نبشتہ کار: جھانزیب بلوچ
بلوچستان ءِ کسانیں شھر بُلیدہ زامران ءَ وھدے کہ وانگ ءُ زانگ ءُ وسیلگ ءِ دسترس ءِ گپ کیت گڑا بازیں جیڑہ ءُ جنجالانی دیمپان اِنت۔ یکے چہ مزنیں جنجالاں کتابجاھانی کمی انت۔ لائبریری ھما ھاسیں جاگہ اَنت کہ اودا مردم پہ وانگ، زانگ ءُ وتی زانت ءَ گیش کنگ ءَ شُت کن اَنت۔ بلے بُلیدہ
زامران ءَ کتابجاہ سک کم اَنت ءُ اے گپ ءَ چہ نودربر ءُ لس مھلوک ءَ کتاب ءُ وانگ ءِ سامانانی دست کپگ گران اِنت۔
کتابجاہ چہ کتابانی جاہ ءَ گیش اِنت۔ اے یک انچیں جاھے کہ اودا مردم وانگ ءُ زانگ، پٹ ءُ پول کنگ ءُ انچیں زانتکاری ءِ شوھازگ ءَ انت کہ آھانی وانگ یا کار ءِ تہ ءَ آیانی کمک ءَ بہ کنت۔ بُلیدہ زامران ءِ نودربر لائبریری ءِ نہ بوگ ءَ وتی وانگ ءِ ھاترا ھما وسیلہ ءِ شوھازگ ءَ جھد کن اَنت۔ لائبریری ءِ شوھازگ ءِ ھاترا آھاں باز براں دراجیں راہ ءِ سپر کنگی اِنت کہ ایشی ءَ وھد ءُ زرّ لوٹ اِیت۔ اے جاور پہ ھما مردماں کہ پہ وانگ ءُ زانگ ءَ مزنیں شھراں روگ ءِ وس ءَ نہ کن اَنت ، گیشتر گران اِنت۔
لائبریریانی کمی ءَ چہ مزنیں مردماں ھم تاوان رس ایت کہ آ وتی زانت ءَ گیش کنگ لوٹ اَنت یا نوکیں زانت ءُ زانشت دربرگ لوٹ اَنت۔ بلیدہ زامران ءِ وڑیں جاہ ءَ کہ اودا وانگ ءُ زانگ ءِ موہ کم انت، لائبریری ءِ دارگ ءَ چہ مردماں چہ جان سلامتی ءَ بگر داں ٹیکنالوجی ءَ جتا جتائیں سرھالانی بابت ءَ زانگ ءِ موہ رس ایت۔ اے ورنایاں وتی دلچسپی ءِ شوھازگ ءُُ وشیں مستکبل ءِ جوڑ کنگ ءَ کمک کت کنت۔ کتابجاہ ءِ ھست نہ بوھگ ءَ بازیں مردمے اے موھاں چہ زبھر بنت۔
گُڈّی گپّ ایش اِنت کہ بُلیدہ زامُران ءَ کتابجاھانی نہ بوگ یک مزنیں جیڑھے کہ چاگرد ءِ وانگ ءُ زانگ ءُ دیمروئی ءَ را تاوان دنت۔ کتاب، زانتکاری ءُ وانگ ءِ موہ ءِ ھاتر ءَ اے دمگ ءَ گیشتر کتابجاھانی زرورت اِنت۔ گیشتر لائبریری جوڑ کنگ ءَ ما بُلیدا زامران ءِ نودربر ءُ مزنیں مردماں ھما زانت ءُ زانشت ءِ رسگ ءَ کمک کت کنیں کہ آھاں زند ءِ تہ ءَ سوبمند بوھگ ءِ ھاترا المی اِنت۔
