اولی ءُ گُڈّی دیدار
نبشتہ کار گْواڑگ بلوچ
منی اولی رند ءَ کہ من ءَ سنگتاں دُچّار بوگ ءَ گْوشتگ ات من ءَ گوں سنگتاں باز وهد پیسر رھوت بیتگ بلے دُچّار نہ بیتگ اِیں، من سنگتانی کوڑ نام هم نزانتگ انت، جُست هم نہ کُتگ انت بلے سنگتاں من ءَ زانتگ کہ منی همراه سنگتانی وهدی همراهے بیتگ۔ ـ
یک روچے همے منی سنگت ءَ گْوشت تیار بی رو ایں سنگتاں گوں دُچّار کپ ایں، لھتیں کار هست اے گپ ءِ اِش کنگ ءَ گوں من سک گَل ءَ بال بیت آں کہ من سنگتاں گوں دُچار باں من جُست کُت کدی رو ایں گُش ایت باندا سُھب ءَ مھلو بیا مئے دوار ءِ سر ءَ من همود ءَ آں من گُشت شر بے پِکر بی ـ
من ءَ هچ سبر بوگ ءَ نہ اَت کدی شپ هلاس بیت سُھب بیت انچو ما کسانی ءَ ائید ءِ شپ ءَ واب نہ کپتگ ایں کہ سُھب بیت ما نوکیں گُد گْور ءَ کن اِیں ائیدی گِر اِیں، همے وڑ ءَ من ءَ سبر بوگ ءَ نہ اَت من شام هم نہ کت دل ءَ گْوشت چیزے بہ ور باندا سپر ءَ روگ ءَ ئے بلے چہ گَل ءِ بازی ءَ هچ چیز ءَ دل نیاَتک واب هم آیگ ءَ نہ اَت من پد ءَ پاد اتک آں شُت آں بازار ءَ سینکل ءِ واستا دو ٹیوب زُرت یک هاکی رنگ پوشے سینکل پُل کُت پیٹرول ءَ زر هزار کلدار بچ اِت من چاکلیٹ کُت انت پہ سنگتانی واستا ـ
گِس ءِ آیگ ءَ گوں من وتی هاکی رنگیں گُد گْور ءَ کُت آں کہ کوه ءَ گندگ مہ بیت مَردُم ،وتی سینکل ءِ نمبر پلیٹ بوتک ایر کُت پوش پِر کُت بیک بتّی لینٹ کش اِت انڈیکیٹر بوتک آں ایر کُت انت، سینکل پُل کٹار ءَ کُت اگاں مئے بازار ءِ مردمے اچانگی دیست سینکل ءَ پجّا میار ایت ءُ سینکل ءِ بِرّک جنگ ءَ گوں بیک بتّی روک بیت من پمشکا کش اِت بیت کنت ماں شپ بہ کپ اِیں گُڑا مُشکِل ودی کَنت۔۔
همے جیڑگاں گوں من شپ ءِ دوازده بج ءَ واب کپت آں پد ءَ سے بج ءَ پاد اتک آں بلے من ٹیمب نہ چار اِت کہ سئے بج اِنت من جلدی شُت آں وتاس زُرت چاگل سینکل ءِ گون ءَ دور دات کمو ناه هم بَست سینکل ءِ گون ءَ کت پاگ بَست کہ رواں دوار ءِ سر ءَ ننداں ساهتے ءَ پد روچ در کیت سنگت کیت ما رو ایں دیم پہ سنگتاں اچانگی من گڑیال چار اِت داں سے بج اِنت نی منی ودار ءِ آس گیشتر جمبُور بیت واب هم آیگ ءَ نہ اَت من شُت آں چُل ءَ کہ کمو نان وراں دوشی نہ وارتگ سپر دراج اِنت شُدیگ باں بلے نان ءَ هچ دل نیاَتک دو دانگ دکانی شیر هست ات من انچو بے نگن ءَ زبر ات انت۔ ـ
موسم سک گرم اَت یکے من ءَ گرم ءِ سوب ءَ واب آیگ ءَ نہ اَت من پد ءَ شُت آں وتی بشانگ ءِ تہ ءَ نِشت آں داں بانگواه بیت کُروساں بانگ دات من چہ تھت ءَ ایر اتک آں دبوکہ بَست سینکل اسٹاٹ کُت دیم پہ دوار ءَ اود ءَ شُت آں سینکل دگہ جاهے چیر دات وت دوار ءِ سر ءَ نِشت آں سنگت ءَ میسجے دات من اتکگ آں دوار ءِ سر ءَ یاں تو بیا سنگت ءَ پسُّو دات من پیداک آں من پد ءَ گُشت من ءَ هچ زر گون نیست زر بیار گوں سپرے هچ زانگ نہ بیت سنگت ءَ گْوشت شر ـ
