نبشتہ کار: بْرمش بلوچ
ما ھما وھد ءَ دیمروی کن ایں وھدیکہ مئے راج ءِ تہ ءَ زبان دوستی ءُ راجدوستی ءِ مارشت پیداگ بہ بنت پرچا کہ تھنا زُبان دوستی ءُ راجدوستی راجانی تہ ءَ ھمکوپگی ءُ ھمگامی ودی کن اَنت، تھنا زبان ءُ راجدوستی مارا نزیک کار ایت ءُ بلوچ راج وت ماں وت یکمُشت بیت پمیشکا باید اِنت ما دْراہ وتی راجی زبان ءِ وانینگ ءِ جُھد بہ کن ایں، راجدوستی نبشتانکاں نبیسّان بہ کن ایں ءُ ھمے نبشتانکاں راج ءَ بہ وانین ایں۔ وت ءَ گوں پَھر ءُ ناز ءَ راجی زُبان ءِ جُھدکار ءُ ھزمتکار بہ گْوش ایں، بزانکہ دزھُورکی ءِ وھد ءَ پیسبوک ءُ وٹس ایپی وانگجاھاں مارا بلوچ نودربر وانینگی اِنت پرچا کہ ایردستی ءِ آسر ءَ بلوچ راج ءِ نودربراں آئی جِند ءِ راجی ءُ ماتی زُبان ماں وانگجاھاں وانینگ نہ بنت پمیشکا باید اِنت ما اے باوست ءَ یلہ کن ایں مارا بلوچی ماں وانگجاہ ءُ دربرجاھاں وانینگ نہ بوتگ پمیشکا من بلوچی راست نبشتہ کُت نہ کن آں۔ گِند ئے اگاں مارا بلوچی ماں وانگجاھاں وانینگ نہ بوتگ گُڑا ما وتی زُبان ءِ زِندگ دارگ ءِ ھاتر ءَ جُھد مہ کن ایں؟
گِند ئے ما بلوچ ایں، بلوچی وَ مئے وتی جِند ءِ زُبان اِنت پمیشکا ما دْراہ بلوچی ونت کن ایں، سرپد ھم بَہ ایں۔ اگاں کَسے بلوچی وانگ ءَ نزُور اِنت گُڑا چہ بلوچی دَرونتانی وانگ ءَ ھرکَس دو روچ ءِ تہ ءَ بلوچی وانگ ءَ زبر بیت، چہ ایشی ءَ ھوار چہ شوشل میڈیا ءَ بلوچی دربرگی تامُراں بچار ایت ءُ تامُرانی تہ ءَ ھم شریں وڑے ءَ سرپدی رس ایت۔ اگاں ما دہ سال پہ اردو، سندھی ءُ پارسی ءِ وڑیں دری زُبانانی وانگ ءُ دربرگ ءَ زیان کن ایں کہ ھمے زُباناں ھمے راجی زبان ءَ بے کَساس تاوان داتگ اَنت ءُ انگت تاوان دیگ ءَ اَنت گُڑا باید اِنت ما یک ماھے ءَ وتی جِند ءِ زُبان ءَ ھم بوان ایں۔ چوناھا بلوچ یک بیرگِریں راجے پمیشکا باید اِنت ما آ دِگہ اردو، پارسی، سندھی ءُ سرائیکی ءِ وڑیں زُباناں چہ بلوچ راج ءِ دپ ءَ گار ءُ بیگواہ بِہ کن اِیں کہ ھمے زباناں مئے بلوچی زبان ءَ تاوان داتگ۔
البت ما یک گپے گْوش ایں کہ انگریزی زبان ءَ الم بہ وان اِت کہ انگریزی یک میان اُستمانی زبانے انچوشکہ توری میڈیکل سائنس ءُ انجینئرنگ بیت یا کارجاھی ءُ کارگِسی کار بہ بنت انگلیش ھرجاہ یک بلاھیں ارزشتے دار ایت پمیشکا دنیا ءِ راجانی دیمروی گوں انگریزی ءَ وازمندگ اَنت ءُ مارا ھم تھنا انگریزی ءُ وتی جِند ءِ راجی زبان وانگ ءُ نبشتہ کنگی اَنت۔ گِند ئے ما دژمن ءِ زبان ءَ مہ وان ایں ءُ وتی وھد ءَ زوال مہ کن ایں پرچا کہ دژمن وتی جِند ءِ زھگاں انگلش میڈیم ءَ وانین ایت ءُ مئے زبان ءَ گوں اردو ءُ سندھیاں گار کنت۔
انچوشکہ مرچاں مئے راج ءِ بازیں بلوچ بْرات ءُ گْوھاراں پہ راجی زُبان ءِ دیمروی ءَ بلوچی وٹس ایپی ءُ پیسبوکی وانگجاہ اڈ کُتگ اَنت ءُ راج ءِ نودربراں بلوچی وانینگ ءَ اَنت راج ءِ تہ ءَ بلوچی وانگ ءُ نبیسّگ البار بہ بیت۔ گُڑا ھورت بچار ئے اے جُھد ءَ ھر زُبان دوست ءُ راجدوستیں مھلوک ءَ باسکی زُورگی اِنت، مارا ھم گوں ھمے بْرات ءُ گْوھاریں جُھدکاراں ھمراھداری کنگ لوٹ ایت پرچا کہ بلوچی وت وانگ ءُ راج ءِ وانینگ مئے تیوگیں راج ءِ زمہ واری اِنت۔ بزانکہ ما دْراہ چہ وتی رَدیاں راست کنان ءَ دربرگ ءَ ایں پمیشکا باید اِنت ما چہ رَدیاں مہ تُرس ایں بلکیں چہ ردیاں دربر ایں۔ اگاں شما مرچی بلوچی زُبان ءِ نودربر اِت گُڑا باندات ءِ اُستاد ھم بَہ اِت، بزانکہ دلپروش وَ انّا بلکیں مارا بلوچی زُبان ءِ سرمچار بوگ لوٹ ایت، بلوچی وانینگ لوٹ ایت کہ گوں وانینگ ءَ مارا درونت یات بنت ءُ مئے تہ ءَ ھمت ودی بیت۔
اگاں ما دْراہ ھمے داب ءَ جُنزان بَہ ایں گُڑا ما زیت وتی راجی زُبان ءِ نبشتہ ءَ دربر ایں ءُ راجی زُبان ءِ بلاھیں نبشتہ کار ءُ شائِر جوڑ بہ ایں۔ چہ بلوچی دَرونتانی وانگ ءَ پد دِگرانی رَدیاں بچار ایں، دِگرانی رَدیں نبشتانکاں راست بہ کن ایں یا وتی پوسٹاں بلوچی ءَ نبشتہ بہ کن ایں۔ بِل اِت کہ رَد بہ بنت وھد ءِ ھمراھی ءَ ما بلوچی راست نبیسّگ ءَ زبر بَہ ایں۔
گُڈسر ءَ پد ءَ گْوش آں باید اِنت بلوچ راج ءِ بْرات ءُ گْوھار مرچیگیں انٹرنٹ ءُ موبائل ءِ زمانگ ءَ وٹس ایپی ءُ پیسبوکی وانگجاھاں اڈ دیان ءَ راج ءَ بہ وانین اَنت۔ شالا راجدوست ءُ زبان دوستیں بلوچ بات اِت۔ راج ءِ تہ ءَ بلوچی وانگ ءُ وانینگ ءِ جُھد البار ءُ بلوچی شالا دیمروی بکنات۔
