نبشتہ کار: جمائتی بلوچ
سک بژن ءِ گپ اِنت مرچیگیں انٹرنیٹ ءِ زمانگ ءَ ھم بلوچی دیمروی نہ کنگ ءَ اِنت۔ دومی نیمگ ءَ مئے راجی رھشُون ھم اِے بابت ءَ راج ءَ سرپدی نہ دے اَنت کہ موبائلاں وتی راجی زبان ءِ کتاب بہ پھم ایں۔ دومی راج وت ھم سما نہ کنت۔ باید اِنت یک زُبان دوست ءُ راجدوستیں اُستاد، نودربر ءُ وانِندھے ءِ مستریں واھشت ھمے بیت کہ من پہ وتی زُبان ءِ دیمروی، بلوچ راج ءُ چاگِردی جیڑھانی سر ءَ شائِری کنگ ءُ راجدوستی نبشتانک نبیسّگ، پہ بے سمائیں راج ءِ آگاھی ءُ رھشُونی کنگ ءَ وتی ند ءَ چِست بہ کنان ءُ بلوچی نبشتہ بہ کن آں۔ من وتی راجی زُبان ءِ جُھدکارے جوڑ بِہ بَہ آں ءُ مُدام بلوچی راجدوستی نبشتانک نبیسّ آں یا شائری بِہ کن آں کہ راج ءِ تہ ءَ راجدوستی البار بہ بیت۔ اگاں ما بلوچی زُبان ءِ جُھد ءَ ھورت بِہ چار ایں گُڑا ما سرپد بَہ ایں کہ مئے بلوچ وانِندھانی دو مستریں نزوری اَنت۔ وھدے ما وتی ھمے دوئیں نزوریاں دلگوش بَہ ایں گُڑا ما زیت وتی راجی زُبان ءِ وانگ ءُ راست نبیسّگ ءَ وت ھم زبر بَہ ایں ءُ راجی زُبان ءِ شریں نبشتہ کار جوڑ بَہ ایں پرچا کہ بلوچی مئے جِند ءِ ماتی ءُ راجی زُبان اِنت پمیشکا پہ ما بلوچی وانگ ءُ راست نبیسّگ سک آسان اِنت۔
اگاں شما بلوچ اِت ءُ بلوچی ونت کن اِت گُڑا اِے ھم گنج اِنت۔ شُمارا کَس نہ گْوش ایت کہ بْیا اِت ءُ یکپارگی بلوچی نبشتہ بہ کن اِت۔ گِند ئے ما بلوچ داں دوازدہ سال ءَ ھمے پارسی، ھِندی ءُ سندھی ءِ وڑیں زُبانانی دَرونتاں وان ایں بلے پہ وتی جند ءِ بلوچی آسانیں دَرونتانی وانگ ءَ ما وھد نہ کَش ایں کہ مئے بلوچی دربری (کورس) ءِ تہ ءَ تھنا سَے دَرونت اَنت ءُ ھمے سے ئیں دَرونت یکیں روچ ءَ ھم وانگ ءُ ھلاس کنگ بنت۔ گِند ئے اے نزوری ءِ مستریں سبب ایش اِنت کہ ما یکے دلپْروش ایں ءُ دومی ما کَس ءَ دلگوش نہ کن ایں، کَسی پنت ءُ سرسوجاں نہ منّ ایں۔ ما لوٹ ایں کہ مارا ھرکَس دلگوش بہ کنت، تھنا ما گپ کن ایں ءُ شما تھنا مارا دلگوش بَہ اِت۔ ما وت دَرونتاں نہ وان ایں بلے بے سیتیں جُست وَ لازم کن ایں۔ گُند ئے اِے زبان دوستی یے وَ نہ اِنت۔
