ندکار: بْرمش بلوچ
بلوچ یک جُھدکاریں راجے، ما وتی ھمُک جھد ءَ برجاہ داران ءَ سوبین بَہ ایں بلے شرت ایش اِنت کہ ما دلپْروش ءُ بے اُمیت مہ بَہ ایں۔ گْوشگ ءِ مول ءُ مُراد ایش اِنت کہ مئے راج ءِ بازیں واِنندھے دلپروش اَنت۔ اگاں تو کَسے ءَ بہ گْوش ئے کہ وتی موبائل ءَ بلوچی کتاب ءِ وڑ ءَ بچار، وت ءَ وت ءَ بلوچی پیسبوک ءُ وٹس ایپی وانگجاھاں ھوار بکن ءُ وتی راجی زُبان ءَ بِہ وان ءُ بِہ زان گُڑا آ تچک ءَ گْوش ایت “بہ بکش، من بلوچی وانگ نہ زان آں، اگاں من ھوار بِہ بَہ آں گُڑا زاناں من چے کُت کن آں؟”
گِند ئے اِے وڑیں دلپروشیں وانِندھاں سرپدی دیگ لوٹ ایت کہ ما وَ زان ایں کہ تو بلوچی نبیسّگ ءَ سُست ئے یا نزور ئے بلے تو بلوچی ونت کن ئے۔ زاناں ترا کَے گْوش ایت کہ تو چہ اولی روچ ءَ بلوچی زبان ءِ دْراھیں درونتاں بہ وان ءُ انی راست نبشتہ بِہ کن؟ اگاں تو ونت کن ئے اِے ھم گنج اِنت گُڑا بلوچی درونت ءُ راجدوستی نبشتانکاں وانان ءَ وتی جُھد ءَ برجاہ بدار دیم ءَ وت ھیل ءُ زبر بَہ ئے۔ گِند ئے وتی جِند ءِ زبان ءِ وانگ ءُ دربرگ ءِ جُھد ءَ دلپْروش بوگ نہ لوٹ ایت۔ اگاں ما پارسی، ھِندی ءُ انگریزی ءِ وڑیں دری زُبانانی وانگ ءُ دربرگ ءَ دہ سال جن ایں گُڑا باید اِنت کہ ما یک ماھے ءَ وتی زُبان ءِ وانگ ءُ دربرگ ءِ ھم جُھد بہ کن ایں ءُ بہ مار ایں بلوچی پہ ما آسان اِنت یا گِران اِنت۔
بلوچی مئے راجی زبان اِنت پمیشکا مرچیگیں موبائل ءِ زمانگ ءَ مارا ھر ھال ءَ وتی زبان وانگ ءُ نبشتہ کنگی اِنت۔ گِند ئے یک روچے ءِ تہ ءَ کس مُلا جوڑ نہ بیت پمیشکا شمارا کَس نہ گْوش ایت کہ بلوچی ءِ دْراھیں دَرونتاں ماں یک روچے ءِ تہ ءَ بِہ وان اِت یا شُما رَد نبشتہ بِہ کن اِت۔راستی وَ ایش اِنت کہ شُمئے وڑ ءَ پیسر ما دْراہ بلوچی وانگ ءُ نبیسّگ ءَ نزور اِت ایں بلے ما وتی جُھد برجاہ داشت ءُ مرچی ما وتی راجی زُبان ءَ وش ءُ راست نبشتہ کُت کن ایں۔ بزانکہ راجی زُبان ءِ دربرگ ءَ اشتاپ نہ لوٹ ایت بلکیں پہ لھتیں روچ ءَ وانگ ءُ دربرگ لوٹ ایت، زُبان دوستی ءُ راجدوستی ءِ مارشتاں لوٹ ایت۔
گُڑا باید اِنت ما اول بلوچی دَرونت، زُبان دوستی ءُ راجدوستی نبشتانکاں وانان کن ایں۔ پد ءَ زانگ ءِ جُھد بہ کن ایں کہ نبشتہ چے یے؟ نبشتہ ءِ چُند کاریچ اَنت؟ ءُ بلوچی بُنرھبند چے ءَ گْوش اَنت؟بزانکہ اے وڑیں چیزانی پٹ ءُ پول ھم بہ کن ایں۔ اِے چیزانی بابت ءَ چہ اُستاداں جُست بہ کن پرچا کہ گوں وانگ ءُ جُست ءَ سرپدی رس ایت۔ وھدیکہ ما ھر یکے دلجم بوتگ ایں کہ من بلوچی زبان ءِ نبشتہ کارے بہ آں گُڑا ما وتی راجی زُبان ءِ راست نبیسّگ ءَ وت زبر بَہ ایں ءُ دُنیا ءِ دِگہ راجانی وڑ ءَ ما بلوچ ھم دیمروی کن ایں۔ گِند ئے راج ءِ تہ ءَ مارا بلوچی زبان ءِ وانگ ءُ وانینگ ءِ یک آشوبے ودی کنگی اِنت پمیشکا اِے آشوب ءَ بلوچ زالبولاں دیم ءَ آیگ لوٹ ایت پرچا کہ شیرزالانی رھشُونی آشوباں دیمروئی ءِ نیمگ ءَ سر کنت۔ گُڑا بیا اِت چد ءُ پد وتی راجی زبان ءَ بہ وان ایں۔ بلوچی ءَ گوں انگریزی آباں نبشتہ مہ کن ایں پرچا کہ بلوچی گوں انگریزی آباں نبیسّگ ءَ مارا ھچ پائدگ نہ دنت بلکیں بلوچی گوں انگریزی آباں نبیسّگ وھد ءِ زیانی اِنت۔ شُمئے وتی زُبان ءَ آب ھست اَنت اگاں ما بلوچی ءَ گوں بلوچی آباں نبشتہ کن ایں گُڑا ما کم کم ءَ بلوچی نبشتہ ھم ھیل کن ایں۔
ھر وھد ءَ چیزے نبیسّ اِت گُڑا وتی نبشتگیں لبز ءُ گالرِداں دوبر وت لازم بِوان اِت ءُ وتی رَدیاں راست بہ کن اِت۔ بزانکہ اشتاپ نہ کنگی اِنت بلکیں مارا وتی رَدی وت راست کنگی اَنت، چہ وتی رَدیاں دربرگی اِنت اگاں ما رَدیانی راست کنگ ءِ جُھد بِہ کن ایں گُڑا ما وتی راجی زُبان ءَ وت دربر ایں۔ اُمیت اِنت کہ اے وڑ ءَ شما ھر یکے وتی راج ءِ نودربر ءُ وانِندھاں ھم سرپدی دے اِت کہ ما وتی موبائلاں بلوچی کتاب پھم ایں۔ مارا بلوچی وٹس ایپی وانگجاھاں ھوار بیگی اِنت، وتی دزھُورکی ءِ وھد ءَ وتی راجی زُبان وانگ ءُ نبشتہ کنگی اِنت ءُ راج ھم وانینگی اِنت۔
شالا بلوچی زبان ءِ جُنز ءُ آشوب ءَ سوبین بات، بلوچ راج وت ماں وت تپاک، یکمُشت ءُ یکتوار بہ بات۔ بلوچ راج ءِ تہ ءَ ھمدردی، ھکوپگی ءُ ھمگامی بہ بات۔ بلوچ ءُ بلوچی دیمروی بکنات۔ شالا انچوش بات۔
