نبشتہ کار: ماھگُل بلوچ
مئے بلوچ راج ءِ وانِندھیں مردم ھم ناسرپد اَنت۔ چہ ایشی ءَ ھوار ھمے ناسرپدیں وانِندہ تُرس ءِ آماچ اَنت پمیشکا وتی راجی زبان ءَ گوں انگریزی آباں نبیس اَنت۔ وھدیکہ ما چہ آیاں جُست کن ایں کہ شما بلوچی ءَ گوں انگریزی آباں پرچا نبیسگ ءَ اِت؟ گُڑا گْوش اَنت “مارا بلوچی ماں وانگجاھاں (اسکولاں) وانینگ نہ بوتگ یا نہ ونتگ، ما بلوچی نبیسگ ءَ نزور ایں پمیشکا ما بلوچی ءَ گوں انگریزی آباں نبیسگ ءَ ایں”
گِند ئے مارا راج ءَ سرپدی دیگ لوٹ ایت کہ بلوچستان ءِ ھچ جاہ ءَ بلوچی ماں وانگجاھاں وانینگ نہ بوتگ ءُ ناں کہ اِے وھد ءَ وانینگ بوگ ءَ اِنت۔ دْراہ بلوچ چہ وتی موبائلاں بلوچی وانگ ءُ دربرگ ءِ جُھد ءَ اَنت۔ گِند ئے شُمئے وڑ ءَ پیسر ما ھم بلوچی وانگ ءُ نبیسگ ءَ سُست ءُ نزور ات ایں بلے ما دلپْروش نہ بوتگ ایں بلکیں توکل کُت ءُ بلوچی دَرونت، بُنرھبندی نکان(مواد) ءُ راجدوستی نبشتانکاں وانان ءَ وتی راجی زبان ءِ نبشتہ ھیل کُتگ۔ اگاں ما بلوچی ءَ گوں بلوچی آباں نبشتہ مہ کن ایں گُڑا ھچبر دیمروی نہ کن ایں۔ اِے داب ءَ شُما تُرس ءِ آماچ اِت کہ بلوچی گوں بلوچی آبانی نبیسگ من ردی کن آں۔
اگاں تو چہ رَدیاں تُرس ئے گُڑا تو راجی زبان ءِ وانگ ءُ دربرگ ءِ جُھد ءَ بے سوب بَہ ئے۔ گِند ئے مارا چہ وتی رَدیاں دربرگی اِنت۔ بلوچی ءَ گوں انگریزی آباں نبشتہ مہ کن ایں پرچا کہ بلوچی گوں انگریزی آباں نبیسّگ ءَ مارا ھچ پائدگ نہ دنت بلکیں بلوچی گوں انگریزی آباں نبیسّگ وھد ءِ زیانی اِنت۔ گِند ئے دنیا ءِ دگہ زبانانی وڑ ءَ شُمئے زُبان ءَ ھم آب ھست اَنت اگاں ما بلوچی ءَ گوں بلوچی آباں نبشتہ کن ایں گُڑا ما کم کم ءَ بلوچی نبشتہ ھم ھیل کن ایں۔
سک بژن اِنت کہ ما بے سما، اشتاپ ءُ دلپْروش ایں۔ ما پارسی، ھِندی ءُ انگریزی ءِ وڑیں دری زُبانانی وانگ ءُ دربرگ ءَ دہ سال جن ایں بلے بلوچی ءَ سے روچ ءِ تہ ءَ دربرگ لوٹ ایں! تاں دہ سال ءَ ما ھمے دری زُبانانی دَرونت ءُ کتاباں وان ایں بلے وتی جِند ءِ راجی زُبان ءِ وانگ ءُ دربرگ ءَ یک ھپتگے ھم نہ دے ایں! روچے ءِ یک ساھتے ءَ ھم بلوچی درونتانی وانگ ءِ جُھد نہ کن ایں، ما بلوچی ءِ سے دَرونت نہ وان ایں کہ اے سے ئیں درونت تھنا دو روچ ءِ تہ ءَ وانگ ءُ ھلاس کنگ بنت بلے ما تچک ءَ گْوش ایں بلوچی گِران اِنت یا من بلوچی ماں وانگجاھاں نہ ونتگ۔
