نبشتہ کار: میرک بلوچ
واب یک انچیں چیزّے کہ ھمُک اِنسان بس وابانی پُشت ءَ زندگ ءُ مُدام واب گِندگ ءَ اِنت، ءُ ھرکسی وتی وتی واب ءُ واھشت اَنت۔ اے دُنیا ءَ ھمُک انسانے کہ ھست آ الّم واب گِند اِیت ءُ گِندگ ءَ اِنت۔
اگاں پہ واباں جُھد بہ کن ئے واب الّم سرجم بہ اَنت، ءُ وابانی سرجم کنگ تئی دست ءَ اِنت کہ تو گوں واباں چینکس اِیماندار ئے۔ تو پہ واباں چینکس جُھد کن ئے۔
چوش کہ اے دنیا ءِ دستور اِنت بازیں واب سرجم بہ اَنت، بازیں واب نیمراہ ءَ پْرش اَنت ءُ بازیں واب بس واب ءُ کدی سرجم نہ بہ اَنت۔ انچوش کہ مئے وتی کِردے مئے وابانی سر ءَ ھست اِنت، ھمنچکیں کِردے دومی ءِ ھم مئے وابانی سر ءَ ھست اِنت۔
بازیں وھد ءَ مئے واباں دومی انسان پْرشت ءُ پْروش ءِ آماچ کنت، ھما بیت کہ مارا آئی ءِ ھِچ اُمیت نہ بوتگ۔ تو گِندگ ءَ ئے کہ تئی چمّانی دیم ءَ تئی سرجمیں واب کبر بوَگ ءَ اَنت ءُ تو ھِچ کُت مہ کن ئے گُڑا اے وھد ءَ تو ھینچو دلپروش بہ ئے کہ ترا گریوگ ھم کئیت ترا وتی سر ءَ بزّگ ھم بیت، تو جزباتی ھم بہ ئے ءُ ھمائی ءِ سبب ءَ کہ تئی واب پْرشگ ءَ اَنت ترا ھمائی ءِ سر ءَ زِد ھم کئیت، بلے دست ھِچ ءَ نہ رس اِیت ءُ بس برداش کنگ لوٹ اِیت۔
دومی یک کسانیں کارے ءِ سر ءَ تئی زندگی ءِ سر ءَ، تئی وابانی سر ءَ چینچو سان کئیت، تو چینچو بے وس بہ ئے کہ مجبوری ءَ وتی واباں یل بہ کن ئے۔
چوناھا واب ھرکسی جُتا بہ اَنت، لھتیں واب زِر ءُ دولت اِنت، لھتین ئے مھر ءُ دوستی اِنت لھتین ئے جنّت اِنت، لھتین ئے امبروز ءِ اندگہ آسائش ءُ وشّی اَنت ءُ ھمے پہ یک زمین زادگے ءَ، پہ یک سرمچارے ءَ واب بس گوں آئی ءِ زمین ءَ ءُ زمین ءِ جُھد ء آجوئی ءَ بندوک اَنت، ھمُک واب بس جُھد ءَ را نوکیں رنگ ءِ دَیگ ئیگ اِنت پہ جُھد ءَ چیزّے کنگ ءَ اِنت، بلے اسل ءَ ما جھد ءَ برگ ءَ نہ اِیں، بلکیں مارا جُھد وتی گاماں گوں برگ ءَ اِنت۔
پمیشکا مارا جُھد پھمگی اِنت ءُ جُھد ءِ گاماں گوں رَوگی اِنت، جُھد ھما واباں کہ پیشدار اِیت مارا گِندگی اَنت ءُ جھد ھما واباں کہ پچ گیپت مارا یل کنگی اَنت۔ بس منزل ءُ مکسد آجوئی اِنت، ھرچ رنگ ءَ ھرچ وڑ ءَ، ءُ ھمے واب جھد ءِ تمرد ءُ مُھکم کنگ ئے برجم دارگی اِنت۔ چوش کہ واب چینچو راست ءُ چینچو پْرش اَنت اے من پھم اِتگ ءُ دیستگ، ھرچ وھد ءَ کہ وابے گِندئے گُڑا ھیال بہ کن کہ آئرا پروشوکے ھم ھست۔
