نبشتہ کار: اکرم شوھاز
مرچی ما بہ چار ایں پاکستان بلوچستان ءِ سر ء سک باز زُلم کنگ ءَ اِنت۔ مرچی پاکستان ھما زُلم ءَ کنگ ءَ اِنت۔ ھر دہ گام ءَ آئی ءَ چیک پوسٹے جتگ۔ اگاں یکے پہ وتی گاریں پسے ءِ شوھاز ءَ روت گُڑا آ انٹُرور کنت ئِے، آئی ءَ سک پٹ اِیت۔ یکے پہ وتی ڈگارانی سر ءَ روت گُڑا پہ موکل گِرگ ءَ آئی ءِ کر ءَ روگ لوٹ ایت، یکے سک نادْراہ بیت، آئی ءِ ھم کر ءَ روگ ءَ نیل ایت، اگاں یکے کہ وتی مردمے ءِ کر ءَ روت، آئی ءِ کر ءَ ھم روگ لوٹ اِیت۔ یکے وتی کارے ءِ کنگ ءَ روت گُڑا آئی ءَ جُست ءُ پرس ھست۔ گِند ئے پاکستان یک دری کومے، آ آتکگ ءُ بلوچستان ءِ توک ءَ اے کرداراں کنگ ءَ اِنت۔ باید ایش اِنت کہ ما آئی ءَ جُست بہ کن ایں کہ تو کے ئے؟ ءُ تو چہ کج ءَ آتکگ ئے؟ بلے آئی ءِ باید نہ اِنت کہ مارا وتی سرزمین ءِ سر ءَ جُست بہ کنت ءُ بہ دار اِیت۔
گْوستانکی وھدیکہ ھندوستان ءِ بھر ءُ بانگ ءَ پیش 14 اگست 1947 ءِ روچ ءَ ھندوستان ءِ وائسرئے لارڈ ماؤنٹ بیٹن گوں مھمد الی جنا ءُ ھان کلات اھمد یار ھان ءِ ھمراھی ءَ نشت ءُ بلوچستان ءِ آجوئی ءِ مسام ءِ سر ءَ تپاک بوت اَنت ءُ بلوچستان ءِ آجوئی ءِ کاگدانی سر ءَ دزرند اِش جت ءُ پد 11 اگست 1947 ءِ روچ ءَ بلوچستان ءِ آجوئی ءِ روچ منّگ بوت۔ ھمے مسام ءِ رد ءَ بلوچستان اے دمگ ءَ آجو ءُ وتواجھیں ڈیھے ءِ دْروشم ءَ سھر ءَ بوت، آئی ءِ آجوئی ءُ وتواجھی وتگڑیں مھترھند(ریاست) پاکستان ءَ ھم منّ اِت، وھدے اے جار چہ دھلی ءِ ریڈیو ءَ شنگ ءُ تالان بوت۔ گُڑا ھان اھمد یار ھان ءَ 15 اگست 1947 ءِ آدینگ ءِ نماز ءَ پد آجوئی ءِ سرجمیں جار پرینت ءُ بلوچستان ءِ پیرک گوں پھر ءُ شانے مک کُت۔ 11 اگست 1947 ءَ بلوچ سرڈگار چہ انگریز ءِ سدسالی زیردستی ءَ آجو بوت ءُ جتائیں پجارے ءِ واھند بوت پمیشکا اے روچ پہ بلوچ راج ءَ سوگند ءُ سرسبزی ءِ روچ زانگ ءُ پجارگ بیت۔ اے روچ ءَ مئے پیر ءُ کماش مسام ءُ سوگند اِش کرتگ اَت کہ آ وشھالیں بلوچستانے جوڑ کن اَنت ءُ چہ درامدانی زیردستی ءَ آجو بیت۔
البت اے آجوئی داں دیر ءَ برجاہ نہ بوت ءُ زورگریں پاکستان ءَ 27 مارچ 1948 ءَ بلوچستان زیردست کُت کہ مرچی ھپتاد ءُ پنچ سال اِنت کہ پاکستان انگت گوں زوراکی ءُ لُٹ ءُ پُلاں پہ مئے گار ءُ گمسار کنگ ءَ چانک اِنت۔ من ءَ ھمد ءَ بژن بیگ ءَ اِنت کہ مرچی اے ریاست آتکگ مئے مات ءُ گْوھار ءُ بلوچ ورناھاں جُست کنت کہ شما کجا روگ ءَ اِت؟ شما چُنت وھد ءَ پد ءَ کا اِت؟ اد ءَ مردم ءَ سک درد بیت چے ءَ کہ زمین مئے وتیگ اِنت۔ ما بلوچستان ءِ توک ءَ کُج ءَ رو ایں۔ یا نہ رو ایں بلے تو مارا جُست مہ گر کہ شما کجا روگ ءَ اِت؟ وھدیکہ منی جند بلوچ کوم ءَ گند اِیت من ءَ سک درد بیت۔ ھمے بلوچ کوم ءِ کسان کسانیں چُک اَنت ناں وانگجاہ اِش ھست ءُ ناں کہ وشیں زند پرچا کہ بید ء وانگ زند وش نہ بیت
۔ وھدیکہ انسان وانگ مہ زانت بزانکہ آ کور اِنت۔ دنیا ءَ ھچ گندگ ءَ نہ اِنت۔ بلوچ کوم سک بزگ ءُ ازاب اِنت۔ من یک زھگے دیست ایشی ءَ من جُست کُت کہ تو چے ءَ نہ وان ئے؟ پسُہ ئِے دات کہ منی کر ءَ وانگجاہ نیست۔ من گُشت اگاں تئی کر ءَ وانگجاہ بہ بیت تو وان ئے؟ گشت ئِے ھو من واناں۔ بلے منی جند ءَ زر نیست کہ من پہ وت ءَ کتاب بہ گر آن ءُ بہ وان آں۔ من ایشی ءِ ھبر اشکُت من ءَ سک درد بوت کہ مرچی مئے بلوچ کوم ءِ کر ءَ ھمنچو زر نیست کہ پہ وت ءَ کتابے بہ گر اَنت ءُ بہ وان اَنت۔
مرچی توری ایران بہ بیت یا پاکستان بہ بیت آ نہ گُش اَنت کہ بلوچ وشیں زندے بہ گواز اَنت۔ آیانی مراد تھنا ھمیش اِنت کہ بلوچ گار ءُ گمسار بہ بیت۔ بلوچ ءِ نام ءُ نشان گار بہ بیت۔ بلوچ ءِ زبان گار بہ بیت۔ نی مارا گوں دژمن ءَ راھے ناں راھے روگی اِنت دانکہ دژمن بہ زانت واکی بلوچ ھست واکی بلوچ ءِ نام گار ءُ گمسار نہ اِنت دژمن ءَ انچیں سبکے بہ دے اِت دانکہ دژمن ھپت ہُشت ءَ یات بہ کنت۔ وتی راہ ءَ مہ زانت کہ منی راہ کج ءَ اِنت ءُ من چہ کجا اَتکگ آں!
شالا بلوچ کوم یکجاہ، یکمُشت ءُ یکجان بات، بلوچ راج وتی آجوئی جھد ءَ سوبین بات ءُ زُلم مُردار بات آمین