گِند ئے بلوچی مئے وتی جِند ءِ زُبان اِنت، وتی جِند ءِ زُبان پہ راجاں گِران وَ نہ بیت پمیشکا ما گوں شما دزبندی کن ایں پہ بلوچی وانگ ءُ دربرگ ءَ ھچبر اشتاپ مہ کن اِت، تھنا ھر روچ یک بلوچی درونت ءُ یک زُبان دوستی نبشتانکے بہ وان اِت پد ءَ شما وت یک ھپتگے ءِ تہ ءَ بلوچی راست نبیسّگ ءَ ھیل کن اِت۔ مارا تھنا ھمے پھمگ لوٹ ایت کہ منی گْوانکو پہ من راجی زبان ءِ کتابے، گْوانکو پہ من بلوچی زبان ءِ یک وانگجاھے۔
مرچی بلوچ راج ءِ وانِندھاں زانگ لوٹ ایت کہ یک گُلامیں راجے ءِ چاگرد ءِ تہ ءَ راجی زبان ءِ چے ارزشت ءُ بستار اِنت؟ گِند ئے زبان راجاں یکجاہ ءُ یکمُشت کنت۔ زبان راجانی دود ءُ ربیدگ ءِ مستریں بھر ءُ یک راجے ءِ بُندری پجّار اِنت۔ ھر روچ یک بلوچی زبان ءِ راجدوستی ءُ زبان دوستی نبشتانکے الم بہ وان اِت کہ شما بلوچی لبزانک ءَ سرپد بہ بَہ اِت۔ وانگ ءِ وھد ءَ دِگرانی رَدیاں پٹ ایں، آیانی رَدیاں یکجاہ کن ایں۔ گُڑا مارا وانینگ ءِ بیسہ(توکل ءُ ھمت) ودی بیت ءُ ما بے تُرس بَہ ایں۔ ھمے داب ءَ وتی جُھد ءَ برجاہ بدار اِت دیم ءَ وھد ءِ ھمراھی ءَ وت زبر بَہ اِت۔
چہ ایشی ءَ ھوار بلوچی نبیسگ ءِ وھد ءَ دری زبانانی گالاں جاہ مہ دے ایں بزانکہ سمجھگ، فارغ ءُ لکھگ ءِ وڑیں گالاں کارمرز مہ کن ایں کہ چہ ھمے زورگریں زبانانی سبب ءَ بلوچ راجی زبان بے کساس پشکپتگ۔ بلکیں جھد بہ کن ایں کہ وتی راجی زبان ءِ زگریں گالاں کارمرز بہ کن ایں، مُدام بلوچی ءَ گوں بلوچی زگریں لبزاں بہ نبیسّ ایں ءُ گوں بلوچی ءِ زگریں گالاں ھبر بہ کن ایں۔ چوناھا بلوچ یک بیرگِریں راجے پمیشکا باید اِنت ما آ دِگہ اردو، پارسی، سندھی ءُ سرائیکی ءِ وڑیں زُباناں چہ بلوچ راج ءِ دپ ءَ گار ءُ بیگواہ بِہ کن اِیں کہ ھمے زباناں مئے بلوچی زبان ءَ تاوان داتگ۔ البت ما یک گپے گْوش ایں کہ انگریزی زبان ءَ الم بہ وان اِت کہ انگریزی یک میان اُستمانی زبانے انچوشکہ توری میڈیکل سائنس ءُ انجینئرنگ بیت یا توری کارجاھی ءُ کارگِسی کار بہ بنت انگلیش ھرجاہ یک بلاھیں ارزشتے دار ایت پمیشکا دنیا ءِ راجانی دیمروی گوں انگریزی ءَ وازمندگ اَنت ءُ مارا ھم تھنا انگریزی ءُ وتی جِند ءِ راجی زبان وانگ ءُ نبشتہ کنگی اَنت۔ گِند ئے ما دژمن ءِ زبان ءَ مہ وان ایں ءُ وتی وھد ءَ زوال مہ کن ایں پرچا کہ دژمن وتی جِند ءِ زھگاں انگلش میڈیم ءَ وانین ایت ءُ مئے زبان ءَ گوں اردو ءُ سندھیاں گار کنت۔ گُڑا باید اِنت بلوچ راج وت ءَ آگاہ بہ کنت ءُ سرپد بہ بیت کہ من ءَ چے جنگی اِنت؟
زُبان دوست ءُ راجدوستیں بلوچ بات اِت، وت ماں وت تپاک، ھمکوپگ ءُ ھمدست بات اِت۔ بلوچ راج، بلوچستان ءُ بلوچی دیمروی بکنات۔ شالا سوبین بات اِت۔