من اے هم زانگ ءَ نہ اِت آں کہ ماں رو ایں کُجام نیمگ ءَ سیاجی ،مزن بند ، کُلبر یاکہ نزیک ءَ سنگت وت کاینت من هچ زانگ ءَ نہ اِت آں همے هیالاں گوں سنگت اَتک سلام ءُ دروت ءَ پَد گُشت ئِے اسٹاٹ کن مُتر ءَ کہ سپر دور اِنت من گْوشت تو ڈرائیور بی من وَ هچ نزاناں کُج ءَ روگی اِنت گُڑا سنگت ءَ مُتر زُرت گوں دیم پہ سنگتاں ماں رهادگ بیت ایں ـ
دو ادھار ءِ سپر کنگ ءَ پد نی من زانت کہ ما مزنبند ءَ روگّ ءَ ایں موسم سک گرم اَت ءُ لوار اَت سُھب ءِ سر ءَ اگاں سینکل ءَ سوار بیتگ ایں گُڑا زانتگ کہ سُھب ءِ سر ءَ هم تبّد انت پرچاکہ کہ موسم سک دْروشک ات پمشکا سُھب ءِ سر ءَ تبّد ات ، دو گھنٹہ ءُ نیم سپر کنگ ءَ پد سنگت ءَ سینکل داشت ءُ لِکّپت کوھے ءِ سر ءَ موبائل ئِے کَش اِت پون کُت پد ءَ ایر اَتک گُش ایت سنگتاں وت ءَ جاه ءَ سر ءَ سر کُتگ مئے ودار ءَ نِشتگ انت نی تو راه ءَ زان ئے سینکل ءَ زیر گوں منی دست نی هُشک انت، یکے مارا تبّد ءَ کُشت گُڑا من سینکل زُرت گوں جُنزان بیت ایں پہ سنگتاں ـ
بزاں چار گبنٹہ ءِ سپر کنگ ءَ پَد ما جاه ءَ سر بیت ایں سنگت ءَ پد ءَ موبائل کَش اِت پون کُت کہ ما اتکگ ایں شُماں کُج ءَ ات من چار اِت چگردے ءِ پُشت ءَ سنگتے زاهر بیت دست ئِے سُرینت کہ بیا اِت ما شُت ایں داں دو سنگت انت نشتگ انت ما سلام ءُ دُوا پَد نِشت ایں دیوان کُت سنگتاں مارا جُست کُت سپر چون بیتگ ماں گْوشت وش بیتگ ، سنگت من ءَ زانگ ءَ نہ اِت انت کہ اولی رند ات کہ ما دُچار بیتگ ات ایں سنگتے ءَ من ءَ جُست کُت سنگت تئی نام کے انت من پسُّو دات گْواڑگ ـ
پد ءَ من جُست کُت ،
سنگت تئی نام کے انت؟
جان منی نام نودی انت
نودی؟؟؟ اے چونیں نامے من بِچکند اِت گُشت.
شھید سنگت نودی جان ءَ هم بچکند اِت ءُ گُشت ناں جگر منی نام اسل ءَ نودی نہ انت منی نام ( نود )اِنت سنگت من ءَ دوستی ءَ نودی گْوش اَنت ، سنگت نودی ءَ روسی کلم دپ کلاشے گون اَت دومی سنگت ءَ هم بلے سک نوک اِت انت ءُ سنگت نودی جاٹہ چو کمو ژند ات بلے زانگ بیت کہ سنگت چوں وتی تُپنگاں سمبال انت سنگت شهید نودی جان ءَ تپنگ ءِ دپ ءِ یر کَش اِت دو سے رند ءَ همے جاه ئِے هُپ جَت ءُ ساپ کُت -
ما بلے وتی دوئیں چاگلانی آپ سپر ءِ تہ ءَ هلّینتگ اِت انت من سنگت نودی ءَ گْوشت وتی چاگل ءَ بدے من آپ وراں منی سنگت ءَ درّائینت شرم کن سنگتانی آپاں ورئے باریں کُج ءَ چہ پیداک انت سنگت نودی ءَ گْوشت نا جگر اد ءَ آپ مُچ اِنت هور بیتگ بلے گْونڈَل آپ وارت من ءَ چاگل دات ئِے من آپ وارت منی سنگت ءَ هم وارت گوں من سینکل ءِ گون ءَ چہ چاکلیٹ کَش اِت انت سنگتاں دات انت کہ بوْر ات من زاناں شُماں گُژنگ بہ ات سنگت نودی ءَ نانی چاکلیٹاں چہ یکے وارت گْوشت ئے وشّ انت مزاک ئِے کُت کس ءَ نہ دیاں گوں ـ