البت ماں وانگجاھاں نودربر پیسر درونتاں وان اَنت، وھدیکہ دَرونت ھلاس بیت پد ءَ دَرونت ءِ سوالانی بھر کیت ناں کہ جُستانی بھر چہ درونتاں پیسر وانینگ بنت پمیشکا گْوش اَنت داں وھدیکہ یک نودربرے ءَ دَرونت نہ ونتگ ءُ سرپد بوگ ءِ جُھد ئِے نہ کُتگ گُڑا آئی ءَ جُست ءِ ھم ھچ ھَک نیست۔ نودربر ءَ جُست ءِ ھَک ھما وھد ءَ رس ایت وھدیکہ آ پیسر درونتاں بِہ وان ایت ءُ وت ھم وانگ ءُ دربرگ ءِ جُھد بِہ کنت۔ باید اِنت ما مرچیگیں انٹرنیٹ ءُ موبائل ءِ زمانگ ءَ چہ دُرستاں پیسر بلوچی دَرونتاں بِہ وان ایں کہ سرپدی چہ درونتانی وانگ ءَ رس ایت، بلوچی کُمکارگال، تپورگال(ءِ ءُ ءَ)، رنگ گال(یں ءُ ئیں) ءِ وڑیں چیزاں دلگوش بکن ایں ءُ پد ءَ زُبان دوستی ءُ راجدوستی نبشتانکاں بہ وان ایں۔ لبزانکی چیدگ ءُ بھرگاں سرپد بوگ ءِ جُھد بہ کن ایں۔ ما چہ وتی اُستاداں جُست بہ کن ایں نبشتہ چے ءَ گْوش اَنت ءُ نبشتہ ءِ چنکس کاریچ(Process) اَنت؟
دُنیا ءِ ھر جاہ ءَ نودربر چہ دَرونت ءُ نبشتانکانی وانگ ءَ زبر بنت پمیشکا ھر وانِندھیں بلوچے چہ درستاں پیسر وتی راجی زُبان ءِ دَرونت ءُ بلوچ راجدوستانی نبشتانکاں بوان ایت کہ باندا شمارا وتی راجی زُبان ءِ جُھدکاریں نبشتہ کار جوڑ بوگی اِنت۔ وھدیکہ نبشتہ کن اِت۔ چوناھا یک روچے ءِ تہ ءَ پکیر مُلا وَ جوڑ نہ بیت۔ البت اگاں ما وتی اِے دوئیں نزوریاں دلگوش بَہ ایں ءُ اے دوئیں کاراں ھیل کن ایں گُڑا ما زیت وتی راجی زُبان ءِ راست نبیسّی ءَ وت ھم زبر بَہ ایں ءُ وتی راجی زُبان ءِ شریں نبشتہ کار جوڑ بَہ ایں۔ وھدیکہ ما بلوچی راست نبیسّگ ءَ شر ھیل کُتگ گُڑا پد ءَ ما اشتاپی نبیسّگ ءَ ھم رَدی نہ کن ایں۔
گُڈسری من گْوش آں کہ مرچیگیں انٹرنٹ ءِ زمانگ ءَ بساک ءُ بی ایس ایپ ءِ بلوچ نودربری گل چہ دُرستاں پیسر بلوچی زُبان ءِ واست ءَ نودربرانی تہ ءَ آگاھی بْیار اَنت، وٹس ایپی وانگجاھاں اڈ دیان ءَ بلوچ نودربراں راجی زبان براھوئی ءُ بلوچی بہ وانین اَنت، وتی سے ماھی ماھتاک نوشت، گام ءُ زانش ءِ اولی دوئیں تاکدیماں(پیجاں) بلوچی ءُ براھوئی دَرونتاں نبشتہ بکن اَنت کہ راج ءِ نودربر شر ءُ آسانیں وڑے ءَ وتی زُباناں ھیل بہ کن اَنت۔
وت ءَ راجی زُبان ءِ سرمچار جوڑ بِہ کن اِت، بلوچی دَرونتاں بِہ وان اِت، بلوچی نبشتہ بہ کن اِت ءُ بلوچی وٹس ایپی وانگجاھاں اڈ دیان ءَ راج ءِ نودربراں ھم بلوچی بوانین اِت پرچا کہ بلوچی گوں وانینگ ءَ دیمروی کنت۔ بلوچ ءُ بلوچ راجی زُبان بلوچی شالا دیمروی بکنات۔ شالا انچوش بات۔
