جنگ ءِ گْرانیں ساھت

نبشتہ کار: میرک بلوچ

من ءُ جوگی پیسلہ کُت کہ مرچی مزنیں کیمپ ءِ سر ءَ اُرش کنیں، چوناھیا اے مئے اولی اُرش نہ اَت، بلکیں مارا سالے سرجم اَت کہ ما پارٹی جوائن کُتگ اَت ءُ بازیں جاھاں دژمن ءِ کسانیں چوکیانی سر ءَ گوں راکٹ، لانچر ءُ وتکاریں سلاھانی سر ءَ کسانیں اُرش کُتگ اَت، اے مئے اولی بر اَت کہ ما بُنجاھی کیمپے ءِ نشانگ کنگ ءَ روگ ءَ اَت اِیں۔

ما سنگت ھال کُت اَنت کہ ما مزنیں کیمپ ءِ سر ءَ اُرشے کن اِیں، یک برے سنگتاں مکن کُت بلے ما باز زور دات کہ مئے ایکسپیرئنس گیشتر بیت ءُ وت شوکتر بہ اِیں گُڑا اُستاد ءَ مارا موکل دات۔ شپ ءَ ما مھلہ موتر زُرت ءُ سنگتے ءِ سور ءِ بھانہ ءَ چہ گِس ءَ در کپتیں،  کساس نیم کلاک ءَ رند ما مزن کیمپ ءِ نزیک ءَ سر بوتیں ما موتر پسیل ءِ پُشت ءَ اُوشتارینت دیم ءَ کسانیں راہ ءِ پشت کپتگ اَت کہ ما ایشی ءَ پادانی ءَ روگ ءِ پیسلہ کُت کہ واتری دژمن مئے موتر ءَ نشان مہ کنت۔ ما کیمپ ءِ سک نزیک ءَ اتک اِیں کساس 50 میٹر ءَ نزیک اَت اِیں گُڑا جوگی پیپ کوپگ ءَ کُت من جُست کُت کجام مورچہ ءَ جن ئے یا میان ءِ کوٹی ءَ جن ئے؟ منی ھیال ءَ گْوشت ئے سبر وڑ ءُ پیم ءَ چاراں، من گِنداں پیپ کوپگ ءَ کُت ءُ پوزیشن گپت من تُپنگ چیمبر ھم نہ کُرتگ اَت مورچہ ھم نہ گپتگ ءُ باریں چوں بلے من اے ساھت ءَ ھیالے ءَ شُت آں، یک وھدے من کسانیں تْرکگے اِش کُت من ءَ سما بوت کہ پیپ ءِ زد ءِ توار اِنت، بلے من انگت ھیال ءَ نہ اَت آں۔ یک وھدے بلائیں گُمبگے بوت من گِنداں راکٹ ءَ آس بُرت من گُڑ اِت آں ءُ ابکّہ بوت آں ءُ تپنگ ءَ چیمبر کنگ ءَ ھوار گْوشت، جوگی نیکبھت سر تو من ءَ ھال نہ دات، ءُ من پوزیشن گپت ءُ مورچہ ءَ نشانگ کنگ ءَ اَت آں، من میگزین سرجم ءَ نہ چنڈ اِت کہ دژمن ءَ مئے پوزیشن دیست ءُ ھمے نیمگ ءَ تیرگواری کنگ ءَ اَت۔ ما زُوت زُوت ءَ پسیل ءِ پُشت ءَ چیر بوت اِیں، انچوش کہ مارا پیسر ءَ سنگتاں گْوشتگ اَت کہ اے کیمپ والا سک جنت واکی سک جنگ ءَ اَت گوں مزنیں سلاھاں انچو پہ دیم تیرگواری کنگ ءَ اَت ءُ مارٹر گولا آس دیگ ءَ اَت۔