پد ءَ مئے پاٹی ءِ گپ ءُ رپ بیت انت سنگتاں مارا لھتیں ساز ءُ سامان دات کمو باز سھولت دات سنگت نودی ءَ منی سر ءَ دست سمار ات ءُ گْوشت گْونڈل جزباتی مہ بو اِشتاپ کدی هم مہ کن سبر سر ءَ کار بہ کن ، اے جنگ یک مردمے ءِ جنگ نہ اِنت اے جنگ یک میتگے ءِ جنگ نہ اِنت اے جنگ یک مُلکے ءِ جنگ انت ءُ دراج کشّیں جنگے چو جلدی هلاس نہ بیت تو شھری سنگتے ئے ترا گیشتر سنبالی لوٹ ایت رازداری لوٹ ایت بازار ءِ تہ ءَ هج چُشیں شوک مہ کن کہ مردُم ترا پاٹی مردم بزان انت وت ءَ را سیدا ساده کن کس ترا مہ زانت تو پاٹی ءِ مردمے ئے –
باز سر ءُ سوج کنگ ءَ پَد شُت یک نوکیں چینائی کلاشے ءُ شش مگزین ءُ یک کتارے دو سد ءُ پنجاه تیر اِشانی تہ ءَ سد تیر روسی تیر اِت انت سنگت ءَ من ءَ گْوشت اول سر ءَ اِشاں کارمرز کن همے تیر وت یک مگزینے ءِ تہ ءَ مان کُت انت من ءَ دات انت ءُ گْوشت ئِے تیر هساب اَنت ءُ من هساب هم لوٹ آں دومی سنگت ءَ چیدگے مِک کُت ما تپنگ مُهر شر کُت سنگتاں گْوشت نی ما رو ایں کہ مئے کار باز انت شُماں جُنزان کَن اِت کہ شمے سپر هم دراج اِنت گُڑا ما وتی ساز ءُ سامان زُرت انت من ءُ نودی ءَ سینکل ءِ گون ءَ کُت انت چادرے پِر دات-
سنگتانی گپ ءُ نیاد اے مھروانی من ءَ سک دوست بوگ ءَ اَت دل ءَ نہ گُشت سنگتاں یل کن گِس ءَ بہ رو بلے چے کن ئے هما کار کہ من ءَ بندگ بوتگ انت کنگ لوٹ انت من سنگت ءَ گْوشت هم کہ من الاکہ ءَ کار نہ کن آں کایاں گوں سنگت نودی ءَ گْوشت تو انی پاشک نہ بیتگ ئے دانکہ پاشک نہ بہ ئے اد ءَ آیگ نیست مارا بازار ءَ سنگت گیش ءَ چہ گیش هژدری اِنت.
من شھید سنگت نودی ءِ گپ گپت ءُ سنگت پہ ناکامیں دلے رُکست کُت انت من نہ زانت کہ اِے منی ءُ نودی ءِ گُڈی دیدار اِنت من نہ زانت زالمیں دشمن زُوت سنگت ءَ چہ من جُدا کن انت ،سنگتانی رُکست کنگ ءَ پَد من دوبر نودی نہ دیست بس هال ءُ اهوال بیتگ اندازه شش ماه ءَ رند مزبند آپریشن شرو بیت 2022_8_9 تاریک ءَ من سنگتاں گوں رھوت ءِ جھد کُت سنگت لین ءَ نہ اِت انت ھیلی هم مزنبند ءَ گَشت کنگ ءَ اِت انت من سک پریشان اِتاں کہ سنگت لین ءَ نہ انت۔
10…8…2022 ءِ شپ ءَ من ءَ سنگتے ءَ هال کُت من دوشی سنگت جاپر عرف سنا هال کتگ گْوشتگ ئِے هچ هال نیست ما همیش اِیں وپتگ ایں مزبند ءَ اِے پوج یکپیم یلو اِنت ما کُج ءَ بُرو ایں-
11تاریک ءِ بیگاه ءَ سنگتے ءَ من ءَ میسج کُت دو سنگت شھید بوتگ یکے نودی انت ءُ یکّے سنا میسجے ءِ گِندگ ءَ گوں زمین چہ پادانی چیر ءَ در اَتک من وت ءَ هچ وڑ ءَ سمبال اِت نہ کُت من باز جُهد کُت وت ءَ ڈڈ بہ کن آں بلے گوں من نہ بیت گُڑا من چم اجازت داتاں ءُ دپ پچ لگْوشت من سک گریت، نودی ءِ روگ منی برات ءِ روگ ءَ برابر اَت، سجیں شپ واب نیاَتک هما توپک کہ من ءَ نودی ءَ داتگ اَت هما من دلبند ءِ سر ءَ ایر کُت واب کپت آں –
انشاءالله داں گُڈّی ساه ءَ اِے توپک منی کوپگ ءَ بیت-
