نبشتہ کار: مھم جان گُل
بیست سال ءِ جُھد ءَ بلوچ نیشنل موومنٹ ءَ ھزارانی کساس ءَ کُربانی داتگ، وتی لیڈرشپ ءَ بہ گر دانکہ وتی باسک ءُ دُزواہ پہ راجی جنز ءِ مھکم ءُ سوبین کنگ ءَ کربان کرتگ اَنت۔ مرچی اگاں ما گوں نیک نیّتی ءُ راستیں نگاھاں ھورتچاری ءَ گوں بہ چاریں بلوچ نیشنل موومنٹ ءِ کِرد ءُ آئی ءِ کار وت ترا وتی نیمگ ءَ کش اَنت ءُ زاھری دے اَنت۔
اگان مرچی بلوچ راج ءِ موبلازیشن بہ بیت یا کہ دَری راجانی چماں چیردستیں بلوچستان ءِ آجوئی ءِ جنگ ءِ توار ءُ شورش بلوچ نیشنل موومنٹ ءَ گوں بھادری ءُ دلیری ءَ کُتگ ءُ مرچی انگت کنگ ءَ اِنت ءُ دیمتر ءَ چد ءُ گِشتر کنت۔
مرچی بلوچ نیشنل موومنٹ ڈیھ ءَ ھم وتی کار ءُ موبلازیشن ءَ کنگ ءَ اِنت، آ بلوچ راج ءَ پہ آجوئی ءِ جنگ ءُ سیاست ءِ نیمگ ءَ اَنچوش کہ بلوچ نیشنل موومنٹ ءِ سرکماش واجہ گُلام مھمد ءُ ڈاکٹر منان جان ءَ گوں وتی نمیرانیں سنگتاں کُتگ۔ لوگ پہ لوگ تبلیک کُتگ، پد ءَ چیئرمین ھلیل بلوچ ءُ سنگتاں، مرچی سرکماش ڈاکٹر نسیم بلوچ ءُ آئی ءِ ھمبلاں اے ڈبہ وتی کوپگاں زُرتگ ءُ جُنزان اَنت۔
ھر وھد ءُ باری ءَ سیاست زمینی راستیاں چار اِیت ءُ وتی کار ءُ موبلازیشن ءَ دیم ءَ بران کنت، مرچی بلوچ نیشنل موومنٹ ءِ سنگت بلوچستان ءِ ھر کُنڈ ءَ ساڑی ءُ کار ءَ اَنت، راج ءَ موبلاز کنگ ءَ اَنت۔ بس ھبر ھمیش اِنت کہ بلوچ نیشنل موومنٹ ءَ نہ زیک کریڈٹ ءُ نام لوٹ اِتگ ناں کہ مرچی لوٹ اِیت، بلوچ نیشنل موومنٹ کار کنوکیں گل یے۔
اے گل پہ وتی راجی مکسد ءِ ھاسل کنگ ءَ چونیں کربانی یے دیگ لوٹ ایت ھر وھد ءَ ساڑی بوتگ ءُ بیت، چی ءَ کہ اے ھما شھیدانی گل اِنت کہ آیانی دیستگیں واب بلوچستان ءِ آجوئی بوتگ۔ پہ آجوئی ءِ ھاسل کنگ ءَ راستے بلوچ نیشنل موومنٹ ءَ بازیں کربانی داتگ ءُ انگت دنت، زوراک چنچو کہ زوراکی کنت پہ بلوچ ءِ باندات ءَ مارا ھچ وڑ ءَ پدکنزگی نہ اِنت۔
انچوش کہ ما راجدپتر ءَ وان اِیں مارا چہ درستاں ساری ھمے گندگ ءَ کئیت کہ دنیا ءِ توک ءَ ھما راج زندگ بنت کہ آیاں وتی راجدپتر گوں ھوناں نبشتہ کتگ۔ مرچی بلوچ راج ھما کربانیانی کشک ءَ روان ءُ وتی راجدپتر ءَ گوں ھوناں نبشتہ کنگ ءَ اِنت، اے ھون دلجماں سُھرچکیں بام ءِ شبین ءُ آجوئی ءِ پیام بیت پہ بلوچ راج ءَ۔
بس مارا گوں ھمے پکر ءَ دیم ءَ روگی اِنت کہ آ پکر ءِ ھاتر ءَ چیئرمین گلام مھمد ءُ ڈاکٹر منان ءَ ھوار بازیں سراں وت ءَ کربان کرتگ دانکہ مئے باندات چہ گلامی ءَ بہ رکّ اِیت ءُ آجو بہ بیت۔ پمیشکا مارا چو وتی رھشونیں سرانی داب ءَ اے کشک ءِ روگ ءَ بازیں جیڑہ ءُ جنجال دیم ءَ کئیت، بلے آیانی دگ یل دیگی نہ اِنت۔ چی ءَ کہ مارا ھمے کشک منزل ءَ سر کنت، مئے منزل راجی آجوئی اِنت۔