ما پسیل ءِ پُشت ءَ نشتگ اَت ایں کہ تیرگواری ءَ بس بہ کنت دانکہ ما در کپ اِیں، پرچا کہ ھمے جاگہ ءَ چہ مارا گْوزگی اَت اے جاگہ ءَ کیمپ ءَ گوں دیم پہ دیم اَت ءُ شر درا اَت، جوگی گْوشت ڈرون ءِ آواز اِنت من گوش رُپتاں منی ھیال ءَ ٹرکے ءِ آواز اَت۔ من گْوشت گاڑی یے، تیرگواری کم کنگ ءِ نام ءَ زانگ ءَ نہ اَت گُڑا من جوگی ءَ نادینت سراپ کنان ءَ دیمتر ءَ شُت ءُ نشت آں جوگی ءَ آھگ ءِ اشارہ کُت، جوگی پیداک اَت داں من ءَ سما بوت کہ ڈرون منی سر ءِ توکا توار ءَ اِنت۔ من چادر پر دات ءُ نشت آں تنا وھدی جوگی ھم اتک ءُ ڈرون ءِ توار ھم گار بوت ، گُڑا ما جُنزان بوت اِیں۔ ما چار گام جتگ اَت کہ ڈرون پد ءَ مئے سر ءِ توکا توار ءَ بوت ، وشبھتی ءَ دو گام ءَ دیم چنال ءِ درچکے ھست اَت ءُ ما زُوت زُوت ءَ درچک ءِ چیر ءَ شُت اِیں ءُ چیر بوت اِیں، بلے ڈرون ءَ مئے موومنٹ دیستگ اَت ھمد ءَ کئیت ءُ جھل ءَ روت، بُرزا ھُنژ ھُنژ کنگ ءَ اِنت گُڑا من گْوشت جوگی ایشی ءَ مارا دیستگ بیا رویں دُور وت نئیت گوں جوگی ءَ گْوشت اِنّا اے انوں روت۔ کساس 10 منٹ گْوست بلے اے ھما ھساب ءَ جھل ءَ کیت بُرز ءَ روت بلے دگہ نیمگ ءَ روگ ءَ نہ اِنت، اناگہ ءَ مارٹر ءِ آس دیگ ءِ توار بوت من جوگی ءَ چار اِت ءُ گْوشت مارٹر ھمد ءَ مہ کپ اِیت بلے مارٹر ءُ کپگ ءِ توار نیاتک کساس دو منٹ ءَ رند پد ءَ مارٹرے آس دات 40 سکینڈ ءَ رند اے مارٹر مئے نزّیک ءَ کساس 30 میٹر ءَ دُور کئپت مارٹر ءِ آس من چم ء وت دیست۔ اے مئے اولی رند اَت کہ ما جنگ ءَ اے رنگ ءَ گندگ ءَ اَت ایں کہ مارٹر کرّ ءَ آس دیگ ءَ اَت اَنت ءُ تیر سر ءَ گْوزگ ءِ اَت اَنت، پیسر ءَ ما باز رند ءَ جنگ کُتگ اَت بلے بس ما جتگ اَت اے رندی دژمن اُوں ٹیٹ جنگ ءَ اَت۔ اے ساھت ءَ بس یک ھیالے اتک کہ مارٹر نزیک ءَ بہ کپ اِیت انگت مردُم ٹپّی بیت موبائل ءَ پروشت کنت دانکہ دگہ ریکارڑے دژمن ءِ دست مہ کپ اِیت بلے ما دوئیں یکجاہ نشتگ اِیں اگاں مارٹر مارا دوئیناں یکزد بہ کنت مئے دوئینانی موبائلاں باز ریکارڑ مان، کساس 50 منٹ ءَ رند ڈرون کیمپ ءِ نیمگ ءَ شُت ءُ ما زُوت زُوت ءَ دیم ءَ جُنز اِت اِیں۔ پنچ منٹ ءَ رند پد ءَ ڈرون ءِ توار بوت ءُ اے رندی ما شوکیں جاگھے ءَ اَت ایں ءُ وت ءَ ڈکّ (کیموفلاج کتگ) اِتگ اَت، ڈرون شُت مئے پیسرگیں جاگہ ءَ پول اِت ئے ءُ پد ءَ مئے نزیک ءَ اَتک بلے مارا نہ دیست ئے ءُ واتر کیمپ ءَ شُت، ما راہ کپت اِیں گُڑا جوگی گْوشت مارا گارے کُت، من گْوشت ھو۔

اے جنگ ءَ چہ من سک باز چیز در بُرت، ءُ اے جنگ ءَ من ءَ مھکم کُرت۔ پرچا کہ پیسر ءَ من پھم اِتگ اَت کہ جنگ وشّی یے، بلے وھدے اے ساھت دیست اَنت گُڑا مار اِت کہ جنگ پہ راستی گران اِنت بلے پہ مھکمیں مردُم اِنّا، ھما مردُم ءَ کہ دیم ءَ بلائیں مکسدے داشتگ آئی ءِ واستا جنگ ارزان اِنت۔ پرچا کہ آئی ءَ را ھچ چیزے باھینگ ءِ تُرس چیر نہ اِنت، آئی ءَ بس وتی مکسد چم ءِ زد ءَ کُتگ ءُ جُنزان اِنت۔