نبشتہ کار:میجر مجید
چہ ڈومکیاں دُرّک، چہ توکلیاں مَست۔
بھرام ءِ زھگ نود پِر بستگیں پاگار
راجی لچہ، دود لچہ، پنت لچہ ءُ دستونک
اے پازل ءِ مارتین ءُ سگار ڈکی ءُ کاٹار
(سید)
بلوچ ءِ کْوھنیں ازمگرانی یک بلاھیں لڑے کہ ایشاں بلوچی لبزانک گِس گِس ءَ بُرتگ ءُ تالان کتگ، ءُ آ وھد ءَ ناں دگ، ناں راہ ءُ راھبند بیتگ ناں کہ سواری، موٹل ءُ پرپٹ بیتگ۔ اے ازمگراں پہ پادء شپاد بلوچی لبزانک، بلوچی ساز ءُ زیمل ءُ بلوچی اھدی شائری ماں بلوچستان ءِ ھر گِس ءَ سر کتگ کہ مروچی گیشتر بلوچ وتی راجدپتر ءَ، وتی دود ءُ ربیدگ ءَ سرپد ءُ زانتکار اِنت۔ اے ھمے راجی بامردانی سوب اِنت۔ سید گْوش اِیت کہ
سَنٹ اِنت تئی سما ءِ گورُم ءُ سسا ءِ رمگ رُنگ
ھُشک اِنت تئی گالکاسگ دوش ستر دوش۔
نوک کیسّگ ءُ کم کیسّگ ءُ در کیسّگ ءُ اوستیگ
زر جوش، ھبر جوش، کپر جوش، سپر دوش
(سید)
سید ءِ چہ اے شَیر ءَ زانگ بیت کہ آئی ءَ دیر اِنت مار اِتگ کہ تاں بلوچ وتی ازمگرانی ازم ءَ آشکار نہ کنت گڑا آ راج ءِ گالکاسگ نُک ھُشک بیت،
دوش ستر دوش۔
اے مئے راجی سرودیاں وتی سرود ءُ تمبورگ بڈّ ءَ کتگ اَنت لوگ پہ لوگ ءَ شتگ اَنت وتی کارست اِش شنگ ءُ تالان کتگ اَنت بلے بیاکہ مروچیگیں آسراتی دَور ءَ ھم ما ایشانی تْرانگ ءَ نہ کپ ایں کہ اے گوں بلوچ راج ءَ زلمے! مارا سرکار نیست، سرکاری ترامگیج(ادارہ) نیست کہ مئے ازمگرانی دادرسی بہ بیت بلے مئے تنگوئیں راج، بْرات ءُ لبزانک دوزواہ ھست اَنت ءُ سلامت بات اَنت۔ سید گْوش اِیت
“وپتگیں مرد ءِ میش نر کار اِیت
گوں مزن سھب ءِ بام ءَ پادا اِت”
اے ازمگراں پہ لبزانک ءَ، پہ راج ءَ کُربانی داتگ ءُ باید اِنت کہ پدریچ ایشاں بزانت ءُ پجاہ بیار اِیت، ایشانی یادگاری ءَ کم چہ کم سالے یک رندے دیوانے دارگ بہ بیت، ایشانی بارہ ءَ گپ ءُ تران بہ بیت، ایشانی اِزم ءِ بارہ ءَ ھم سرپدی دیگ بہ بیت، زندگیں راج وتی ازمگر ءُ راجی بامرداں مِرگ ءَ نیل اَنت۔ مرگ ءَ وَ ھرکس مر اِیت وتی وھد ءَ بلے زندگیں راج وتی ازمگرانی ازم ءَ گیر کار اَنت، مروچی مئے چاگرد ءَ انچیں ورنا ءُ پیریں ھست کہ آ اے ازمگرانی بارہ ءَ کہ من نبشتہ کنگ ءَ آں سرپد نہ اَنت، کس نہ زانت کہ اے مئے راج ءِ اندیمیں لال ءُ مروارد کوڑواں اندیم اَنت۔
