چہ لشکراں تُرک

چہ رستراں گُرک

چہ پیشاں  پُرک

نبشتہ کار: اَلی جُمّا زامرانی

اے بتلءِ پُژدر ءَ ￴گوش اَنت کہ ترکاں ھما وھدی زمانگاں بازیں ملکےءِ سرءَ ھاکمی کتگ ءِ ُ آیانی لشکر سک باز بوتگ اَنت ءُ ھرچ کجا شتگ اَنت جنگ اِش کتگ ءُ دلیر بوتگ اَنت ءُ وتءَ کُوشارینتگ اِش ءُ آ جاہ اِش کپتگ ءُ زورمند بوتگ اَنت بلے باز مرتگ ءُ پدءَ بتلے ھست کہ گزءِ اِشکر ءُ ترکءِ لشکر ھمے پیمءَ کہ گزءِ اِشکر زوت مریت ھمے پیمءَ ھرچ کجا ترکءِ لشکرءَ بیڑ برتگ باز مرتگ بلےپُشتءَ نہ کنزیتگ انَت ءُ سوبمند بوتگ اَنت پمیشکا گوش اَنت چہ لشکراں ترک!!! دومی گپ کہ رستراں گُرک,,,, گُرک  سکیں دلیریں رسترے ءُ زورےءِ سک باز مان ءُ وتی شکارءَ یکیں ھینءُ دمانءَ چکبور دنت ءُ وتی کُٹم ءَ زانت ءُ وتی کٹم ءَ گوں مستی نہ کنت ءُ وتی  پت ءُ مات ءُ برات ءُ گوھاراں پجاہ کار ایت ءُ مستی وھد ءَ دگہ کٹم ءِ گرکاں گوں سانگ کنت وھدیکہ پت ءُ مات پیر بنت آیانی ھاتر چک شکار کن انت ءُ کار انت ءُ وھدیکہ راہ رو انت پیر ءُ آجز ءُ کسانیں گرک پیسر بنت ءُ زورمند ءُ جوان پشت ءَ بنت کہ پیرین ءُ کسانیں پشت مہ کپ انت، بلوچی بتلے کہ تو گُرک ءِ پیشانی دیستگ کہ تئی ھمک کار شَر بنت اگاں کسے گرک ءِ پیشانی ءَ سھب ءِ سرءَ بہ گندایت گوش انت آئی تالہ پاد کیت ءُ آئی ھرچ کار شر بنت آنگو پاکیں ھاوند بہ زانت چہ راست ءُ چی دروگ گیب ءِ ھال پاکیں ھاوند زانت پمیشکا گوش اَنت چہ رستراں گُرک,!!!! سیمی پیشاں پُرک,,, پُرک ءِ پیش سک ترند اِنت ءُ پہ  مچ ءِ تور ءُ سواسءِ تجیگ ءُ تیچ ءُ گیچنءِ واستءَ کارمرز کن اَنت ءُ پُرک ءِ سواسءِ تجی سک مُھر بیت ءُ نہ سِداِیت ءُ تور ءُ تیچ ءُ گیچن سک باز رَو کن اَنت پمیشکا گوش اَنت پیشاں پُرک