نبشتہ کار: ڈاکٹر ھانی بلوچ
منی گُلامیں راج ءِ وانِندھیں مھلوک، ورناہ ءُ کماشیں بْرات ءُ گْوھاراں دْروت ءُ سلام،
اِے چیز ءَ من سد درد سد سھیگ ءُ سرپد آں کہ منی وڑ ءَ شما ھم چہ کرناں ایران ءُ پاکستان ءِ دست ءَ لگتمال اِت، شُمئے ماتیں وتن پنجابی ءُ گجر ءِ دست ءَ دزگیر اِنت۔ شمئے نیلیں زِر، تنگو، سنگِ مرمر، ٹیل، گیس ءُ دِگہ بازیں ھُدائی داد چہ شما پُلگ بوگ ءَ اَنت۔ چہ ایشی ءَ ھوار دوئیں ایران ءُ پاکستان شُمئے کُشتءُکوش ءَ ھمدست اَنت۔ گِند ئے اِے بزگی، واری ءُ گلامی داں ھما وھد ءَ ھلاس نہ بیت داں وھدیکہ ما ھر یکے وت ءَ راست مہ کن ایں، وتی راجی زمہ واریاں دلگوش مہ بَہ ایں۔ شُمئے ھر یک ءِ مستریں راجی زمہ واری ھمیش اِنت کہ مرچیگیں انٹرنیت ءِ دور ءَ بلوچ راج ءَ زبان دوست ءُ راجدوست جوڑ بہ کن اِت۔ گِند ئے زُبان ءِ وانگ، زانگ ءُ نبیسگ گُلامیں راجاں زُبان دوست ءُ یکجاہ کنت، زُبان دوستیں مھلوک راجدوست بنت ءُ راجدوستیں مھلوک وتی ڈیھ ءِ گُلامی ءَ نہ منّ ایت، اِے درگت ءَ زُبانزانت دوست واجہ ناگُمان بلوچ گْوش ایت “داں کہ کسے زُبان دوست مہ بیت آ راجدوست بیت نہ کنت۔”
پمیشکا دوئیں پاکستان ءُ ایران ھم نہ لوٹ اَنت کہ بلوچ راج ءِ وانِندہ وتی راجی زُبان ءَ بِہ وان اَنت ءُ راجدوست بہ بنت۔ انی بچار ایں کہ مئے راج ءِ نودربر ءُ وانِندھاں پہ راجی زُبان ءَ چے کُت ءُ انیگیں انٹرنٹ ءِ دور ءَ پہ زُبان ءَ چے کنگ ءَ اَنت۔ ما وَ منّ ایں کہ ماں اسکول، کالج ءُ کارجاھاں ھِندی ءُ پارسی ءِ وانگ، نبیسّگ ءُ کارمرز کنگ مئے راج ءِ یک بے وسی ءُ مجبوری یے بلے وتی دزھُورکی وھد ءُ ماں شوشل میڈیا ءَ وتی کلوہ ءُ پوسٹاں ماں ھِندی ءَ نبیسّگ مئے مجبوری یے وَ نہ اِنت بلکیں ماں پیسبوک، وٹس ایپ ءُ دِگہ شوشل میڈیا ءِ پتر ءَ دری زُباناں، ھاس پارسی ءُ ھندی نبیسّگ ءُ پوسٹ کنگ مئے مجگی گُلامی ءِ یک ٹوھیں نشانی یے۔ پہ اِے سِلیں گلامی ءِ پْروش دیگ ءَ ما بلوچ زالبولاں دیم ءَ آیگ لوٹ ایت پرچا کہ بے زالبول ءِ بھر ءَ دنیا ءِ ھچ جُنز، راجی آشوب ءُ آجوئی ءِ جُھد سوبین نہ بوتگ اَنت۔ ایشی ءِ سبب ایش اِنت کہ زالبول راج ءِ نیم بھر اِنت پمیشکا راجی آشوب ءُ بلوچ آجوئی ءِ جنگ ءَ بلوچ زالبولاں ھم بھر زُورگ لوٹ ایت ءُ ماشااللہ ما گوں پھر ءُ ناز ءَ گْوش ایں کہ مئے بلوچ راج ءِ گْوھار بلوچ راجی آجوئی جنگ ءَ ھوار اَنت ءُ شریں وڑے ءَ بھر ھم زُورگ ءَ اَنت پمیشکا شما ھریکے ھم بھر زُرت کن اِت۔ ما شُمارا اے وَ نہ گْوش ایں کہ شما دْراہ تُپنگ چست بِہ کن اِت۔
