نمدی یے پہ شھدیں سر جاپر سنا ءَ

نبشتہ کار: مھرُل

چہ دْرستاں پیسر دروتے ندر اِنت پہ تو دیدگیں سنا جان، منی گور ءَ چوشیں ھچ لبز نیست کہ چہ تو پھلی بُہ لوٹ آں پرچا کہ من زان آں تو گوں من سک دلگران ئے، پرچا کہ ترا یک سالے ءُ شش ماہ اِنت کہ چہ ما گسر بوتگ ئے بلے من انگت پہ تو یک نمدی یے اوں نبشتہ نہ کتگ۔ من ءَ یات اِنت تو گشتگ اَت کہ ھرچ وڑ ءَ دزگٹ بَہ ئے بلے وھدیکہ من چہ اے دگنیا ءَ رکست بہ آں گُڑا پہ من نمدی یے الم نبشتہ بہ کن ءُ مُدام من ءَ منی راج ءِ بزّگی ءُ تنگدستی ءِ ھالاں بہ دئے۔ ھمُک روچ من ءَ منی راج ءِ بےوسی ءَ مہ گش بلکیں منی راج ءِ زُبان دوستی، راجدوستی، سوبمندی ءُ آجوئی ءِ ھالاں من ءَ بہ دئے پرچا کہ من ودار ءَ آں کدی پہ من تو وشیں ھالے بیار ئے کہ منی کوم یک وشھالیں زندے ءِ واھندہ بوتگ۔

من زان آں کہ تو ھما اِنت منی نمدی ءِ ودار ءَ ئے بلے من ءَ ھچ وھد نہ بوتگ کہ ترا تئی راج ءِ بزّگی ءِ ھالاں سر بہ کن آں۔ مرچی کہ وھد رس اِت دل ءَ گْوشت کہ پہ تو نمدی یے نبشتہ بہ کن۔ سنُل گپے زان ئے مئے راج ھما اِنت کہ ھما بوتگ آئی ءِ سر ءَ ھما زوراکی یکشل ءَ بوگ ءَ اَنت۔ تئی راج ءِ ھمُک لوگ پرسیگ اِنت ءُ ھمُک سالونکیں بچ بیگواہ اِنت۔

بلے یک گپے ھست کہ تئی راج ءَ اے جُھد ءَ دگہ رنگے داتگ! چوش سمّی، ماھرنگ بیبو، شلی، سبیہ ءُ گُلزادی ءِ دْروشم ءَ جنزان اِنت ءُ دیم ءَ روگ ءَ اِنت۔ سنُل زان ئے دژمن انچش پروش ءِ آماچ اِنت کہ گوں مئے گْوھاراں جیگ ماں جیگ اِنت۔ انچش گُمان بیت کہ دژمن پہ وت ھچ راہ ءُ در گِندگ ءَ نہ اِنت ماھرنگ ءَ آئی ءِ دیم دگہ دابے ءَ داشتگ ءُ ￶گَٹ کُتگ۔ دژمن ءِ مستریں نزوری ھمیش اِنت کہ آ گوں زالبولاں جنگ کنت تئی وڑیں سرمچاریں سرانی دیم ءَ گش ئے چوش شال ءِ برپ ءِ وڑ ءَ بد اِیت ءُ پہ آئی ءَ ھچ وڑیں روچ در نئیت کہ آئی ءَ آپ بہ کنت۔ برے برے من ءَ ھمے گمان بیت کہ دژمن وت ھم دوا کنت کہ من چہ بلوچ سرزمین ءَ دور برو آں بلے بژن کہ پہ لاپ ءَ لاچار اِنت۔ سنُل تئی راج ءِ تہ ءَ ھمُک روچ سنا ودی بوگ ءَ اِنت ءُ دژمن ءَ ھمے پیشدارگ ءَ اِنت کہ مئے جّھد پہ مئے راھشونانی شھید کنگ ءَ یا کہ زندانی کنگ ءَ ھچبر نہ اوشت اِیت بلکیں گیشتر مھکم بیت ءُ تئی سر ءَ چوش کربلاہ ءَ کپ اِیت ءُ ترا تباہ کنت۔ ھیر تئی راج ءِ دلیری ءُ گھگیری ءِ گپ وَ باز اَنت پہ نبشتہ کنگ آسر نہ بنت ھمے واست  من وتی نمدی ءَ نو گْونڈ دار آں۔ البت گُڈسر ءَ ھمے گُشگ لوٹ آں کہ چہ من ھچ دلگران مہ بَہ ئے ھرچ وھد ءَ کہ من دزھورُک بہ آں پہ تو ءُ پہ سرزمین ءِ سرجمیں شھیدانی واست ءَ ￴نمدی نبشتہ کن آں ۔ من زان آں شمارا سرجمیں شھیداں ھمے ودار اِنت کہ کدی پہ ما وشیں ھالے بئیت کہ شمئے راج آجو بوتگ ءُ شمئے مات چہ اے ھون واریں رسترانی پنجگاں رکّ اِتگ ۔ سنُل نو دلجم بِہ بَہ ئے￷ آ وھد اوں دور نہ اِنت کہ ترا اے وشیں ھال سر بیت کہ تئی داتگیں دیمونی پہ تئی راج ءَ وشھالی ءِ سوگات بوتگ۔ بس گوں ھاوند ءَ  دوا اِنت کہ بھشت تئی ھنکین بات ءُ گوں کُل شھیداں گُلباگ ءَ بات ئے۔ شالا بلوچ وت ماں وت تپاک بات۔ بلوچستان شالا آجو ءُ ￶راجمستری مئے بھت بہ بات۔ شالا