ندکار : پاتما بلوچ
توری روسی یے بیت یا توری انڈیا، اربی، اسرائیل ءُ امریکہ ءِ نبشتہ کارے بیت۔ دُنیا ءِ ھر نبشتہ کارے وتی راجی سیت ءُ پائدگ واست ءِ نبیسّ ایت۔ بزانکہ ایشانی نبشتانک آیانی راج ءُ ملک ءِ سرکاری سْوڑگ(Narrative) ءَ بیان کنت۔ ھر چیزے کہ آیانی سرکار ءُ راج ءِ ھکّ ءَ نبشتہ بیت ءُ تھنا ھمے یکیں گپ ءُ باوست ءَ درنگازی کن اَنت۔ ھمے وڑ ءَ انگریزی ءُ بلوچی زُبان ءِ بلوچ نبشتہ کار ھم وتی راجی سیت ءُ راجی ھک ءِ گپ نبیس اَنت۔ چوناھا بلوچ راج ءَ گلامی ءِ ھلاپ ءَ یک انچیں دابے ءَ نبیسّ لوٹ ایت کہ راج ءِ تہ ءَ دژمن ءِ ھلاپ ءَ نپرت ودی بہ بیت۔ گِند ئے مرچیگیں انٹرنیٹ ءِ زمانگ ءَ مارا وتی راج ءُ میان اُستمان ءَ اے سرپدی دیگی اِنت کہ ما بلوچ یک سرڈگارے ءِ واھُندہ ایں، مارا وتی زبان، روان ءُ دود ھست اَنت، مئے وتن بلوچستان ھُشکنات ھِند(برصغیرھند) ءِ بھرے نہ بوتگ پمیشکا ما گوں ھُشکنات ھِند ءِ بھر ءُ بانگ ءَ اڈ داتگیں پاکستان ءَ ھچ وڑیں سْیادی یے نہ دار ایں۔ ما میان اُستمانی رِد ءُ رھبندانی(قاعد و قانون) ھساب ءَ وتی سرڈگار ءُ راجی آجوئی لوٹ ایں۔ اِے پڑ ءَ مارا گیشتر انگریزی زبان ءِ نبشتہ کار ودی جنگی اَنت۔
البت چہ ایشی ءِ ھوار بلوچی نبشتہ کار ءِ مستریں زمہ واری ھمے بیت کہ چہ آئی ءِ نبشتانک ءِ وانگ ءَ وانوک ءَ تاھیر بہ رس ایت۔ آئی نبشتانک ءِ تہ ءَ بُنرھبندی رَدی مہ بنت پرچا کہ رَد ءُ بے رھبندی نبشتانکاں کَس نہ وان ایت، رَدیں نبشتانک وانوکاں تکانسری دے اَنت پمیشکا باید اِنت یک نبشتہ کارے بہ زانت کہ نبشتہ چے یے ءُ نبشتہ ءِ چُنت کاریچ اَنت؟ گُڑا اگاں ما بلوچی زبان ءِ نبشتہ کار بوگ لوٹ ایں گُڑا باید اِنت ما چہ دْرستاں پیسر بلوچی دَرونت ءُ بلوچی بُنرھبند ءَ وان ایں، پد ءَ بزان ایں کہ نبشتہ چے یے ءُ نبشتہ ءِ چُنت کاریچ اَنت؟ اِے بابت ءَ بے تُرس بَہ ایں ءُ چہ وتی بلوچی زبان ءِ جُھدکاریں اُستاداں جُست بہ کن ایں کہ نبشتہ چے ءَ گْوش اَنت؟
بزانکہ وتی نبشتانک ءَ گوں تیاری ءَ نبیسّ ایت، پیسر بہ جیڑ ایت کہ من چے نبشتہ بہ کن آں، نبشتانک یا آزمانک ءِ مول ءُ مُراد چے بہ بیت؟ وانوک ءَ چے درس ءُ سرپدی بہ رس ایت؟ چہ ایشی ءَ ھوار نبیسگ ءَ پد وتی نبشتانک کُتگین ءَ یکبرے وت ھم چمشانکے بدنت کہ رَدی راست کنگ بہ بنت۔ نبشتہ ءِ ھر گالرِد ءُ بھرگ انچیں وڑ ءَ ساز ءُ سنج کنگ بہ بنت کہ وانوک سرپد بہ بیت نبشتہ کار لبزانک ءُ بُنرھبند ءِ رِدءُرھبنداں سرپد اِنت۔ یک گپے گْوش ایں کہ ٹیکنولوجی ءِ برکت ءَ ما انگریزی نبشتانکاں چہ chatgpt ءِ وڑیں آسراتیاں شر ساز ءُ سنج کُت کن ایں۔ البت پہ بلوچی زبان ءِ شر ءُ نامداریں نبشتہ کارے بوگ ءَ مارا بلوچی دَرونت ءُ بلوچی بُنرھبند ءَ زبر بوگ لوٹ ایت۔
بلوچ راج شالا وت ماں وت تپاک، یکمُشت ءُ ھمگام بات۔ راج ءِ تہ ءَ بلوچی وانگ، دربرگ ءُ راست نبشتہ کنگ البار بہ بات، بلوچی ءُ بلوچ راج شالا دیمروی بہ کنات۔
