ پاکستان ءِ رَدیں شوندات(Policies) ءُ بے رھشونی ءِ سوب ءَ پاکستان یکشل ءَ کوچات ءِ نیمگ ءَ روان اِنت۔
مستریں گپ ایش اِنت کہ وھدے امریکہ چہ اوگانستان ءَ درکپت گُڑا امریکہ ءِ روگ ءَ پد اوگانستان ءِ تہ ءَ امن ءُ پاکستان ءِ تہ ءَ بلوچ راجدوست ءُ ٹی ٹی پی ءِ جنگی اُرش یکشل ءَ تْرُند بوتگ اَنت۔ مرچاں پاکستانی سرسوجی گل (تنک ٹینک) انسٹیٹوٹ آپ پِیس اینڈ کنپلکٹ اسٹڈی(IPCS) ءِ رِد ءَ چہ 2023 ءِ اُرشاں سال 2024 ءَ ارش %70 گیش بوتگ اَنت۔ بلوچ آجوئی لوٹوکیں گل بی ایل اے ءُ بی ایل ایل ءَ سک دیمروی کُتگ۔ بی ایل اِے ءَ یک راجی لشکر ءِ وڑ ءَ شپیشل جنگی یونٹز، مجید برگیڈ ءِ وڑیں ایلیٹ کلاس ءِ جانّدْری گل ءُ انٹیلیجنسی گل زِراب ھم اڈ داتگ اَنت کہ انی پاکستان ءِ ھلاپ ءَ شریں دابے ءَ کار کنگ ءَ اَنت۔ چی ایشی ءَ ھوار بلوچ راج ءِ تہ ءَ پاکستان ءِ ھلاپ ءَ یکشل ءَ نپرت پیداگ بوگ ءُ گیش پیداگ بوگ ءَ اِنت۔ پاکستانی سرسوجی گلIPCS ءِ رِد ءَ چہ اکبر بگٹی ءُ بالاچ مری ءِ شھادات ءَ پد بلوچستان ءِ آجوئی جنگ چہ سردار ءُ نوابانی دست ءَ درکپت ءُ بلوچ ورناھیں رھشونانی دست ءَ شُت آیانی تہ ءَ زالبول ھم ھوار اَنت پمیشکا پاکستان ءِ واست ءَ دِگہ راہ ءُ سوج ھم نیست کہ گوں کَے ءَ گپ ءُ تْران بہ بیت؟
اگاں ما ھورت بچار ایں مرچاں پاکستان ھم ٹی ٹی پی ءُ بلوچ راجدوستیں جنگولانی یکشلیں اُرشاں بے وانک ءُ ژند اِنت۔ پاکستان ءَ بی ایل اِے ءُ ٹی ٹی پی ءِ جیڑہ میان اُستمانی گل UN سیکورٹی کونسل ءَ ھم بُرت ءُ پریات ئِے کُتگ باید اِنت اوگانستان اے گلانی ھلاپ ءَ کار بہ کنت اگاں ناں ما پْروش ور ایں پمیشکا جیڑہ ءِ گیش ودی کنگ ءَ پاکستان گوں اوگانستان ءَ جنگ ھم کنت کہ وتگڑیں ارب مسلم ممالک ءُ چین مئے جنگ ءِ میان ءَ بیا اَنت ءُ پاکستان چہ ٹی ٹی پی ءُ بی ایل اے ءَ رکینگ بہ بیت۔ البت پاکستان ءِ اِے پارمولا نہ چَل اَنت ءُ زوت ٹی ٹی پی جنگ ءَ ھم پنجاب ءِ تہ ءَ بارت ءُ سلام آباد ءُ روالپنڈی ءَ دستیگ کنت۔ پاکستان ءِ اِے نگیگیں جاور پہ بلوچستان ءِ آجوئی ءِ مستاگے۔ باید اِنت بلوچ راج پہ راجی آجوئی ءَ وت ماں وت یکجاہ ءُ یکمُشت بہ بیت۔ بزانکہ ھمے میان ءَ بی ایل اے ھم جنگ ءَ تْرُند کنت۔ پد ءَ پاکستان ءِ لشکر چہ بلوچستان ءَ درکپ ایت ءُ بلوچ راج ڈیرہ گازی ھان ءَ بِگر داں سند ءِ ایردستیں بلوچ دمگ ءُ کراچی ءَ ھوار وتی سرجمیں بلوچستان ءَ دستیگ ءُ واجھی کنت۔ دومی نیمگ ءَ باید اِنت بی ایل اے ءُ راجی لشکر بْراس کوہ سلیمان ءِ دمگ انچوشکہ ڈیرہ مُراد جمالی، جھل مگسی، ڈیرہ بگٹی، جیکب آباد ءُ ڈیرہ گازی ھان ءِ دمگاں ھم بلوچ راجدوستی آشوب ءُ سرمچاراں ودی کنگ ءِ جُھد بہ کنت پرچا کہ مارا وتی سرڈگار ءِ ھمُک انچ آجو کنگ اِنت۔ چہ آجوئی ءَ پد ءَ ھمے بلوچ راج ءَ ماں وانگجاھاں براھوئی ءُ بلوچی زبان ءَ دژمن ءِ زُلم ءُ جبر کِسہ ءُ راجدوستی وانینگ بیت کہ پاکستان ءِ دْروگیں مھر ءُ دوستی شُودگ ءُ ھلاس بہ بنت۔
شالا بلوچ راج وت ماں وت تپاک ءُ بلوچستان آزات بات، بلوچ راج وتی ماں وت ھمکوپگ، ھمگام ءُ ھمدرد بہ بات۔ شالا بلوچ راج یکمُشت ءُ راجمستری(جمھوری) بلوچستان دیمروی بکنات۔