اے درچ ءَ من گوں وتی بلوچ میوزک پروموٹر سوسائٹی ءِ سنگتاں دسبندی کن آں کہ آ اے ڈبہ ءَ ھم وتی تمردیں کوپگاں بزیر اَنت پرچاکہ انچش کہ من پیش ءَ گْوشت بلوچاں دگہ دوزواہ نیست، سرکار نیست، اے سوسائٹی ءِ کہ جھد باز اَنت، بازیں ازمگر مدت ءُ کمک کتگ، پہ راج ءَ ایشانی جھد سک باز اَنت بلے باید اِنت اے ڈبہ ءَ ھم بزیر اَنت، ایشانی بارہ ءَ یک سرجم ءُ دلجمیں پٹ ءُ پولے بکن اَنت۔ ھمے وڑ ءَ بلوچ پھلوانانی بلاھیں لڑے کہ آ ھم تھاریں مُجاں اندیم کتگ اَنت، اے ھمے پھلوان اَنت کہ ایشاں بلوچ راجدپتر وتی کوھیں دلبند ءَ جاگہ داتگ اَنت ءُ پہ ما آؤرتگ ءُ سر کتگ اَنت، ایشانی زندگ دارگ راجی پرزے، پرچاکہ مارا سرکار ءُ دگہ دوزواہ نیست، ما ھرچے کن ایں وت بکن ایں۔ مولانا روانبد گْوش اِیت
“آ کہ گموار اِنت، دست ئِے کوتاہ اَنت
آ کہ سر دست اِنت ھائن ءُ گدار”
نوں من ھما پھلوان ءُ کلاسیکل گشندھانی لڑ ءَ ایر کناں۔
پھلوانانی لڑ:
1۔ توتی الھان ملاکمال ھان ھوت
2۔ ملا گلام کادر
3۔ ملا کادر بکش (کادُک)
4۔ گلام کادر۔۔ راسک
5۔ شھداد شکر
6۔ ملا بشام
7۔ خیر محمد نوھان
8۔ اُمر نوھانی
9۔ رھیم بکش بلوچ
10۔ ھمزہ جت
11۔ ملا سالھ کلانچی
12۔ ازیم بلوچ
13۔ دادمھمد دجی
14۔ اسمائیل کوسگ
15۔ سلیمان کلسکانی
16۔ لال بکش پیک
17۔ ھیبتان چکی
18۔ مزار ابراھیم
19۔ پھلوان مراد، کروس تنک(بل نگور)
20۔ پھلوان مھمد سالھ ملیری
21۔ پھلوان رمی پسنی
22۔ پھلوان اُمر پادی
23۔ پھلوان بشام مراد
24۔ پھلوان سالمی ناسر آباد کیچ
25۔ پھلوان ریمزُک پیشکان
۔۔۔۔۔۔۔۔۔
مکُران ءِ سرودیانی لڑ:
1۔ پھلوان بلند ایرانشھر
2۔رسول بکش زنگشاھی ایرانشھر راسک
3۔ درمھمد زنگشاھی سولدان راسک
4۔ موسا سوری زھی گرمبیٹ
5۔یوسپ زنگشاھی ساربوگ
6۔ غفور بلند زنگشاھی ایرانشھر
7۔ براھیم آسکانی بمپُشت
8۔ حاجی سدیک زردکوھی سرباز
9۔ سھیل زنگشاھی ایرانشھر
10۔ مھرداد بامری بمپور
11۔ محمد نور مھب زھی سرحد واش
12۔ نبی مھب زھی سرھد واش
13۔ عای بلوچ پانوان چھبار
14۔ ابدالرھمن سورزھی
15۔ ھسین جت دشتیاری
16۔ گُلام ھیدر تیس کوپان
17۔ ابدالکریم جدگال مانڈیرو
18۔ بنگُل بلوچ بنگُل زھی
19۔ رحیم بکش جت کرمبل نگور
20۔ پیرو جت کرمبل نگور
21۔ سبیل جت دشتیاری
22۔ ھسین وتن کواہ بلوچ وشنام
23۔ اھمد وتن کواہ بلوچ وشنام
24۔ داد مھمد وھن کواہ بلوچ
25۔ ابدالرھمان بلوچ وشنام
26۔ پیرل بلوچ وشنام
27۔ ابراھیم بلوچ وشنام گومازی
28۔ رسول بکش وشنام گومازی
29۔ نبی بکش جت دشتیاری
30۔ جنگیان جت کوھدیم دشتیاری
31۔ رحیم بکش بلوچ وشنام گومازی
32۔ گلام ھیدر بلوچ کھن شارک
33۔ ارزین ارزو گوادر ڈور
34۔ باکی گوادر ڈور
35۔ اُمر گوادر سُر
36۔ پِدا اُمر گوادر سُر
37۔ آرپ مزار تربت
38۔ لال مھمد آوارگان بونو دشتیاری
39۔ مروک دیول دشتیاری
40۔ ھدا مراد سرھد واش
(من راجی پھلوان اُمر جوام ءِ منتواراں کہ آئی ءَ گوں من اے پٹ ءُ پول ءَ کمک کتگ)
بلوچی سبز ءُ میزران بات
بلوچ ءِ دژمن سرنگون بات اَنت۔
