نبشتہ کار: پاتما بلوچ
مرچیگیں دامگ(انٹرنیٹ) ءُ موبائل ءِ زمانگ ءَ باید اِنت راج ءِ راجدوستیں اُستاد، نودربر ءُ لس وانِندہ وت ءَ راجی زبان ءِ شریں نبشتہ کار جوڑ بہ کن اَنت پرچا کہ مارا گُلامی ءِ ھلاپ راج آگاہ ءُ سرپد کنگ لوٹ ایت کہ بلوچ وت یک سرڈگارے ءِ واجہ اِنت۔ ترا زُبان ءُ تئی رودءُربیدگ ءُ پجّارے ھست پمیشکا ما گوں پاکستان ءَ ھچ سْیادی یے نہ دار ایں۔ باید اِنت مرچاں مئے ھر بْرات ءُ گْوھارے ھمے بہ جیڑ ایت کہ من پہ وتی زُبان ءِ دیمروی، بلوچ راج ءُ چاگِردی جیڑھانی سر ءَ راجدوستی نبشتانک نبیسّان بہ کن آں، بے سمائیں راج ءِ آگاھی ءُ رھشُونی کنگ ءَ وتی ند ءَ چِست بہ کنان ءُ وت ءَ بلوچی نبشتہ کارے بہ کن آں۔ من وتی راجی زُبان ءِ سرمچار ءُ جُھدکارے جوڑ بِہ بَہ آں ءُ مُدام بلوچی راجدوستی نبشتانک نبیسّ آں یا شائری بکن آں کہ راج ءِ تہ ءَ دژمن ءِ ھلاپ ءَ نپرت ودی بہ بیت، بلوچ دژمن ءِ زُلم ءُ زوراکیاں بہ مار ایت۔
یک گپے دلگوش بہ کن اِت کہ پہ اِے زبان دوستی ءُ راجدوستی ءِ جُھد ءَ بلوچ زالبولاں دیم ءَ آیگ ءُ گیشتر کار کنگ لوٹ ایت پرچا کہ اگاں سمی دین ءُ ماھرنگ بلوچ ءِ وڑ ءَ ما ھمُک بلوچ زالبول بلوچی نبشتہ کار بَہ ایں ءُ راج ءِ سروگانی کن ایں گُڑا راج ءِ تہ ءَ ھم بلوچی وانگ، زانگ، نبشتہ کنگ ءُ بلوچ راجدوستی البار یت۔ ھَرکس بلوچی وانگ ءُ دربرگ ءِ جُھد کنت۔ البت پہ بلوچی زُبان ءِ یک شریں سرمچار ءُ نبشتہ کارے بوگ ءَ مارا وتی لھتیں نزوری ھم دلگوش کنَگی اَنت۔ گِند ئے بلوچی مئے جِند ءِ ماتی ءُ راجی زُبان اِنت پمیشکا پہ ما بلوچی وانگ ءُ راست نبیسّگ سک آسان اِنت۔
اگاں ما بلوچ ایں ءُ بلوچی ونت کن ایں گُڑا اِے ھم گنج اِنت۔ مارا کس نہ گْوش ایت کہ بْیا ءُ یکپارگی بلوچی نبشتہ بہ کن۔ گِند ئے ما بلوچ داں دوازدہ سال ءَ ھمے پارسی، ھِندی ءُ سندھی ءِ وڑیں زُبانانی دَرونتاں وان ایں بلے پہ وتی جند ءِ بلوچی آسانیں دَرونتانی وانگ ءَ ما وھد نہ کَش ایں کہ مئے بلوچی دربری (کورس) ءِ تہ ءَ تھنا سَے دَرونت اَنت ءُ ھمے سے ئیں دَرونت یکیں روچ ءَ ھم وانگ ءُ ھلاس کنگ بنت۔ گِند ئے اے نزوری ءِ مستریں سبب ایش اِنت کہ ما کَس ءَ دلگوش نہ کن ایں، کَسی پنت ءُ سرسوجاں نہ منّ ایں۔ ما لوٹ ایں کہ مارا ھرکَس دلگوش بہ کنت، تھنا ما گپ کن ایں ءُ شما تھنا مارا دلگوش بَہ اِت۔ ما وت دَرونتاں نہ وان ایں بلے بے سیتیں جُست وَ لازم کن ایں۔ گُند ئے اِے زبان دوستی یے وَ نہ اِنت۔
باید اِنت ما چہ دْرستاں پیسر بلوچی درونتاں بہ وان ایں پرچا کہ ھر وڑین سرپدی یے چہ درونتانی وانگ رس ایت پمیشکا باید اِنت ما بلوچی کُمکارگال، تپورگال(ءِ ءُ ءَ)، رنگ گال(یں ءُ ئیں) ءِ وڑیں چیزاں دلگوش بکن ایں ءُ پد ءَ زُبان دوستی ءُ راجدوستی نبشتانکاں بہ وان ایں۔ لبزانکی چیدگ ءُ بھرگاں سرپد بوگ ءِ جُھد بہ کن ایں۔ ھمُک لبزانکی چیدگ ءِ راستیں جاہ ءُ بھرگانی سنج کنگ ءَ بزان ایں۔
چہ دَرونتانی وانگ ءَ پد ھمے بزا ایں کہ نبشتہ چے یے ءُ نبشتہ ءِ چُنت کاریچ(Process) اَنت؟ پرچا کہ مئے بلوچی نبشتہ ھما وھد ءَ راست بیت وھدیکہ ما سرپد بَہ ایں یا زانگ ءِ جُھد بہ کن ایں کہ نبشتہ چے یے ءُ نبشتہ ءِ چُند کاریچ اَنت؟ پمیشکا نبشتہ ءِ بابت ءَ ھم زانگ لوٹ ایت۔ چہ بلوچی دَرونتانی وانگ ءَ پد دِگرانی رَدیاں بچار ایں، دِگرانی رَدیں نبشتانکاں راست بہ کن ایں، مُدام وتی پوسٹاں بلوچی ءَ نبشتہ بہ کن ایں۔ بِل اِت کہ رَد بہ بنت وھد ءِ ھمراھی ءَ ما بلوچی راست نبیسّگ ءَ زبر بَہ ایں۔
ما ھَرکسے وت ءَ راجی زُبان ءِ جُھدکار ءُ سرمچار جوڑ بکن ایں، بلوچی نبشتہ بہ کن ایں ءُ بلوچی وٹس ایپی وانگجاھاں اڈ دیان ءَ راج ءِ نودربراں ھم بلوچی بوانین ایں پرچا کہ بلوچی گوں وانینگ ءَ دیمروی کنت۔ بلوچ ءُ بلوچ راجی زُبان بلوچی شالا دیمروی بکنات۔ شالا انچوش بات۔