گْوشگ ءِ مُراد تھنا ایش اِنت کہ تو وتی وس ءُ واک ءِ رِد ءَ راجی سرمچارے بوت کن ئے بلے اِے درگت ءَ ترا کمیں وتی چمّ ءُ اگل پچ کنگی اَنت۔ ترا پہ راجی آجوئی ءَ کار کنگ لوٹ ایت کہ آ توری راج ءِ تہ ءَ دُژمن ءِ ھلاپ نپرت ودی کنگ ءِ کار بہ بیت، توری تُپنگ چِست کنگ بہ بیت یا توری زُبان دوستی ءُ راجدوستی بہ بیت، بزانکہ ھر وڑ ءُ دْروشم ءَ زالبولاں وتی براتیں سرمچارانی ھمکوپگ بوگ لوٹ ایت۔ باید اِنت شُما وت ءَ دلپروش ءُ دلگران مہ کن اِت، پْروش مہ ور اِت کہ من وانگجاھاں بلوچی نہ ونتگ پمیشکا انی من ھچ نہ زان آں یا من بلوچی نبیسّگ ءَ سُست آں بلکیں شُما ھر یکے وت ءَ راجی زُبان ءِ مُھکمیں سرمچار جوڑ بہ کن اِت۔ بلوچی وت بِہ وان اِت ءُ راج ءَ ھم بلوچی وانینگ ءِ جُھد بہ کن اِت، شما ھر یکے وت ءَ بلوچی زبان ءِ جُھدکار ءُ ھزمتکار جوڑ بہ کن اِت، گیش ءَ چہ گیش من ءَ، بزانکہ بلوچی دَرونت ءُ راجدوستی نبشتانک وانان بہ کن اِت ءُ پہ گلامیں راج ءِ آگاھی ءُ پہ دژمن ءِ ھلاپ نپرت ودی کنگ ءَ مُدام من ءَ نبشتہ بِہ کن اِت پرچا کہ شُمارا گُلامی ءُ دژمن ءِ زُلم ءُ زورانسری ءِ ھلاپ نبیسگ ءُ دژمن ءِ ھلاپ ءَ نپرت ودی کنگی اِنت۔
گند ئے شُمئے راجی زمہ واری تھنا راج ءِ تہ ءَ زانت ءُ سرپدی ودی کنگی اِنت کہ بلوچ یک جُتائیں راجے ءُ ما گوں پنجابی ءَ ھچ وڑیں سیادی ءُ نزیکی نہ دار ایں، بلوچ ءِ وتی جتائیں سرڈگار، رواج ءُ شاھگانیں زُبان ھست اَنت پمیشکا ما وتی ڈیھ ءِ آجوئی ءُ وتواجھی لوٹ ایں۔ گُڑا باید اِنت بلوچ راج پہ وتی پجّار ءُ ھستی ءِ واست ءَ یکجاہ، ھمکوپگ ءُ یکمُشت بہ بیت۔ اِے درگت ءَ بلوچ زالبولاں وتی راجی زمہ واری ءُ کِرد دلگوش کنگی اَنت۔ ھاس ما گوں کالج ءُ یونیورسٹی ءِ نودربراں دزبندی کن ایں کہ شما راج ءِ اُمیت ءُ باندات ءِ رھشون اِت۔ وتی موبائلاں پہ زبان ءُ راجدوستی ءَ کارمرز بکن اِت۔
چوناھا بلوچ یک بیرگِریں راجے پمیشکا باید اِنت ما آ دِگہ اردو، پارسی، سندھی ءُ سرائیکی ءِ وڑیں زُباناں چہ بلوچ راج ءِ دپ ءَ گار ءُ بیگواہ بِہ کن اِیں کہ ھمے زباناں مئے بلوچی زبان ءَ تاوان داتگ۔ البت ما یک گپے گْوش ایں کہ انگریزی زبان ءَ الم بہ وان اِت کہ انگریزی یک میان اُستمانی زبانے انچوشکہ توری میڈیکل سائنس ءُ انجینئرنگ بیت یا کارجاھی ءُ کارگِسی کار بہ بنت انگلیش ھرجاہ یک بلاھیں ارزشتے دار ایت پمیشکا دنیا ءِ راجانی دیمروی گوں انگریزی ءَ وازمندگ اَنت ءُ مارا ھم تھنا انگریزی ءُ وتی جِند ءِ راجی زبان وانگ ءُ نبشتہ کنگی اَنت۔ گِند ئے ما دژمن ءِ زبان ءَ مہ وان ایں ءُ وتی وھد ءَ زوال مہ کن ایں پرچا کہ دژمن وتی جِند ءِ زھگاں انگلش میڈیم ءَ وانین ایت ءُ مئے زبان ءَ گوں پارسی، اردو ءُ سندھیاں گار کنت۔
شالا راج ءِ وانِندہ راجی زبان ءِ سرمچار ءُ جُھدکار جوڑ بات اَنت، بلوچ راج شالا تپاک، یکمُشت ءُ ھمدست بات، راج ءِ نودربر شالا زُبان دوست ءُ راجدوست بات اَنت۔ بلوچی ءُ بلوچستان شالا دیمروی بکنات۔
