نبشتہ کار: اَدهم بلوچ
هرچ هما چیز ءَ تو شر کارمرز کن ئے آ شر بیت یا هراب۔ البت اگاں بے سیت کارمرز ئِے کن ئے گڑا آ الم هراب بیت۔ ھمے داب ءَ بلوچی کیبورڈ ءَ ھم سکیں مزنیں تاکتے مان اِنت بلے هما نودربر کہ آئی ءِ ارزشت ءَ بزانت ءَ سرپد بہ بیت۔ مرچی مئے راج ءِ لس نودربر هست انت کہ دری زبان ءَ گیشتر وان انت ءُ ارزشت دے انت، گیشتر گوں دری زباناں گپ ءُ تران کن اَنت۔ پرواہ نیست انت بلے اول وتی ماتی زبان، وتی دود ءُ رابیدگ هرچ راج کہ هست اِنت آ وتی ماتی زبان ءَ وان انت ءُ گوں وتی زبان ءَ نبشتہ کن انت۔ بزانکہ هرچ راج وتی ماتی زبان ءَ وت ارزشت دنت۔ بس ما بلوچ راج ایں کہ دگہ زبانانی رند ءَ کپتگ ایں۔
هو مارا دری زبان ءِ دربرگ ءِ سرجمیں هک هست بلے اول وتی جند ءِ زبان! اگاں ما وتی زبان ءَ وت ارزشت مہ دے ایں گڑا دریں راج هچبر مئے زبان ءِ ارزشت ءَ نہ زانت ناں کہ مئے نوکیں پدریچ زانت کہ مارا وت ءَ یک زبانے هست مارا وت ءَ رابیدگے هست۔ نی باید همیش انت کہ مرچی ما وتی زبان ءِ واست ءَ وت جهد بہ کن ایں داں مئے نوکیں پدریچ ءَ مئے زبان یات بہ بیت۔ داں مئے وتی زبان ءِ ندکارانی کتاب پہ نوکیں پدریچ ءَ ایر بہ بنت-
بلوچی کیبورڈ ءِ ایرگیج کنگ وَ چوناها سک آرزان اِنت هما مردم کہ گْوش ایت من بلوچی نہ زان آں من بلوچی هچ نہ وانتگ یا نہ زانا آں بلے همے بلوچی کیبورڈ ءَ تو ایرگیج کت کن ئے کساس یک ءُ دو ماه ءَ بلوچی کیبورڈ ءَ کارمرز بہ کن ئے گڑا همے کیبورڈ ءِ برکت ءَ تو ھم یک جوانیں نبشتہ کارے جوڑ بیت کن ئے بلے بَے ایش اِنت کہ تو بلوچے درونت ءُ بُنرھبندی نکاناں یکبرے الم بہ وان ئے۔ پد ءَ بلوچی کیبورڈ ءِ سر ءَ تو باز چیز دربُرت کن ئے، تو همے بہ پهم کہ بلوچی کیبورڈ یک دپترے(ڈائری یے) ءُ اے دپتر ءِ تہ ءَ تو هرچ وڑیں چیز نبشتہ کت کن ئے شیر، گدار، نمدی، آزمانک، کسمانک، نبشتانک، وهدے اے درستیں چیز ترا همے کیبورڈ ءِ توک ءَ رس انت گڑا اے کیبورڈ یک دپترے لیکگ بیت-
من وتی بلوچ راج ءِ لس واننده ءُ نودربراں همے گْوشگ لوٹ آں کہ بلوچی کیبورڈ مئے ءُ شمئے واستءَ یک مزنیں دپترے لیکگ بیت، ایشی ءِ برکت ءَ ما هرچ هما چیزاں نبشتہ کت کن ایں کہ مارا گوں مئے وتی ماتی زبان ءَ همگرنچ کن انت گڑا منی لیکہ همیش انت۔ اگاں چوشیں چیز کہ مارا وتی رابیدگ ءِ مارا وتی زبان ءِ نیمگ ءَ بارت گڑا ما چہ وتی گوانکواں اے دابیں چیزاں هالیگ مہ کن ایں بلکیں هرچ هما برات ءَ هرچ هما گْوهار ءَ شون بہ دے ایں کہ آ چہ اے چیزاں دور انت جتا انت یا بے هبر انت هچ سما اش نیست کہ مارا وت ءَ یک زبانے هست وهدے من یکے ءَ شون بہ دیاں آ پد ءَ روت دگہ دو همبل ءَ همے سوج ءَ دنت آ دوئیں دگہ سے سنگت ءَ همے سوج ءَ دنت گڑا همے پیم ءَ مئے نسل ءُ درنسل ءَ مئے راجی زبان ءِ بابت ءَ سرپدی رس ایت داں یکے ءَ چہ دو دو ءَ چہ سے ءُ سے ءَ چہ چار ءَ همے داب ءَ روان بیت-
اے بلوچی کیبورڈ یک کسانکیں چیزے نہ انت بلکیں منی نز ءَ یک مزنیں چیزے کہ من ءَ همے کیبورڈ ءِ برکت ءَ مرچی من نشتگ ءُ وتی همے کلو ءَ پہ وتی بلوچ نودبریں برات ءُ گْوهاراں سر کنگ ءَ آں اے همے کیبورڈ انت کہ من ءَ گوں لبزانک دوستیں هبلاں هوار کتگ ئِے اگاں مرچی اے کیبورڈ مہ بیتیں گڑا چہ وتی ماتی زبان ءِ دربرگ ءَ زبهار ات ایں اے همے بلوچی کیبورڈ انت کہ مارا دگنیا ءِ اے کنڈ ءَ آ کُنڈ ءَ هوار کتگ ئِے-
سلامت بات ات بلوچ بات ات یکمُشت ءُ هوار بات ات شالا ماتی زبان دیمروی کنات-۰
