نبشتہ کار: مزھر بلوچ
اے گپ تچک اِنت کہ چہ سالانی بدل بیغ ءَ مئے ڈکھ ءُ درد ھلاس نہ بنت۔ مرشی ما یک درد ناکیں وھد ءَ سپر کنگ ءَ ایں۔ بلوچستان ءِ ھر لوغ زلم ءُ زوراکیانی دیمپان اِنت، ما وثی بستار ءَ کار کَث کن ایں ءُ اے کار مئے زمہ واری اِنت۔ وھدے کہ ھر مردم وثی بستار ءَ مُچی ئیں جُھد ءِ بھر بیث گڑا بیث کنت ما وثی منزل ءَ سر بہ ایں۔ جُنز ءُ بلوچنراج رژنائیں باندات ءِ واست ءَ الم اِنت ما کتاب وانگ ءِ نیمگ ءَ برو ایں چیا کہ دنیا ھر سوبمندیں راج ءِ سوبمند بیغ ءِ سبب کتاب اِنت۔
گُڑا مرشی زلورت ھم ھمیش کہ ھمُک پِڑ ءَ وثی زانتکاریں مردم پیدا کن ایں ایشی ءِ واست ءَ مئی ھیال ءَ چہ کتاب ءَ وشیں چیز نیست اِنت کہ ما وثی راج ءَ داث کث کن ایں۔ اے بک اسٹالاں ھمُک پِڑ ءِ کتاب بنت۔ اے کتاب اسٹالانی مستريں مکسد ھمیش اِنت کہ بلوچستان ءِ توک ءَ کتاب کلچر آرغ بیث ءُ مئے مردم چہ اے تیز گامیں دگنیا ءَ پشت مہ کپ اِیت
بساک ھمے اھد ءَ گوں نوکیں سال ءِ بندات کنغ اِنت کہ مارا ھر پِڑ ءَ دنیا ءِ مکابلہ کنغی اِنت گڑا ایش ءِ واست ءَ لازم اِنت کہ مئے سنگتی گوں کتاب ءَ بہ بیث۔ دنیا ءِ دیمروئی ءِ سوب وانگ ءُ زانگ اِنت ءُ مئے جُھد ھمیش اِنت کہ ما یک راج ءِ وانگ ءُ زانگ ءِ پڑ ءَ نزور مہ بَہ ایں
راجی جُنز مرشی سائنسی ءُ پکری بنیات جنزان اِنت ءُ دیمروئی کنگ ءَ اِنت مرشی زمہ واریانی گیش بیغ ءَ ھوار مئے سر ءَ لازم اِنت کہ ما گیش وانگ ءُ دربرگ ءِ جُھد کن ایں کہ ھمک پڑ ءَ کتاب مئے راھشونی کنغ بیث۔
گوستگیں سال ءِ ھلاس بیغ ءَ زلم و زوراکی ھلاس نہ بیثگ اَنت ءُ ناں کہ اے نوکیں سال ءِ بندات بیغ ءَ ھلاس بیث اگاں ما وثی راج ءَ زِندغ دارغ لوٹ ایں گڑا املی رنگ ءَ کار کنغ لازم اِنت ءُ ھمے واست ءَ بساک ءَ اے مار اِتگ کہ زانت اگاں مردم ءَ کرد ءِ نیمگ ءَ بارت گڑا لازم اِنت کہ بلوچ وانگ ءُ زانگ ءِ نیمگ ءَ بَروت پمیشکا اے کتاب کاروان ءِ مکسد تھنا ایش اِنت کہ گوں نوکیں امیت ءُ جزبگاں ھمک بلوچ ورنا وانگ ءُ زانگ ءُ راجی جنز ءِ ھاتر ءَ املی کارانی بهر بیث۔
گِند ئے مارا سما کنغی اِنت کہ ما یک ایر دستیں راجے ءِ ورنا ایں ءُ مئے ھر کار مئے باندات ءِ پیسلہ کنت مرچی ما اگاں یک چاگردی روبوٹ رازا کاری کن ایں گڑا مئے باندات تھار ءُ تُرسناک بیث مرشی اگاں ما گوں الم ءِ رژنائی ءَ رژنائیں باندات ءِ جُھد کن ایں گڑا منزل سر بیث کن ایں
