نبشتہ کار: گل
دْروت ءُ دْراہ بات ئے۔ چوناھا دیر اِنت منی دل ءَ بیتگ کہ پہ تو نمدی یے نبشتہ بہ کن آن ءُ دیم بہ دے آں بلے امروز ءِ دزگٹیانی پد ءَ من موہ نہ کپتگ آں۔ سستگیں مھر ، اُمیت کن آں کہ تو وش ءُ وشھال ئے، ءُ گوں زند ءِ وشیاں دزگٹ ئے۔
من پہ گِلگ پیم نہ بہ آں ناں کہ گلگ کن آں۔ گلگ گوں ھماں مردم ءَ بیت کہ گلگ ءِ ارزشت اش بہ بیت ۔ کسے ءَ کہ ارزشت مہ بیت گڑا گلگ درد نہ وارت۔
من تیوک ءَ وتی پْرشتگیں بچکندے ءِ آس چریں کسہ ءَ آرگ ءُ دل ءِ ویرانیں شھر ءَ دوبر آباد کنگ لوٹ آں۔ من ءَ انچوش گمان بیت کہ من دْروآپیں ریگزارے ءَ کپتگ آں، ھردیم ءَ نگاھاں شانک دے آں بے مھری ءِ گباراں آزمان ڈک اتگ۔ وھدے تئی تْرانگانی آس زبان کش ایت زمستان ءِ برپیں موسم ءُ دمکانی سارتیں کوش ءُ پلانی آتاریں وشبو، من ءَ گْوست ءِ کسھاں سرکن اَنت۔
گْوست ءِ کسہ، مسام ءُ زبان، منی دل ءَ تو دمے ھم گمان نہ کن ئے، نہ جیڑ ئے کہ چوشیں مردمے بیتگ کہ گوں آئی ءَ من ءَ بے کساس مھر بیتگ۔ ھروھد ءَ پہ من یکیں پاد ءَ اوشتاتگ ءُ سرجمیں سالے گوں ھمائی ءَ گوازینتگ ءُ بلوچی زبان کرتگ۔ زندگی ءِ نہ دیستگیں وابانی پشت ءَ زندگی کرتگ۔ پہ امیت ھمے وابانی پشت ءَ جُھد کرتگ، نشتگ ءُ وابانی راست کنگ ءِ توجیل سازینتگ، مردمانی تھل ءُ سوچاکیں ھبر اش کرتگ اَنت۔
درد بستگیں دل ءِ واھگ تو مُدامی گٹگیر کرت اَنت، ھما واب کہ من گوں تئی ھمراھی ءَ دیستگ اَنت، آ واب ھشکیں واب بوت اَنت۔ شیرکنیں وابانی دیستگیں ارمان چو کانچ ءَ پر شُت ءُ ھردگ ھردگ بوت اَنت۔ نی جیڑ آں کہ زند بے ھمراہ، بے لزت اِنت، بے دوزواہ جنھم اِنت، بے ھمدلیں ھمراہ ویرانیں ڈاکے، چہ ترا پد منی چاریں آتراپ ءَ ابیتکی ءُ ویرانی ءَ مانشانتگ ءُ دگہ ھچ میم نہ بیت۔
نی جیڑ آں کہ تو چی ءَ ایمن ئے؟ تو چی ءَ جھد نہ کرت،؟ تو چی ءَ چوش کرت؟ تو ھمراھی ءِ سوگند وارت بلے پد ءَ بدزبان بوت ئے، راہ ءِ نیم ءَ لگور بوت ئے ءُ گسر کپت ئے۔
راہ نیمگ ءَ دْروھگ پہ بلوچ ءَ مزنیں میارے زانگ بیت، گِند ئے بلوچ ءَ سر داتگ بلے زبان نہ وارتگ۔ ھمے زبان موکگ ءَ شَے ءَ وتی ھانی بکشات، ھیبتان ءَ وتی شیر مچیں چک کشت۔ بلے زبان نہ وارت۔ مروچی گْوستانک ءَ اے ھبر نگار اِنت، زبان ءَ موکے ھم ھبر ابدمان بہ اَنت۔ زبان ءَ ورئے ھم ھبر ایر بہ اَنت۔ بلے پیر ھمیش اِنت کے لگور بیتگ ءُ کے گاز ، وھد ھرچیز ءَ وت پدر کنت۔
شاھو ءَ وھدے گوں ترک ءِ لشکر ءَ جنگ دات گڑا ھسن لگور بوت ءُ شت۔ آئی ءِ جاہ تلانگ ءَ گپت مروچی ھسن ءِ نام گْوستانک ءِ تاکانی تہ ءَ پہ لگوری گرگ بیت ءُ تلانگ وژنام انت۔ مروچی لگوری ءِ مسال ھسن ءِ دیگ بیت ءُ دلیر ءُ تمردی ئے تلانگ ءِ
اے ھبر بھ تئی زبان ءَ نیئت کہ من میاریگ آں چی ءَ کہ وھد ءِ ھمراھی ءَ تو بدل بوت ئے۔ من انگت ھماں وارتگیں سوگند ءُ مسامانی پاسداری ءَ، ھما دگ ءُ راھانی سر ءَ تئی ودار ءَ آں ۔چوش مہ بیت کہ باند ءَ تئی نام ھم گْوستانک ءَ پہ بدزبانی گرگ بہ بیت۔ نہ رس اتگیں مھر ، تئی سدگ ءَ پد بس منی دپ ءَ یک اردو شئر ے زپت بیتگ۔
’’ ایسے چھوڑیں گے تیرا شہر کہ اب اس کی طرف
گردش وقت کے مارے بھی نہیں آئیں گے
اتنی بیزار ہیں آنکھیں کہ خدا جانتا ہے
اس میں اب خواب تمہارے بھی نہیں آئیں گے
ظہیر مشتاق رانا
وشیانی منگیر ءَ بات ئے
تئی وتی گل
