ندکار: آئیشہ کَیسر بلوچ
اگاں ما دنیا ءِ ھست ءُ گْوستانک ءَ چمشانکے دے ایں گُڑا مارا بازیں راجانی جُھد ءُ آیانی راجی بامردانی(نیشنل ھیرو آنی) بابت ءَ سرپدی رس ایت کہ ھمے راجی ھستی ءُ راجی بامرداں وتی راج ءِ رھشونی کنان ءَ راج چہ گلامی ءَ رک اِت اَنت۔ ھمے وڑ ءَ بلوچ راج ءِ تہ ءَ ھم چوشیں بازیں ھستی ءُ راجی بامرد ھست اَنت آیاں وتی راج ءِ گلامی نہ منّ اِت ءُ پہ راج آجوئی ءَ یکشل ءَ جُھد کُت۔ چہ بلوچ راج ءِ ھستیاں یک ھستی یے ماما ھیر بکش مری اِنت کہ انی من سے چار گال پہ راجی بامرد بابا مری ءِ ستاشانی ءَ نَدر کنگ لوٹ آں۔
بابا ھیر بکش مری 28 پروری 1928 ءَ کوھلو ءِ بند کاھان ءَ ودی بیتگ، بنداتی کوھلو ءَ ونت ئِے ءُ پد ءَ پہ گیش وانگ ءَ لاھور ءِ نامداریں ایچیسن کالج ءَ ونت۔ واجہ ھیر بکش مری چہ نودربری زمانگ ءَ سک راجدوستیں مردمے اَت پمیشکا وھدیکہ پاکستان ءَ جنرل ایوب ءِ سروکی ءَ کوھستانِ مری ءَ ٹیل ءُ گیس ءِ شوھازگ ءُ کَشگ ءِ کار بندات کُت گُڑا پہ راجی سیت ءُ ھُدا دادیں مالڈیانی پھاریزگ ءَ جنرل ایوب ءِ ھلاپ ءَ وتی راج ئِے یکجاہ کُت اَنت۔ ماما مری ءَ گْوشتگ کہ اِے ھُدا دادیں مڈّی بلوچ راج ئیگ اَنت ءُ باید اِنت اے پہ آزات بلوچستان ءِ دیمروی ءُ آسودگی ءَ کارمرز بنت ناں کہ پاکستان ءُ پنجابی ءِ واست ءَ پمیشکا ما ایشانی لُت ءُ پُلگ ءَ نئیل ایں۔
چہ ایوب ءَ پد بابا مری ءَ 1974 ءَ زالمیں بھٹو سرکار ءِ بلاپ ءَ ھم گھگیری کُت۔ ھمے گھگیری ءِ وھد ءَ بابا مری گوں وتی بازیں کامریڈاں پاکستانی لشکر ءَ دزگیر کُت ءُ ھیدرآباد سند ءِ زِندان ءَ بندیگ کُت، کوھلو ءُ کاھان ءِ دمگ ءَ ایران ءِ کُمک ءَ جنگی آپریشن بُنگیج کُت چہ ایشی ءَ ھزارانی کچ ءَ مری ٹَک ءِ بلوچ ورناہ، کماش، مردم ءُ زالبول شھید کنگ بوت اَنت ءُ ھزارانی کچ ءَ بلوچ راج پہ لڈ ءُ بوج ءَ بے وس بوت، وتی وتن یل اش کُت ءُ اوگانستان ءَ شُت اَنت۔
پد ءَ 1977 ءَ زالمیں بھٹو ءِ سرکار جنرل زیاالھک ءَ پْروشنت ءُ بابا مری گوں بازیں سنگتے ءَ آجو بوت۔ چہ زِندان ءِ در آیگ ءَ پد بابا مری درانڈیھی اوگانستان ءَ شُت
ءُ اود ءَ گوں بلوچ راج ءِ وانِندھیں ورناھاں ھوار پہ بلوچستان ءِ آجوئی ءَ سوت روس ءُ اوگانستان ءِ کُمک ءِ لوٹ ئِے کُت۔ بلے اوگانانی وت ماں وت جنگانی سبب ءَ اوگانستان ءِ جاور یکشل ءَ نگیک بوت اَنت پد ءَ 1989 ءَ سوت یونین چہ اوگانستان ءَ در کپت ءُ دومی نیمگ ءَ ڈاکٹر نجیب اللہ ءِ سروکی ءَ اوگانستان ءِ راجدوسیں سرکار ھم روچ ماں روچ نزور بوگ ءَ اَت گُڑا بابا مری 1991 ءَ چہ اوگانستان ءَ در کپت ءَ واتر بلوچستان ءِ شھر کوئٹہ ءَ آتک ءُ نیو کاھان ءَ بستی یے بستگ۔ پد ءَ 1992 اوگانستان ءِ تہ ءَ سول وار بوت گُڑا مار اِت ئِے کہ انیگیں وھد ءَ پہ بلوچستان ءِ آجوئی جنگ بلوچ بے کُمک بیت۔
