نبشتہ کار: مزربلوچ
رجانکار: سُدیر بلوچ
ما چہ کتاباں نپرت کن ایں پرچا کہ کتاب بیگانگی ءِ مارشت (اھساس) ءَ پیدا کنت ءُ بیگانگی ءِ مارشت چہ ایٹم بمب ءَ گیشتِر تاکتور اِنت۔
کتاب ءُ بلوچ ءِ سْیادی ءِ بابت ءَگپ جن آں بے شک بلوچ ءُ کتاب ھما ھمراہ اَنت کہ گوں آیاں بلوچستان ءِ ھر کُنڈ رژناہ اِنت۔
اگاں ما وت ءَ یک کَومے ءِ بستار ءَ بچار ایں ناں کہ ایوک ءَ بلوچستان ءَ کتابدوستی گیش بوتگ بلکیں بلوچ راج ھم تیزی ءَبگوں وتی منزل ءِ نیمگ ءَ گام جنان انت۔
بلوچ جنز ءِ تہ ءَ یک نوکیں موڑے ھما وھد ءَ کیت کہ بلوچ ورنا ھمے سرپد بیت کہ ایوک ءَ گوں کتاب ءَ وتی سیادی ءَ مھکم کنگ ءَ ما وت ءَ اے سرڈگار ءِ سر ءَ یک راجے ءِ بستار ءَ زندگ داشت کن ایں ۔ تھنا ھما وھد ءَ بلوچ ورنا ھاس بلوچ نودربراں بلوچستان ءِ جتا جتائیں جاھاں کتابجاہ جوڑ کت ءُ پہ کتابی دود ءُ ربیدگ ءِ دیم ءَ برگ ءَ وتی سیادی گوں کتاب ءَ اِلمی رنگ ءَ مھکم کُت ءُ راج ءَ پہ کتاب وانگ ءَ ھیل دات۔
پد ءَ ناں ایوَک ءَ گوں اے ورنایاں ریاست ءِ ھِلاپ ءَ دژمنی گیش بوت بلکیں ھمے ورنایانی بیگواھی ءِ ھال ھم دیم ءَ اتک۔ ھبر بلوچستان ءَ اے یک دود ءُ ربیدگے جوڑ بوتگ، بلے اے ورنا نہ ترس اِتگ اَنت ءُ نہ کہ وتی سپر ءَ یلہ داتَگ اَنت ، بلکیں آیاں گوں کتاب ءَ وتی سیادی مھکم کنگ ءَ برجاہ داشتَگ اَنت پرچاکہ آ سرپد بوتگ اِت اَنت کہ بے زانت ءُ بے سرپدی ءَ نہ ایوک ءَ آ بیزار بنت گوں وتی راجی زمہ واریاں ، بلے مئے راجی پجار ھم ھترہ ءِ آماچ بوتگ ات۔
پد ءَ بساک بلوچستان کتاب کاروان ءِ نام ءَ سرجمیں بلوچستان ءَ وڑ وڑیں وھد ءُ مراگشاں کتابانی دکان ایر کنگ بنت ۔ بلے وھد ءِ لوٹاں چارگ ءَ بساک وتی اے مراگش ءَ وتی مزن مزنیں تنزیمی مراگشانی تہ ءَ ھوار کنت ءُ ھر بلوچ ءَ کتاب ءِ دیگ ءِ اھد دار اِیت پد ءَ سرجمیں بلوچستان ءَ کتابانی میلہ بندات بنت بلے چہ اولی روچ ءَ ریاست کہ چہ وتی آئین ءَ ھبکہ ءُ ھبکہ بوتگ ءُ پاد ءِ چیر ءَ پادمال کتگ ، اسٹالانی سر ءَ اوشتاتَگیں نودربراں پروپائل کنگ ءَ آزار دنت ۔ بوت کنت ، اے جیڑ ایت کہ آ تُرس ایت، بلے بلوچ ورنا کہ چہ تُرس ءَ انچو دلیر جوڑ بوتگ اَنت کہ پہ آیاں ھر چیزے ارزشت اِنت ءُ چمّ تھنا وتی منزل ءِ نیمگ ءَ اَنت ، آ زان اَنت کہ راہ ءِ سر ءَ اڈاند سک باز اَنت ۔
بلے آیاں وادہ کتگ کہ آ بند نہ کن اَنت ۔یک دلکشیں کسّہ ڈیرہ گازی ھان ءِ انت کہ چہ بلوچستان کتاب کاروان ءَ چیزے روچ پیسر پِکشن ھاؤساں سے روچی کتابانی دکان ایر کتگ اَت۔ گُش ئے اے ادارہ اے گپ ءَ سرپد نہ بوتگ انت ۔ بلے ھمے کہ نودربر ڈیرہ گازی ھان ءُ تونسہ ءِ جتا جتائیں جاھاں اسٹال ایر کنگ ءَ رونت آ زوراکی ءَ دزگیر کنگ بنت ءُ اسٹال زوراکی ءَ بند کنگ بنت۔ اے یک سکیں ھساسیں گپے کہ ریاست چہ بلوچ ءَ زانت ءُ سرپدی ءَ دیر دارگ لوٹ ایت ، کُجا بلوچستان ءِ وانگ ءُ زانگ ءِ ادارگانی جاور مئے دیم ءَ اَنت ھمے زمانگ ءَ کوہ سلیمان ءُ ڈیرہ گازی ھان ءَ وانگجاھاں پرائیویٹ کنگ ءَ مارا جھالت ءِ تھاری ءَ کشّگ ءِ جھد کنگ بُوگ ءَ انت کہ چہ ایشی ءَ مئے آیوکیں پدریچ ناں ایوَک ءَ بے وانندہ بنت بلکیں مئے باندات ھم گار ءُ بیگواہ بیت۔
بلے اِلم ءِ دوستی ءِ گندگ ءَ بوتگ اَت۔ وھدے لیاری ءِ اے بچکّ ءِ اکس کہ منی دیم ءَ اتک کہ آئی ءَ دہ کلدار دست ءَ کتابے زورگ ءِ سر ءَ سدّک ات گُڑا ھمے واگ بیروت مندروانی ءِ اسٹال ءَ بوت کہ اود ءَ چارمی تبکّ ءِ چُکے ءَ بیست کلدار وتی دست ءَ دات ءُ گام ءِ نیمگ ءَ اشارہ کت ءُ گُشت ئِے “من ءَ اے کتاب لوٹ اِیت ، دگہ یک زیبائیں واکھے ایش اَت کہ پیریں جنینے اسٹال ءِ کش ءَ اتک ءُ گُشت ئِے “من ءَ کتابے لوٹ اِیت ءُ من کتاب ءِ زورگ ءَ ابید نہ رواں۔ اگاں آ نا وانندہ اِنت بلے کتابانی ارزشت ءَ زانت مارا گوں کتاباں وتی سیادی مھکم کنگی اِنت ءُ اے ترسناکیں ریاست ءَ گْوشگی اِنت کہ ما گیشتِر مھکمی ءَ گوں راجی زیردستی ءَ رکّینگ ءَ سپر کن ایں ۔
