نبشتہ کار:ایچ این بلوچ آبادی
اگاں یک راجے ءَ گلام جوڑ کنگ لوٹ ئے گڑا اول گوں آئی ءَ تپنگ ءَ جنگ مکن بلکیں آئی ءَ مجگی گلام جوڑ بکن۔ وھدیکہ راجے ءِ مجگ، بزانکہ آئی زھن ءُ ھیال دستیگ بوت آ راج پْروش وارت ءُ نزور بیت پرچا کہ پد ءَ آئی ءِ جند ءِ ھون (مات ،گوھار، چک ءُ زھگ)، آئی جاگیر ءُ جائیدادانی، مال ءُ مڈیانی دزگیر کنگ ءُ دستیگ کنگ ارزان بیت۔ دانکہ آئی ءِ مجگ گلام نہ بوت ھچ وڑ آ وتی گلامی ءَ نہ مار ایت۔ وھدیکہ مجگی گلام بوت آ چہ وتی گلامی ءِ درآیگ ءِ ھچ جھد ءَ نہ کنت۔ بس مُدام مجگی گلام بیت ءُ وتی زندگی ازاب ءُ گلامی ءَ گوازین ایت۔ بنی آم چون مجگی گلام بیت؟ بنی آدم چون مجگی گلام جوڑ کنگی اِنت؟ انی ما شمارا سرپدی دے ایں۔
اولی: چہ دْرُستاں پیش آئی ءِ ماتی ءُ راجی زبان ءُ ماتی ءُ راجی ءِ کتابانی وانگ ءُ زانگ ءِ سر ءَ پابندی بہ جن، دانکہ چہ وتی ماتی ءُ راجی زبان ءِ وانگ ءُ زانگ ءَ دیر مہ بیت آئی ءَ وتی گلامی ھچ سد ءُ سما نہ بیت پمیشکا ریاست ھرچی کنت ءُ پیش دار اِیت ایشی ءِ گوش ءَ مورے ھم نہ وارت۔ گُڑا باید اِنت ما بلوچ راج ءِ وانِندہ بلوچی دَرونت ءُ بُرھبندی نکاناں وانان ءَ وتی راجی ءُ ماتی زبان ءَ نبشتہ بہ کن ایں۔ مارا زانگ لوٹ ایت کہ نبشتہ چے یے ءُ نبشتہ ءِ چُنت کاریچ(پروسس) اَنت؟
ایوک ءَ وانگ ءُ زانگ نہ اِنت بلکیں ایشی ءِ تہ ءَ نبشتہ کاری، شیر ءُ شائری، ازمکاری، تامر (Flims) ءُ تامرگیری ، ھنرمندی ھرچیز کہ گون، زبان ءُ وانگ ءُ زانگ ءَ سیادی دار اِیت درست ھوار اَنت ایشانی سر ءَ پابندی جنگ وانگ ءُ زانگ ءِ سر ءَ پابندی جنگ اِنت۔
دومی:وانگ ءُ زانگ ءِ پابندی جنگ ءَ پد ایشاں ءُ ایشانی چک ءُ زھگاں دود ءُ ریبدگ ءَ گوستانک ءَ دیر دارگ اِنت دانکہ اے وتی پت ءُ پیرکی دود ءُ ربیدگاں ، آجوئی ءِ زند گوازینگ ءَ سرپد مہ بنت کہ ما چہ بن ءُ بھ ءَ آجو بیتگ اِیں ءُ مئے دود ءُ ریبدگ ایش اَنت بزانکہ نوکیں پدریچ گوستانک ءَ ھچ سرپد مہ بیت ۔
سیمی: چہ سیاسی ھیال ءُ لیکہ(سیاسی نظریہ) ءَ دیر دارگ یک راجے ءَ تو سیاسی لیکہ ءَ دیر دار ئے آ وتی گلامی ءِ مارگ ءَ پوہ نہ بیت گلامی ءِ درآیگ ءِ جھد ءِ ھمت نہ بیت کہ من کجام ھساب ءَ گلامی ءِ سانکلاں بہ پروشاں ءُ گلامی ءِ تننداں آجو بہ باں۔
چارمی: وتن دوستی ءُ راجدوستی ءِ ھلاس کنگ وھدیکہ راجدوستی ءُ وتن دوستی ھلاس ترا گون وتی ڈیھ ءَ دوستی ءُ مھر نہ بیت ءُ راج ءِ دوستی نہ بیت وت ماں وت ءَ یکجاھی ءُ یکمشتی نہ بیت یکے ءِ دومی ءِ درد ءُ گمانی مارگی نہ بیت کس کسی دردوار نہ بیت نئیکہ وتی درد ءُ راج ءِ درد بیت نئیکہ وتی ڈیھ ءُ وتن ءِ واھند بوگ ءِ سد ءُ سما بیت ۔
پنچمی: کاروبار(معیشت) ءِ سر ءَ تنگی آرگ، راجے ءِ کاروبار ءِ سر ءَ تنگی آرگ بیت آ لاچار بیت دومیگ ءِ چمدار ءُ مھتاج بیت چمداری ءُ نیزگاری ریاست ءِ گپانی منگ ءِ نیمگ ءَ بارت آ نہ زانت منی کاروبار ءِ سر ءَ تنگی آرگ منی گلامی سوب ءَ اِنت آ ھچ وڑ دراھگ ءِ جھد ءَ نہ کنت بلکیں چمدار بیت دپارے ءِ مھتاج بیت۔
بلے مروچی بلوچانی ھال انچوش اِنت ریاست ءَ اے درستیں پندل مئے سر ءَ ساز اتگ اَنت ما چنچو مجگی گلام اِنت ءُ جند گلام اِنت چنچو ما وتی گلامی ءِ سانکلانی پروشگ ءِ جھد ءَ اِیں۔ باید اِنت ھر بلوچ سد ءُ سما بہ کنت وت ءَ مجگی گلامی ءَ در بکنت ءُ ریاست ءِ درستیں پندلاں سرپد ءُ سوھو بہ بیت۔
سبزبات بلوچستان ءُ گلیں راج سلامت بات