البت بابا مری ھاموش نہ بوت بلکیں واجہ ءَ “ھکتوار” ءِ نام ءَ مُچی یے(سرکلے) اڈ داتگ ءُ ماں ھمے مُچی ءَ پاکستان ءُ ایران ءِ کبزھگیری ھلاپ ءَ بلوچ راج ئِے اگاہ کُت، راج ءِ لوگ ماں لوگ ءَ شُت ءُ راج ئِے سرپد کُت کہ تو گلامے ئے۔ مُدام بلوچ راج ءَ ھمے سرپدی دات ئِے کہ ما بلوچ وت یک سرجمیں راج ایں، مارا وتی زُبان، سرڈگار ءُ رواج ھست ما گوں پاکستان ءُ ایران ءَ ھچ سْیادی نہ دار ایں، ما گُلام ایں. باید اِنت وتی گلامی ءَ بہ مار اِت، بِیا اِت ءُ پہ بلوچستان ءِ آجوئی ءَ جنگ بہ کن اِت۔ اِے جنگ ماں ٹَکراں بھر ءُ بھانگیں راج ءَ نزیک کار ایت ءُ ھوار کنت، مارا سرجمیں راجے جوڑ کنت ءُ اِے جنگ دنیا ءِ تہ ءَ بلوچ راج ءَ یک پجّارے دنت۔ بابا مری 10 جون 2014 ءَ نادراھی ءِ سبب ءَ کراچی ءَ وتی راج یل کُت ءُ دائمی ھنکیناں شُت۔
راستی ءَ ھکتوار ءِ مُچی بلوچ راج ءِ یک مزنیں بھرگے سانمند بیتگ ءُ چہ ھمے ھیلکاری مُچی ءَ باز نامداریں جھدکار ودی بیتگ اَنت کہ آیانی راجی زْرمبشت ءِ تہ ءَ جْوانیں کِردے ھست۔ نوکیں راجدوستی ءِ زندگ دارگ ءَ بابا ھیربکش مری ءِ کِرد پدر اِنت۔ آئی ءَ وتی سرجمیں زند ءَ پہ بلوچ راجدوستی ءَ جُھد کرتگ، زندمان ءِ کجام ھم وھد ءَ آئی ءَ دُژمن ءِ دیم ءَ سرجھل نہ کرتگ۔
بابا مری وتی تیوگیں زند ءَ یک دمانے ءَ پاکستانی نزام ءِ دیم ءَ چہ وتی لیکہ ءَ دزکش نہ بیتگ۔ آئی ءَ پہ بلوچ راجدوستی ءَ یک جْوانیں کردے پیلو کرتگ ءُ انوگیں گھگیری ءُ آجوئی ءِ انوگیں زْرمبشت ءِ تہ ءَ جوانیں کردے پیلو کرتگ۔ آئی ءَ وتی درسیں زندگی درانڈیھی، بندیگجاہ ءُ گوں آزاراں گوازینتگ۔ گرانیں جاوراں آ وتی لیکہ ءِ سر ءَ اوشتاتگ۔ چہ ایشی ءَ بلوچ راج ءُ جھدکارانی توکل مھکم بیتگ۔ پہ راجی آجوئی ءُ مھکمیں لیکہ ءِ بنیاد ءَ آ ھر وڑیں آزارانی دیمپان کنگ بیتگ۔ بابا مری پہ بلوچ راج ءَ یک انچیں بلوچستان ءِ واھگدار بیتگ کہ ھر یکے ءَ یک کچ ءَ اگبال دیگ بہ بیت ءُ چونیں میر، سردار ءُ نواب یا توانمندے کسے ءِ سر ءَ مستری مہ کنت۔ پمیشکا آئی ءَ وتی زندگی ءَ مزنی ءُ ٹکی سروکے ءَ اَبید یک سادگیں زندگی یے گوازینتگ۔ آئی ءِ شھزانتی، زندگی ءِ گوازینگ ءِ پیم یک درورے جوڑ بیتگ۔ مارا چو ھمائی ءِ وڑ ءَ زندگی ءُ جھد ءَ دربرگ ءُ آجوئی زْرمبشت ءِ تہ ءَ وتی کرد ءَ پیلو کنگی اِنت۔
گُڈسر ءَ من گْوش آں کہ مارا سک وشی بیت کہ راجی بامرد بابا بیر بکش ءُ شھید نواب اکبر ءِ جنگ ءَ سرجمیں بلوچ راج پہ راجی آجوئی ءَ یکجاہ ءُ ھمگام کُتگ۔ رکشان ءُ مکُران ءَ بابا ھیربکش ءِ سرمچار دژمن ءَ پْروش دیگ ءَ اَنت۔ انی مارا کوہ سلیمان ءِ ھمُک دمگاں کہ اود ءَ سرکار ءُ پوج ءِ گلامیں نواب، میر ءُ سردار بلوچ راجدوستی ءِ ھلاپ ءَ دژمن ءِ ھمراہ اَنت اود ءَ راجی جنگ برگ لوٹ ایت۔ مارا وتی سرڈگار ءِ ھمُک انچ آجو کنگ لوٹ ایت کہ آ توری سندھ ءِ دست ءَ اِنت یا توری پنجاب ءِ ایردست اِنت۔ مارا سرجمیں بلوچ راج اِے آجوئی ءِ جنگ ءَ ھوار کنگ لوٹ ایت کہ راجی بامرد بابا ھیر بکش مری ءِ ارواہ ءَ تاھیر بہ رس ایت۔
شالا بلوچستان آجو بات، راجمستری بلوچستان دیمروی بہ کنات۔ بلوچ راج شالا یکمُشت، ھکوپگ، ھمگام ءُ ھمدست بات۔ شالا بلوچ دیمروی بکنات۔
