ڈیھ ءِ مُریدیں میرل

ھبدھمی بھر

نبشتہ کار: ھلیل بلوچ

گوں گاڑی ءِ گِندگ ءَ ما وتی ھَر چُرّے ءِ تہ ءَ ￴جَت اَنت ءُ پوزیشن گِپت۔ چاراں گوں گاڑی ءَ ھواری ءَ چار مُتر ھم پیداک اِنتکہ یک مُترے ءِ سر ءَ بارگ جان سوار اِنت۔ گوں بارگ ءِ گِندگ ءَ ما زانت کہ سنگت اَنت۔ھمے گاڑی ءِ سر ءَ ڈاکٹر منان جان ءُ سنگت اِت اَنت۔

سکّیں وشّیں روچ اِت اَنت کہ ڈاکٹر منان مئے نیام ءَ اَت ءُ وت ماں وت مجلس ءُ دیوان اِت اَنت۔ میرل جان نندگ ءِ وڑ ءَ نہ اَت، لھتیں روچ ءَ پد میرل ءُ بارگ ڈاکٹر منان ءَ زُرت ءُ ھاران شھر ءِ نیمگ ءَ در کپت اَنت۔ تیوگیں ماھے ءَ ڈاکٹر منان ئِے ھمود ءَ شھر ءَ ترّینت۔ انچو من ءَ ھال رسگ ءَ اَت کہ ڈاکٹر ءَ گْوشتگ من ءَ ھاران ءِ ھر گِس ءَ بر اِت گُڑا بارگ ءَ نہ منّ اِتگ کہ اے وڑ ءَ مئے راز درکیت بلے انگت ءَ میرل جان ءَ کجام جاگہ ءَ کسّے ءِ ھال رس اِتگ کہ گِس ءَ اِنت گُڑا ڈاکٹر منان ئِے زُرت ءُ شُتگ۔ بازیں جاگہ ءَ مردُماں زانتگ کہ ڈاکٹر منان دروازگ ءَ ٹُکّینگ ءَ اِنت گُڑا دروازگ اِش پچ نہ کُرت بلے پد ءَ ھم آیاں وتی راجی ھکّ ادا کُرتگ شُتگ اَنت مھلوک اِش دیستگ۔

میرل زیانی روگ ءَ اَلی جان ناوشّ ءُ نادْراہ اَت چوناھا آئی ءِ دیم گیمُروک اَت اے وھد ءَ پورا گْوش ئے چہ سنگتاں زھر اِنت۔ لھتیں روچ ءَ پَد اَلی جان ھم شھر ءِ نیمگ ءَ شُت گُڑا من اوتاگ زُرت ءُ سُمالو ءِ نیمگ ءَ شُت ایں۔ لھتیں روچ ءَ پَد میرل گوں پاٹی ءَ آتک اَنت۔ اے بری ھاجی ءُ جیکسن ھم ھمراہ اِت اَنت۔ ڈاکٹر منان سیاسی کارانی واست ءَ آتکگ اَت گُڑا مُدام پہ مھلوک ءِ گِندگ ءَ تیار اَت، میرل ءَ گون اَت برے یک نیمگے ءَ درکپت اَنت۔ ھمے وھد ءَ بی این ایم شہھید درویش دمگ اڈ دیگ بوت گُڑا میرل ڈپٹی آرگنائزر گچین کنگ بوت۔

لھتیں وھد ءَ پد اَلی جان ءُ مُلّا ابراھیم شھر ءَ اِت اَنت گُڑا جیکسن ءَ من ءَ ھمراہ کُرت ءُ ما ھم شھر ءِ نیمگ ءَ اِرادہ کُرت۔ من گوں میرل ءَ دیوانے کُرت کہ من پانزدہ روچ سر چہ شھر ءَ آتکگ آں نوں واتر دِل نہ گُش ایت کہ شھر ءَ بہ رو آں۔ میرل ءَ من ءَ تسلّا دات ءُ گُشت “جیکسن اوتاگ ءِ زمہ دار اِنت، تھنا اِنت پمشکا ترا زُورگ ءَ اِنت۔ تو بُرو مُلّا ھمود ءَ اِنت، پد ءَ تو ءُ مُلّا بیا اِت۔”

ھمے وھد ءَ ما شھر ءَ اِت ایں یکروچے ما چہ نیٹورک ءَ دور اِت ایں کہ شورّ ءَ دژمن ءَ لشکر کشّی کُرتگ اَت۔ مگرب ءِ وھد ءَ ما بازار ءِ نیمگ ءَ پیداک اِت ایں کانڈی ءِ کرّ ءَ ما نیٹورک گِپت گُڑا ڈاکٹر زباد جان ءَ میسج کُرتگ اَت کہ سنگتانی نیمگ ءَ لشکرکشّی بوتگ، سنگت سلامت اَنت بلے لشکر ءَ سامان ءُ راشن بُن داتگ اَنت۔ مُتر ءُ گاڑی ئِے ھم بُن داتگ اَنت۔

چہ اِے ھال ءِ اشکنگ ءَ من سکّ پریشان بوت آں، ڈاکٹر زباد جان ءَ سامانانی لسٹے دیم دات کہ سنگتاں گْوشتگ “ھمے ساماناں بیار اِت ءُ یک مُترے ھم بیار اِت”

من پسو دات “گوں ما چوناھا زرّ ھست اگاں گْوش اِت من کسّے ءَ ھال کناں۔ ساماناں گِیپت ءُ من کاران اِش گُڑا درکپاں”

جیکسن ءَ جواب دات “اے وڑیں سامان کسّے شھر ءِ تھ ءَ پرمائش نہ کنت کہ اے کوہ ءِ تھ ءَ ￴کنگ ءَ اَنت۔”

اے پہ من ءَ سکّیں اجبیں گپّے اَت کہ مئے سنگتانی سر ءَ ￴لشکر کشی بوتگ۔۔۔ مارا سما ھم نہ اَت کہ سنگت کجام سکّیانی دیمپان اَنت۔ من گْوشت “اے چونیں گَپّ اَنت کہ شُما کنگ ءَ اِت؟ تو اوتاگ ءِ زمہ دار ئے باید تو پریشان بَہ ئے کہ تئی اوتاگ ءِ سر ءَ لشکر کشی بوتگ۔”

 پہ گیشیں ھالانی گِرگ ءِ ھاتر ءَ ما ھمد ءَ کمّو وتارا داشت۔۔۔ ما ھمد ءَ نشتگ اِت ایں بی ایل ایپ ءِ بیان آتک کہ دژمن ءَ مئے اوتاگ ءِ سر ءَ لشکرکشّی کُرتگ، مئے سنگتاں دُژمن بے سوب کُرتگ ءُ لشکر ءِ 12 کارمند کُشتگ ءُ مئے سنگت پہ سلامتی درکپتگ اَنت۔

جیکسن ءَ پہ تنز گْوشت “ڈاکٹر منان گوں وتی پسٹل ءَ 12 کمانڈو جتگ۔” اَلی جان ءَ ٹھک دات کند اِت۔۔۔

اے گپّانی اِشکنگ ءَ من زھر ءَ زھر وتی مُتر زُرت ءُ چہ ایشاں رُکست کُرت

روان اِنت۔۔۔۔