نبشتہ کار: چراگ بلوچ
بلوچی مئے وتی شهدیں زبان اِنت باید اِنت کہ ما بلوچی ءِ دیم ءَ برگ ءِ هاتر ءَ جُهد بہ کن اِیں ءُ بلوچی ءَ دیم ءَ بہ بر اِیں۔ بلوچی چون دیمروی کنت؟ مارا پہ بلوچی زبان ءِ دیم ءَ برگ ءِ واست ءَ چے کنگ لوٹ اِیت بلوچی زبان پرچا چوش پشت ءَ اِنت پرچا بلوچی گار ءُ بیگواه بوگ ءَ اِنت؟ پرچاکہ ما گلام ایں ءُ هر وھدیکہ یک راجے گُلام بیت گڑا زورگر پیسر ءَ آئی ءِ زبان ءِ هلاس کنگ ءِ جهد کنت پرچاکہ زبان راجانی پجّار اِنت۔ بید زبان ءَ راج زندگ نہ مان اَنت اَگاں یک راجے ءِ زبان گار ءُ بیگواه بوت گڑا آ راج هم گار ءُ بیگواه بیت-
بلے بژن ءِ گپ اِنت کہ مئے راجی زبان براھوی ءُ بلوچی هم گار ءُ بیگواه بوگ ءَ اَنت پرچاکہ ما وت وتی زبان ءَ گپ ءُ تران نہ کن ایں، نبشتہ نہ کن ایں، وتی زبان ءَ وت گار کنگ ءَ ایں۔ اگاں ما بہ چار ایں گڑا دِگہ زبانانی مردم وتی زبان ءِ کدر ءَ چنچو کن اَنت؟ وتی زبان ءَ وان اَنت، نبشتہ کن اَنت ءُ وتی زبان ءَ هبر کن اَنت- وتی زبان ءَ اِزّت دے اَنت بلے مئے نزوری ءَ بچار. کہ ما وتی زبان یلہ داتگ ءُ دِگہ زباناں هبر کن اِیں۔ ما وتی زبان ءَ نہ وان اِیں ءُ نبشتہ نہ کن ایں۔ شر وتی زبان ءَ گپ ءُ هبر ھم نہ کن ایں-
مئے کِرّ ءَ بازیں مردم هست اَنت کہ آ گْوش اَنت بلوچی وانگ ءَ هچ پائدگ نیست ما سائنس وان ایں ءُ دربر ایں بلوچی وانگ ءَ مارا چے رس اِیت؟ اِے گپ نہ اِنت کہ انگلش، سائنس ءُ آ دِگہ زباناں مہ وان اِت، بِہ وان اِت بلے وتی زبان ءَ ھم بِہ وان اِت۔ اگاں شُما یک روچے ءِ تہ ءَ یک ساھتے یک بلوچی دْرونتے یا نبشتانکے بِہ وان اِت۔ نبشتاری چیدگ ءُ بلوچی بُنرھبندی چیزاں زانگ ءِ جھد کن اِت گڑا یک ماه ءِ تہ ءَ بلوچی نبشتہ کنگ ءُ وانگ ءَ زبر بہ اِت۔
بلے مئے ناسرپدی ءَ بچار ما پہ دِگہ زبانانی وانگ ءَ کُجا رو اِیں دِگہ زباناں وانان ءَ دْربر ایں بلے وتی زبان ءِ وانگ واست ءَ مارا یک ساھتے ءَ هم موه نہ رس اِیت۔ مارا وتی زبان وانگ ءُ دْربرگ لوٹ اِیت اَگاں ما وتی زبان ءَ وت مہ وان ایں ءُ نبشتہ مہ کن ایں گڑا مئے زبان هچبر دیمروی نہ کنت ءُ زبان ءِ دیمروی هاتر ءَ مارا سک باز جهد کنگ لوٹ اِیت اَگاں نہ کت گڑا مئے زبان گار ءُ بیگواه بیت۔
مرچیگیں انٹرنیٹ ءِ زمانگ ءَ هرکس وتی گس ءِ تہ ءَ هم بلوچی ونت کنت مارا پہ بلوچی وانگ واست ءَ دِگہ جاهاں روگ هم نہ لوٹ اِیت اَگاں یک روچ ءِ یک راجْدوستی ءُ زبان دوستی نبشتانکے بْوان اِیں گڑا ما زوت بلوچی ونت ءُ دْربرت کن ایں ءُ یک نبشتہ کارے جوڑ بوت کن ایں- بلوچی وانگ هم پہ ماں سک آسان اِنت پرچاکہ بلوچی مئے وتی ماتی زبان اِنت پمیشکا بلوچی وانگ پہ ماں آسان بیت گڑا باید اِنت ما جهد بہ کن ایں ءُ وتی زبان ءَ بْوان ایں ءُ دیم ءَ بہ بر ایں، وت بلوچی بہ وان ایں وتی راج ءَ هم بْوانین ایں۔
بس جُنزان کن اِت، بلوچی ءِ وانگ ءُ دْربرگ ءَ دلپروش بوگی نہ اِنت دیم ءَ جُنزگ ءُ منزل ءَ سر بوگی اِنت-
زُبان دوست ءُ راجدوستیں بلوچ بات اِت، وت ماں وت تپاک، ھمکوپگ ءُ ھمدست بات اِت۔ بلوچ راج، بلوچی ءُ آزات ھیال ءُ راجمستری بلوچستان دیمروی بکنات۔ شالا سوبین بات اِت۔
