نبشتہ کار: میجر مجید
تو پہ تھاری ءَ زر ئے
من رُژن ءِ بْرانزاں تلملیں
تو پہ گلامی زندگ ئے
من آجوئی ءِ پُسگ آں
13 پروری ءَ بگر داں 16 پروری 2025 ءَ آر سی ڈی سی کونسل ءَ ماں گنجیں گْوادر ءَ نمیرانیں سید ءُ استاد ابدالمجید گْوادری ءِ شھر ءَ اے کتابانی نھادیگ برجم داشت۔
بیا چار ایں کہ ھمے آر سی ڈی سی کونسل چے یے؟
آر سی ڈی سی کونسل بزانکہ rural community development council اِے ادارہ چوناھا سکیں دیریگیں ادارھے۔ چوناھا چہ بندات ءَ اِے ادارہ “انجمن بلوچاں” ایشی ءِ بنیات ایر کتگ ءُ پد ءَ 1961 ءَ سید ھاشمی ءُ دگہ بازیں بلوچ بامرد ءُ جھدکاراں اے ڈبہ وتی کوپگاں زرتگ ءُ مروچاں اے ادارہ ءِ واکدارانی لڑ چوش اِنت:
کارمستر: ناسر سھرابی
کمک کارمستر: بھرام بلوچ
باسک: ابداللہ اُسمان، مجید ابداللہ ءُ نیاز۔
اے ادارہ ءَ 2014 ءَ بگر داں روچء مروچی ھر سال کتابانی نھادیگ بیت ءُ بازیں کتابے بھا ءُ برد بیت کہ پہ وانگ ءُ زانگ ءَ بلاھیں دیمروی یے، گوں کتاب ءَ اِلم اِنت، گوں کتاباں زانت اِنت، گوں کِتاباں روژنائی اِنت۔ اے ادارہ الّم ءَ مبارکباری ءِ ھکدار اِنت۔
ءُ انّیگیں کتابانی نھادیگ ءِ درگت ءَ کساس 28 لک ءُ 86 ھزار کلدار ءِ کتاب بھا بوتگ، ءُ چہ ایشاں 10 لک کلدار ءِ بلوچی کتاب ھم بھا بوتگ، پہ زبان ءِ دیمروی ءَ جْوانیں مستاگے، بکشو ءُ بکشو ءِ چلوپگ کاراں مدام بلوچ ءِ سر ءَ ھمے بُھتام جتگ کہ بلوچ نہ وان اَنت، بلوچ دُز ءُ ڈُنگ اَنت، بلے کتاب میلہ ءَ پدر کت کہ چوش نہ اِنت، بلوچ ھم وانگ ءُ زانگ لوٹ اَنت، بلوچ ھم ھمے دابیں انسان اَنت،
بلے بکشو ءَ پہ بلوچ ءَ وانگ ءُ زانگ ءِ تمامیں در ءُ دروازگ بند کتگ اَنت باید اِنت کہ اے دابیں ادارہ جھد بکن اَنت کہ بلوچ ءَ کتاب ءِ وانگ ءِ سکین بدے اَنت، زاھد آسکانی بلوچ کہ ماں گوادر ءَ پہ وانگ ءُ زانگ ءِ ھاتر ءَ بلاھیں جھدکارے اَت، دو سے اسکول ھم واجہ ءَ جوڑ کتگ ءُ مھلوک ئِے وانینت، گڑا بکشو ءَ مپت ناھک ءَ جت ءُ شھید کت، اے دابیں دگہ ھم بازیں وانگ ءُ زانگی جھدکار بکشو ءَ شھید ءُ بیگواہ کتگ اَنت، بکشو جنت ءُ کُش اِیت داں کہ اِلم ءُ زانت ءَ جنت ءُ کُش اِیت؟
اے کتاب میلہ ءَ بازیں ڈنی مھلوکاں ھم بھر زرت ءُ سوشل میڈیا ءَ ھم اے ایونٹ ءَ کور کت ءُ اے ادارہ ءَ دلبڈی دات۔ بلوچستان ءِ مزنیں شھراں وتی کتابانی نھادیگ ءَ بجن اَنت، اے کارست ءَ تو اگاں اِلمی آشوبے بگْوش ئے رد گْوشگ نہ بیت، اِلمی آشوب راجاں مُھکم ءُ زانتکار کنت، پہ راج ءِ آجوئی ءِ ھاتر ءَ آشوب ءِ آرگ ءَ وانگ ءُ زانگ المی اِنت، کتاب ءِ وانگ المی اِنت، زانتکار بیگ الّمی اِنت، ءُ دنیا ءِ جاورھالاں سرپد بیگ ھم الّمی اِنت۔
یک سنگتے گپ کنت ھمے کتاب میلہ ءِ درگت ءَ من دو کسانیں جنکو دیست کہ بزگ بزگ ءَ کتاب میلہ ءَ چارگ ءَ اَنت، گڑا من اِش کہ دیست ھمے جنکواں بزگ بزگ ءَ گْوشت کہ ناکو مارا کتابے زیر ءُ بدے بلے مارا زر گون نیست، گڑا ھمے ورنا ءَ جنکو ءَ را کتاب زُرت ءُ دات، اے دابیں جاورھالاں گْوش ئے مردم ءَ دردے کپ اِیت کہ بلوچ چینچک بزگ اِنت کہ کتابے ھم بھا زرت نکنت۔ اے بلاھیں گنج ءُ مڈیانی واھند کتابے ءِ زرّاں در نہ کپ اِیت!
من گُڈسر ءَ ادارہ ءِ واکداراں گوں دل ءِ جھلانکی ءَ مبارکی دیاں۔
بلوچ ءِ کتاب دوستی زندگ بات
بلوچ ءِ دژمن سرنگون بات اَنت۔
